ŪBT-ǧa daiyndyq qalai jürıp jatyr?
Äsima BİMENDİNA,
Astana qalasy Bılım basqarmasynyŋ bastyǧy:
Biyl Astana mektepterın 3988 tülek tämamdady. Olardyŋ 3 652-sı Ūlttyq bıryŋǧai test tapsyruǧa daiyndyq jürgızu üstınde. 178 oquşymyz – «Altyn belgıden» ümıtker. Al, qalǧan oquşylar – halyqaralyq olimpiada jeŋımpazy retınde grantqa ie bolǧandar nemese şeteldık joǧary oqu oryndaryna tüsu üşın dästürlı emtihan tapsyratyndar. Osy oraida, Astanada olimpiadalar men ǧylymi saiystar jeŋımpazdary sanynyŋ artyp kele jatqandyǧyn aita ketu kerek.
Jalpy, elordada ŪBT tapsyruǧa ötiniş beruşilerdiŋ sany da jyl ötken saiyn köbeiıp keledı. Būl – mūǧalımderdıŋ jemıstı eŋbegınıŋ, oquşylardyŋ synaqqa degen jauapkerşılıktı sezınuınıŋ nätijesı.
Janat AITOVA,
Ǧ.Ormanov atyndaǧy №7 mektep-gimnaziianyŋ direktory:
Bızdıŋ mektepten biyl 103 tülek qanat qaǧyp ūşqaly otyr. Bärı de Ūlttyq bıryŋǧai testıleuge qatysady. Synaqqa 10-15 kün qalǧanda özım oquşylarmen arnaiy kezdestım. Psihologiialyq tūrǧydan azdy-köptı keŋesımdı berdım. Jalpy, ŪBT adamnyŋ taǧdyryn şeşpeidı. Sondyqtan, emtihanǧa kırer aldynda oquşynyŋ özın erkın ūstaǧany, saualdarǧa jauap bererde şeşımın senımdı, sanaly türde jasaǧany abzal. Oquşylarǧa osyny ūǧyndyruǧa tyrysamyn. Biyl bızdıŋ ūjym «Myŋ bala» jobasynyŋ aiasynda testıleuge öte ülken daiyndyq jürgızdı. Bıtıruşı 103 tülektıŋ ärqaisysyna bır mūǧalım, bır ata-anany jauapty etıp belgıledık. Olar özderınıŋ hal-qaderınşe bölıp berılgen oquşyny test sūraqtaryna jan-jaqty daiyndady. Men osy mekteptı qabyldap alǧan alǧaşqy jyly, iaǧni, 2008 jyly testıleudıŋ ortaşa baly 61-dı qūrap, qaladaǧy 77 mekteptıŋ arasynan 26 oryndy ielensek, byltyrǧy körsetkış 86 baldy qūrap, 12-orynnan körındık. Biyl būdan da joǧary körsetkıştı baǧyndyryp, alǧaşqy ondyqtan körınemız degen ümıtımız bar.
Saualnamany äzırlegen Şynar DOSAN
