Erlıgı mäŋgılık este
Biyl Ūly Otan soǧysynyŋ ardagerı, Işkı ıster ministrlıgınıŋ qūrmettı zeinetkerı Aşubasar Janahmetov közı tırısınde 100 jasqa tolar edı. Maidangerdıŋ öşpes erlıgı, qaisarlyǧy men batyrlyǧy esımızde mäŋgılık saqtalady.
Aqmola oblysy Qorǧaljyn audany Qorjynköl auylynda 1924 jyldyŋ 1 säuırınde düniege kelgen ardager ömırlık jolynda taǧdyrdyŋ qily soqpaqtaryna qarsy tūrǧan jan edı. Äkesı Janahmet jūttyŋ näubetınen qaitys bolyp, üidegı Zliha ana balalarmen jalǧyz qalady. Arada bır-ekı jyl ötıp, elde 3 millionǧa juyq halyq qyrylyp, artynşa Zliha ana ekı qyzymen bırge köz jūmady. Al Oryn esımdı bır qyzy ız-tüssız joǧalyp ketedı. Japadan-jalǧyz qalǧan Aşubasardy meiırımdı jandardyŋ bırı Qorǧaljyndaǧy balalar üiıne aparady. Keiın 1936 jyly jaqyndary öz panasyna alyp, ekı jyldan soŋ 14 jasar jetkınşek Stepniak qalasyna attanady, sol jerde bılım alady. Ortalyqtaǧy Qarsaqpai kentınde jūmysqa ornalasyp, 1942 jyly Qyzyl armiianyŋ äskerı qataryna şaqyrylady. 1946 jylǧa deiın Mäskeu men Leningrad qalalaryn küzetu boiynşa KSRO ışkı äskerlerınıŋ bırınşı arnaiy batalony qatarynda qyzmet etedı. Ardager soǧystaǧy erlıgı üşın bırqatar marapatqa ie bolǧan. 1947 jyly Aqmola qalasy Işkı ıster basqarmasynyŋ sapynda inspektor, aǧa inspektor, ızdestıru bölımı bastyǧynyŋ orynbasary bolyp, artynşa zeinet demalysyna şyǧady.
Qoǧam men otbasynyŋ igılıgı üşın qajymas eŋbektıŋ eren ülgısın, sondai-aq danalyq pen ädıldıktıŋ beinesın körsete bılgen Aşubasar Janahmetovtı jaqyndary, jora-joldastary maqtanyşpen eske alady. Bügınde artynan ergen 8 balasy, 11 nemeresı, 2 şöberesı men 2 şöpşegı üşın ardaqty äke, bolmysy qatal bolǧanmen, mınezı jūmsaq ata, ömır joly önegege toly azamat retındegı beinesı biıkte qala bermek.
Saltanat JANAHMETOVA,
qyzy