Energetikter äuletı

Astana qalasynda ekı ǧasyrǧa juyq uaqyt boiy energetika salasynda qyzmet etıp kele jatqan äulet tūrady. Adal eŋbegımen özgelerge ülgı bolyp, energetika salasy ömırlerınıŋ ajyramas bır bölıgıne ainalǧan Syzdyqovtar otbasynyŋ 8 bırdei müşesı bas qalany jylu men jaryqpen qamtyp otyrǧan ırgelı öndırıs orny – «Astana-REK» mekemesınde qyzmet etıp keledı.

Energetikter äuletınıŋ negızın qalauşy Qadişa Jienbaeva (Syzdyqova) Selinograd qalalyq elektr jelısıne (qazırgı «Astana-REK» mekemesı) sonau 1960 jyly kelgen eken. Ol sol jerde ömır boiy baqylauşy bolyp eŋbek etıp, zeinetke şyq­qan. Adal eŋbegınıŋ arqa­synda közge tüsıp, qatary­nan bırneşe ret qalalyq jäne audandyq keŋestıŋ deputaty bolyp sailanady. Partiia komitetınıŋ müşesı boldy. Talai märte jo­ǧary därejelı orden, medaldarmen marapattalǧan. Suretı «Qūrmet taqtasynan» tüspeitın naǧyz eŋbek adamy boldy.

Äulet dästürın keiın Qadişa Üsenqyzynyŋ ekı aǧasy jal­ǧas­tyrdy. Nyǧmetjan Syzdyqov elektr mamany bolyp qyzmet ettı. Ol da būl salada ūzaq uaqyt boiy, iaǧni taban audarmastan 36 jyl boiy eŋbek etedı. Jas­taiynan osy salaǧa jaqyn ösken Nyǧmetjan arnaiy oqudy tämamdaǧan soŋ, eş oilanbas­tan qalalyq elektr jelısıne jūmysqa tūrady. Eŋbek jolyn qarapaiym jürgızuşı bolyp bastaǧan ol aǧa şeber deŋgeiıne deiın köterıledı.

Būl äulettıŋ taǧy bır maqta­nyşy dep Egınbai Syzdyqovty aituǧa bolady. Ol äulet tari­hyndaǧy eŋ köp eŋbek ötılı bar adam sanalady. Jalpy eŋbek ötılı – 47 jyl. Sonau 1968 jyly eŋbek jolyn qarapaiym elektrik bolyp bastaǧan Egınbai Üsenūly 1980 jyly şeber, sodan keiın aǧa şeber bolyp taǧaiyndaldy. Ol da qaryndasy Qadişa sekıldı bırneşe ret audandyq jäne qalalyq keŋes deputaty bolyp sailandy. Köp­tegen medal, alǧys hat, marapat iegerı atanady. Öz salasynyŋ üzdıgı bola bıldı. «Selinenergo» mekemesı qyzmetkerlerı arasyndaǧy respublikalyq, qalalyq jäne oblystyq jarys­tardyŋ bırneşe märte jeŋım­pazy boldy. Kompaniianyŋ damuyna ülken üles qosqan Üsen­ūlynyŋ fotosuretı älı künge deiın käsıporynnyŋ «Qūrmet taqtasyna» ılulı.

Keiın anasynyŋ eŋbek jolyn qyzy Dämetken Adahmanova jalǧastyrdy. Ol «Astana-REK» mekemesınde 1980 jyldan berı eŋbek etıp keledı. «Men oquymdy aiaqtaǧannan keiın, bırden qalalyq elektr jelısıne keldım. Mıne, sodan berı qarap otyrsam 36 jyl öte şyǧypty. Öndırıs tabaldyryǧyn alǧaş attaǧan künnen berı anamnyŋ bır kısıdei eŋbegı sıŋgen, qoltaŋbasy qalǧan käsıporynda jūmys ıstep kelemın. Būl – men üşın ülken quanyş. Rasyn aitu kerek, bır mekemede bütındei bır äuletten 8 adam eŋbek etu degen öte sirek kezdesetın jaǧdai şyǧar dep oilaimyn. Būl öndırıs ornynda är jyldary Syzdyqovtar äuletınen taǧy üş aǧamyz eŋbek ettı. Sonyŋ bırı – Mūhamedjan Üsenūly. 1993 jyldan 2015 jylǧa deiın jūmys ıstedı. Qali aǧamyz osy jerde 1976 jyldan berı eŋbek etıp keledı, qazır aǧa şeber. Elubai Üsenūly da «Astana-REK» mekemesınıŋ bılıktı tehnikterınıŋ bırı» deidı Dämetken Qūltasqyzy.

Bügınde äjesı negızın qalap ketken energetikter jolyn Syzdyqovtar äuletınıŋ qos bırdei nemeresı jal­ǧastyryp keledı. 1986 jyldan berı atal­ǧan käsıporynda qyzmet etetın Säken Syzdyqov qazır qyzmet bas­şysynyŋ orynbasary lauazymyn atqarady. Äulettıŋ eŋ kenje mamany – Daniiar. Soltüstık Qa­zaqstan univer­si­­te­tınıŋ tülegı. Ol da «As­tana-REK» qabyr­ǧa­synda 2007 jyldan berı jūmys ısteidı. Qyzmetı – dispetcher.

Bürkıt NŪRASYL