Erlıkke taǧzym ettı
![](https://astana-akshamy.kz/wp-content/uploads/2022/04/img_2745.jpg)
Bas qalada Qazaqstan jauyngerlerınıŋ täjık-auǧan şekarasyndaǧy erlıgıne 27 jyl toluyna arnalǧan eske alu şarasy öttı. Onda Otan qorǧauşylar saiabaǧyndaǧy täjık-auǧan şekarasynda qaza tapqan 17 jauyngerdıŋ eskertkışıne gül şoqtaryn qoidy.
1993-2001 jyldar aralyǧynda Täjıkstandaǧy azamattyq soǧys kezınde memleketaralyq kelısımderge säikes Qorǧanys ministrlıgınıŋ, ŪQK Şekara qyzmetınıŋ jäne IIM ışkı äskerlerınıŋ äskeri qyzmetşılerınen qūralǧan qazaqstandyq bırıkken batalon täjık-auǧan şekarasyn küzetu tapsyrmalaryn oryndaǧanyn esterıŋızge salamyz.
1995 jyly 7 säuırde Pşihavr şatqalynda 7-bırıkken rotaǧa sodyrlar şabuyl jasady. Bes saǧatqa sozylǧan keskılesken ūrysta ışkı äskerlerdıŋ 17 jauyngerı qaza tauyp, 33-ı jaraqat alǧan bolatyn.
– Bırıkken batalonnyŋ ofiserlerı men sarbazdary halyqaralyq terrorizm men esırtkı biznesı küşterınıŋ bızdıŋ şekaralarymyzǧa jetuıne tosqauyl qoidy. Jauyngerler batyldyq pen janqiiarlyq körsetıp, äskeri boryşyn adal atqardy, – dep atap öttı general-leitenant Sūltan Qamaletdinov.
Täjık-auǧan şekarasynda qaza tapqan äskeri qyzmetşıler batyrlyqtyŋ, erlıktıŋ jäne antqa adal boludyŋ ülgısın körsetıp, otandastarynyŋ jadynda mäŋgı saqtalady. Osy şara barysynda Memlekettık äskeri-tarihi muzeide Qorǧanys ministrınıŋ orynbasary general-leitenant Sūltan Qamaletdinov sol jyldardaǧy oqiǧalarǧa arnalǧan «Erlıkke jetelegen jol» ekspozisiiasyn aşuǧa qatysty. Körme aiasynda Janar Kemeldıŋ qazaqstandyq jauyngerlerdıŋ täjık-auǧan şekarasyndaǧy qaharmandyǧy jaily «Erlıkke jetelegen jol» kıtabynyŋ tūsaukeserı, sondai-aq Ūlttyq äskeri-patriottyq ortalyqtyŋ şyǧarmaşylyq ūjymynyŋ konsertı öttı.