Qalanyŋ abattandyru jaǧdaiyn közben körıp, köŋılge tüiıp qaitu oida jürgen ıs edı. Osy oraida, «Ortalyq» atty PİK töraǧasy Jaŋabai Begımbet myrzamen az-kem äŋgımelesıp, onyŋ qaramaǧyndaǧy aulalar men üilerdıŋ ahualyna qanyǧyp qaittyq. Jaŋabai aǧa bızdı aulalaryn kezek kezegımen aralatyp jürıp. Plastik su qūbyrlarynyŋ qazırgı taŋda sapasy temırden äldeqaida myqty ekenı aitylyp ta jür. Olardyŋ kepıldık merzımı 50 jylǧa deiın sozylady. Al, temır qūbyr kemı 5-6 jylda syr bere bastaityny aiqyn.
Atalmyş PİK-tıŋ qaramaǧyna Aǧybai batyr köşesınde ornalasqan 8 tūrǧyn üi kıredı eken. Segızı de eskı qalanyŋ aumaǧynda būrynnan salynǧan köneleu üiler. Degenmen, aulalary tūtastai abattanǧan. Bes qabatty üimen taitalasa ösken biık terekterdıŋ tereze tūsyndaǧy būtalary otalyp, tūrǧyndarǧa zalal keltırmestei etıp kesılgen. Aǧaştardyŋ dıŋı aqtalyp, tüptelıp, uaqtyly suarylatyny körınıp-aq tūr. «Negızınde jöndeu jūmystaryn üş jylda bır ret ötkızemız. Byltyr ǧana barlyq ätkenşekter men aulanyŋ qorşaularyn syrlap qoiǧanbyz. Odan bölek, töraǧa bolǧaly özıme qarasty segız üidıŋ de jertölesın tazartyp, tamşy aqpaityndai ettık. Su qūbyrlaryn tegıs temırden plastikke auystyrdyq. Üi şatyrlaryn bırın qaldyrmai su ötpeitındei jaŋalap şyqtyq. 27 kıreberıstegı toq eseptegışterdıŋ barlyǧyn avtomatqa köşırdım», – dep aǧynan jaryldy
Segız üidıŋ aulalaryndaǧy jalǧyz aiaq joldyŋ barlyǧynyŋ keneresın keŋeitıp, asfalt tösetıp, yŋǧailandyrǧan. Būryn bır adam äreŋ ötetın töte joldyŋ boiymen, tıptı, kölıkter aǧylyp jatyr. Är aulada demalatyn oryndyqtar, balalardyŋ plastik ätkenşekterı men syrǧanaqtary ornalasqan. Balalar tartylyp oinaityn temır baǧandar, qūm salynǧan şatyrlar ädemı boiaularmen boialǧan. Olarǧa qosymşa köp auladan köre bermeitın kır jaiatyn arnauly temır qorşaular da közge tüstı.
Auladaǧy qariialar bölıngen aumaqtarynda gül köşetterın otyrǧyzyp, tereze aldyn bauǧa ainaldyrǧan. «Arasynda aulamyzdaǧy jas aiaqdopşylar ǧana taptap ketetını bolmasa, jaǧdaiymyz jaqsy», – dedı sary şaşyn artyna qaiyryp jatqan orys qariiasy.
«Jetı jylda osy aulalardyŋ jaǧdaiyn tüzetuge barynşa talpyndym. Sol kezde ekken jas būtaqtar, mıne, bügın menen ekı ese biıktep kettı. Al, bıtpegen ısterımnıŋ bırı – üilerdıŋ könergen syrtyn aqtatu. Üş üidıŋ syrtyn sary tüske boiattym. Endı qalǧanyn jasau josparda bar. PİK atynan qandai da jūmystar jasalsa, onyŋ barlyǧy tıkelei päteraqy esebınen jasaldy. Bız qosymşa aqşa jinap, tūrǧyndarymyzdy mezı etken kezımız bolǧan joq», – deidı töraǧa öz sözınde.
Jasyl jelekke oranǧan şaǧyn aulalardyŋ köleŋke saiasynda demıŋdı basyp otyra qalǧyŋ keledı-aq. Osynyŋ barlyǧy taŋdy taŋǧa ūryp, tynym almastan tiesılı qarjysyn köpşılıktıŋ igılıgıne jūmsap, ainalasyn güldei jainatyp otyrǧan Jaŋabai Begımbet siiaqty janaşyr ärı ısker adamnyŋ taza nietınıŋ jemısı ekenı de anyq.
Şynar ÄBILDA
