«…Qariialar azaiyp bara jatyr» dep Mūqaǧali Maqataev jyrlaǧandai, dariia köŋıldı qariialarymyzdyŋ bırı Sosialistık Eŋbek Erı Saǧila Esenjolova ömırden öttı, dep habarlaidy Elorda aqparat.
Saǧila Abdrahmanqyzy 1942 jyldyŋ 20 qaraşasynda Aqmola oblysy Selinograd audany būrynǧy Kirov atyndaǧy auylda (qazırgı «Köktal») qarapaiym şarualar otbasynda düniege kelgen. Sūrapyl soǧys kezınde ömırge kelgen barlyq balalar siiaqty onyŋ da eŋbekke erte aralasuyna tura keldı. 13 jasynan bastap Selinograd audany Kirov atyndaǧy kolhozda jūmys ıstedı.
Al 1957-1977 jyldar aralyǧynda osy şaruaşylyqtyŋ sauynşysy boldy. 1977 jyly zooveterinarlyq tehnikumynyŋ mal şaruaşylyǧy bölımın syrttai aiaqtaǧan soŋ Kirov atyndaǧy sovhozda süttı-tauarly fermasynyŋ brigadirı bolyp taǧaiyndaldy.
Jūmys kezınde ırı qara maldy budandastyruǧa erekşe nazar audardy. Är ısıne myǧym, jūmysyna tiianaqty bolyp, özınıŋ mındetın adalynan atqaruynyŋ arqasynda Saǧila Abdrahmanqyzy şaruaşylyqty odan ärı jandandyra tüsedı.
Qajyrly eŋbegı aqtalyp, sonyŋ nätijesınde marapattan da kende qalmaidy. 1981 jylǧy 19 aqpanyndaǧy KSRO Joǧarǧy Keŋes Töralqasynyŋ Jarlyǧymen 1980 jyly sosialistık mındettemelerın onynşy bes jyldyqta josparlardan asyra oryndau jäne qol jetkızu siiaqty özınıŋ körnektı jetıstıkterı üşın oǧan «Sosialistık Eŋbek Erı» ataǧy Lenin ordenımen qosa tapsyryldy.
Sondai-aq Saǧila Esenjolova «Eŋbek Qyzyl Tu» ordenımen, «Eren eŋbegı üşın» medalımen marapattalyp, «Qazaq KSR eŋbegı sıŋgen auyl şaruaşylyq jūmyskerı» atanǧan. Qazaq KSR Joǧarǧy Keŋesınıŋ deputaty, Qazaqstan Kompartiiasynyŋ XV sezdınıŋ delegaty bolyp sailanǧan.
Sonymen qatar 2006 jyldyŋ 21 mausymynda Aqmola oblysy Selinograd audanynyŋ äleumettık-ekonomikalyq damuyna zor üles qosqany üşın jäne erekşe eŋbegı üşın Saǧila Abdrahmanqyzyna «Selinograd audanynyŋ Qūrmettı azamaty» ataǧy berıldı.
«Özım soǧys bastalǧan jylda düniege kelıp, odan keiıngı kezeŋderde körgen azdy-köptı qiynşylyqtarymyz ben etken eŋbegımızge qarai, ökımet bızderdı soǧys ardagerlerıne teŋestırılgender qataryna qosty. Al eŋbek jolymyzdy mal şaruaşylyǧy salasynda bastap, osy salada ūzaq jyldar ıstep, zeinetke şyqqandyqtan, airan-süt mäselesıne qatysty bıletınımız az emes. Aqiqatynda da Keŋes zamanynda qūrǧaq süttı tek januarlarǧa ǧana beretınbız. Äsırese, būzau men şoşqanyŋ torailaryna ülestırıletın. Özım osy öŋırdegı şaruaşylyqta ūzaq jyldar ter töktım. Tıptı, sauynşylardan bır täulık ışınde 12 tonna süt qabyldap, onyŋ jartysyn qalaǧa äkep tapsyratynbyz» degen Saǧila Abdrahmanqyzy közı tırısınde tılşılerge bergen sūhbattarynyŋ bırınde.
Būrynǧy beinetınıŋ zeinetın körıp, ǧibratty ǧūmyr keşıp, ūldy ūiaǧa, qyzdy qiiaǧa qondyryp, ūrpaq qyzyǧyna kenelıp otyrǧan şaǧynda da Saǧila Abdrahmanqyzy özı ūzaq jyl eŋbek etken salanyŋ qazırgı örısıne de bei-jai qaramai, eldegı mal şaruaşylyǧynyŋ ösıp-örkendep, keŋ qanat jaiyp damuyna tılektestık bıldırıp, sala mamandaryna ünemı aqyl-keŋesın aityp otyruşy edı.
«Jalpy, el ekonomikasy körsetkışınıŋ bır qyry örıste jürgen tabyn-tabyn maldarymyzǧa tıkelei bailanysty ekenı sözsız. Öitkenı ebın tapsa, sol malymyz mınseŋ kölık, kiseŋ, kiım, jeseŋ as-auqat ekenı beseneden belgılı.
Ädemı qartaia bılgen Saǧila Abdrahmanqyzy zeinetkerlıkke şyqqannan keiın de qoǧamdyq şaralardan tys qalmady. Sanaly ǧūmyrynda jinaǧan mol täjıribesımen keiıngı buynǧa ülgı bolyp, bılgenımen bölısıp otyratyn. Ardagerler ūiymynyŋ belsendı müşesı retınde resmi jiyndarda da ünemı töbe körsetıp, özınıŋ pıkır-paiymyn bıldırıp, salmaqty ärı saliqaly sözın jetkızıp jüretın.
Aita ketsek, ötken jyldyŋ qazan aiynda qarttar künıne orai Nūr-Sūltan qalasynyŋ äkımı Altai Kölgınov «Sosialistık Eŋbek Erı» Saǧila Esenjolovanyŋ üiıne arnaiy baryp, qazynaly qartty merekesımen qūttyqtaǧan bolatyn. Qala basşysynyŋ syi-qūrmetıne, jyly lebızıne riiasyz rizaşylyǧyn bıldırgen Saǧila Abdrahmanqyzy Altai Seidırūlyna analyq aq batasyn bergen.
«Üireneiık barynda qūrmetteudı» dep aqyn Bauyrjan İgılık aitqandai, közı tırısınde eŋbegı elenıp, laiyqty qūrmetke ie bolyp, halyqtyŋ ystyq yqylasyna bölengen Sosialistık Eŋbek Erı Saǧila Esenjolova 78 jasqa qaraǧan şaǧynda qasiettı Qūrban ait qarsaŋynda kelmestıŋ kemesıne mınıp, baqilyqqa attandy.
