2008 jyldyŋ 24 şıldesı. Sol qaiǧyly kün älı de köz aldymda. Sodan berı on jyl uaqyt zymyrap öte şyǧypty. Ömır-ai deseŋızşı! Ätteŋ, qoldan keler şara joq.
Qūrylys alaŋynda jūmys qyzu jürıp jatqan. Beton aluǧa daiyndalyp jatqanbyz. Asyǧa-üsıge, tez-tez ısteu kerek. Jıgıtter ülgermei jatqandyqtan, basqa brigadanyŋ jūmysşylary kömekke keldı. Aman özınıŋ syzbasyna qarap, bärın joba boiynşa jasap jür. Aqylbek pen Esenaman, Serık soŋǧy aǧaştardy tüzep qoiuda. Eldos qana ottegı bıtıp, sony kütıp tūr. 13-qabattyŋ töbesıne beton qūiyp, bır adamdai jūmys ıstep jatyrmyz. Men körgen osy bır körınıs esımnen bır sätke de keter emes. Bır kezde «ottegı keldı» dedı brigadir Liuha. Tez arada kranşyǧa ekı ottegı ballony salynǧan qauıpsız konteinerdı joǧary köterttım. Sodan ony aǧytyp, betondy köteruge krannyŋ ūşyn tömenge qarai baǧyttadym. Osy kezde qatty jarylys boldy. Alǧaşynda tüsınbedım. Jer sılkınısı boldy ma dep oiladym. Jalt qarasam, jan-jaǧym tütın, aiǧai-şu, tüsınıksız bolyp kettı. Alǧaşqy kömek qorapşasyn aluǧa tez tömen tüstım. Gaz ballony men «şlang» janyp jatyr eken. Rasiiamen tömendegılerge «örttı öşıru kerek» degen habar berdım. Olar menen «tırısıŋ be?» dep sūrady. Olardyŋ mūnysyn basynda tüsınbei qaldym. Aǧaştar arasynda qan-josa jaraly bıreu jatyr eken. Tez alyp şyǧaiyn dep aiaǧynan tartsam, belınen bölınıp, jarty denesı jerge qūlap ketıptı. Maǧan «tırısıŋ be?» degenderın sodan keiın ūqtym. Sol sät taǧy bıreudıŋ dauysy şyqqandai boldy. Qarasam, Eldos eken. Ony taza alaŋǧa alyp şyǧyp, qol oramalymmen betın sürttım. Bıraq amal neşık, köz aldymda soŋǧy demın şyǧaryp, baqilyq boldy.
Oqiǧa ornynda adamdar köbeiıp kettı. 14 jedel järdem men bırneşe ört söndıru kölıkterı keldı. Bıraq qaidam, 5 dosymyz – Aqylbek Asanov, Eldos Nūrjanov, Serık Nuhanov, Esenaman Süiındıkov, Arman Hasanov sol jerde jan tapsyrdy. Taǧy bırneşeuı jansaqtau bölımıne tüstı.
Adam ömırı bır-aq sät eken ǧoi. Bügın bar bolsaq, erteŋ-aq joqpyz. Arada 10 jyl öttı. Astanada biık ǧimarattar sany köbeiıp, jainaǧan qala halyqaralyq deŋgeidegı oqiǧalardyŋ ordasyna ainaldy. Mūnda qazır älemnıŋ köşbasşylary kelıp, saiasi-ekonomikalyq, äleumettık-mädeni mäselelerdı talqylap, türlı halyqaralyq şaralar ünemı ötedı. Biyl elordanyŋ 20 jyldyq mereitoiy atap ötıldı. Köz aldymyzda Astana adam tanymastai özgerdı.
Qala qūrylysyna az da bolsa üles qosyp, qyrşynnan qiylyp, oqystan opat bolǧan dostarymyzdyŋ jarqyn beinelerı – ärdaiym jadymyzda. Olardy ünemı eske alyp otyramyz. Osynau qalada sol dostarymyzdyŋ da özındık qoltaŋbasy qaldy. Astana maǧan sonysymen de qymbat.
Myrzahan OMAROV,
Astana qalasynyŋ tūrǧyny
