Juyrda Ükımet üiınde QR Premer-ministrı Baqytjan Saǧyntaevtyŋ töraǧalyq etuımen, Prezident Äkımşılıgınıŋ basşysy Äset İsekeşevtıŋ qatysuymen Memleket basşysynyŋ «Qazaqstandyqtardyŋ äl-auqatynyŋ ösuı: tabys pen tūrmys sapasyn arttyru» atty Qazaqstan halqyna Joldauynda körsetılgen tapsyrmalardy oryndau mäselelerı boiynşa keŋeitılgen otyrys öttı.
Premer-ministr Baqytjan Saǧyntaev otyrysty aşa otyryp, Memleket basşysynyŋ biylǧy Joldauy halyq arasynda ülken qoldauǧa ie bolǧanyn aitty. «Ükımettıŋ negızgı mındetı – taiau keleşekte atalǧan mındetterdı ıske asyru; öŋırlerge bölınetın qarajattardyŋ jetkılıktı kölemı; qajettı şeşımderdı jyldam qabyldau. Halyq bügın atalǧan tapsyrmalardyŋ oryndaluyn kütpeuı kerek, halyq atqarylǧan jūmystyŋ nätijesın köruı kerek» dedı ol.
QR Prezidentı Äkımşılıgınıŋ basşysy Ä.İsekeşev Memleket basşysy öz Joldauynda Ükımet qyzmetınıŋ basty basymdyǧy retınde qazaqstandyqtardyŋ äl-auqatyn anyqtaǧanyn eske saldy. Ol ekı qūramdauyştan tūrady: halyq kırısınıŋ ösımı men äleumettık qyzmetter sapasynan, ömır süruge jaily orta men qauıpsızdıkten tūratyn ömır sapasynyŋ artuy. Būdan özge, Prezident qys mezgılıne, egın jinau nauqanyna, azyq-tülık önımderı men kömır baǧasynyŋ negızsız ösu jaǧdaiyna jäne qoǧamdyq-saiasi jaǧdaidan körınetın qazaqstandyqtardyŋ köŋıl küiıne qatysty basqa da mäselelerdı baqylauda ūstaityn bolady.
Öz kezegınde Ükımet müşelerı Memleket basşysy alǧa qoiǧan mındetterdı ıske asyru jönındegı josparlary turaly baiandady. Mäselen, 2019 jylǧy 1 qaŋtardan bastap eŋ tömengı jalaqy 1,5 esege ösıp, 28 myŋ teŋgeden 42,5 myŋ teŋgege köbeiedı. Mūnyŋ nätijesınde 1,3 mln azamattyŋ eŋbekaqysy ösedı. Būǧan qosa, 275 myŋ azamattyq qyzmetkerdıŋ eŋbekaqysy orta eseppen 35 paiyzǧa ūlǧaiady. Būl – bılım beru jäne densaulyq saqtau salasynyŋ qyzmetkerlerı.
Eŋbek jäne halyqty äleumettık qorǧau ministrı M.Äbılqasymova Memleket basşysynyŋ eŋ tömen jalaqy mölşerın 1,5 esege ösıru boiynşa tapsyrmasyn oryndau maqsatynda 2019 jylǧy 1 qaŋtardan bastap «2019-2021 jyldarǧa arnalǧan respublikalyq biudjet turaly» QR zaŋynyŋ jobasyna tiıstı özgerıster engızıletının aitty. «Eŋ tömengı jalaqy mölşerın aiqyndau ädıstemesı özgeretın bolady, ol eŋ tömengı künkörıs deŋgeiımen qabyspaidy. Memleket basşysynyŋ tapsyrmasyna säikes, 2019 jylǧy 1 qaŋtardan bastap biudjettık ūiymdarda jūmys ısteitın 275 myŋ azamattyq qyzmetkerdıŋ eŋbekaqysy ösedı. Olar üşın jalaqy ösımı orta eseppen 35 paiyzdy qūraidy» dedı M.Äbılqasymova. Būdan özge, eŋ tömengı jalaqynyŋ artuyna bailanysty jūmyspen qamtylǧan halyqtyŋ salyq jüktemesı azaiyp, barlyq jaldamaly jūmyskerlerdıŋ tabysynan salyqtyq şegerımder ūlǧaiady. 6 mln-nan astam jaldamaly qyzmetkerdıŋ salyq jüktemesı tömendetıledı. Jalpy alǧanda, eŋ tömengı jalaqynyŋ ösuı ekonomikanyŋ barlyq sektorlarynda tömen jalaqy alatyn 1,3 mln adamnyŋ eŋbekaqysynyŋ ösuıne äkeledı.
Aldaǧy uaqytta Memleket basşysynyŋ Joldauyn öŋırlerde tüsındıru jūmystary bastalady. Būǧan qosa, 20 qazanǧa deiın Joldaudy aqparattyq qoldau maqsatynda Ükımet müşelerınıŋ basşylyǧymen memlekettık organdardyŋ jäne türlı ūiymdardyŋ ökılderınen tūratyn respublikalyq aqparattyq toptar öŋırlerge saparǧa şyǧady.
