Täuelsız elımızdı sonau odaq ydyrap, baǧyt-baǧdarymyz belgısız bolyp tūrǧan toqsanynşy jyldary qūqyqtyq, demokratiialyq jolǧa bastaǧan Nūrsūltan Nazarbaevtyŋ jeke qasietterı turaly az aitylyp jürgen joq. Tıptı, qanşa aitylsa da köptık etpeitın siiaqty. Öitkenı, ūly Abaidyŋ özı «Süier ūlyŋ bolsa, sen süi, süienerge jarar ol» demei me?
Elbasynyŋ sözge şeşendıgı, önerge jaqyndyǧy öz aldyna, oryndy jerınde ortany şattyqqa böleitın äzılqoilyǧy qandai?!
Erterekte Qazaqstan Prezidentı Jezqazǧan oblysyna barǧan bır saparynda «Jekemenşıkke köşemız. Būl jalqaularǧa qarsy jasaluda. Bızdıŋ auyl şaruaşylyǧynda üş ai traktorynyŋ ne kombaiynyŋ astynda jatyp, kündız-tünı eŋbek etetınderden artyq aqşa alatyndar bar. Naryqqa tezırek köşpesek, olar eŋbektıŋ qadırı men qasietın sezınbei ötuı mümkın» dep äzıldegen bolatyn.
Al önerge jaqyndyǧy şe? Bırde sarabdal saiasatkerdıŋ qolyna dombyra alyp, «Maşinanyŋ tägärmäsä nigä sigäz bumaǧan, Būl düniianyŋ hizyqlare nägä tiges bumaǧan!…» dep eŋbekşıler ortasynda şyrqai jönelgenı bar.
Qazaqstan halqy assambleiasyn qūru turaly alǧaşqy söz toqsanynşy jyldardyŋ basynda Elbasynyŋ auzynan şyqqany belgılı. Sol ideia pısıp-jetılgen kezde Nūrsūltan Äbışūly Oral qalasyna jūmys saparymen keldı. Egın alqabyn aralap, dihandarmen, auyl şaruaşylyǧy qyzmetkerlerımen kezdesuınen keiın K.E.Voroşilov atyndaǧy Oral maşina jasau zauytynyŋ Mädeniet saraiynda ūlttyq mädeni ortalyqtardyŋ müşelerımen, oblys aktivımen alqaly bas qosu ötkızdı.
– Täuelsızdık, el bostandyǧy degen tättı ūǧym ǧoi. Endı, osy ata-babalarymyz armandap, bızdıŋ qolymyz jetken egemendıktı uysymyzdan şyǧaryp almaiyq, El ışındegı kem-ketıktıŋ orny tolar, jetımsızdık pen basqa da kemşılıkterden qūtylyp, jetılermız, jaŋa täi-täi basqan, tältırektegen aiaǧymyz quat alyp, būǧanamyz bekır. Älı-aq, alşaŋdap, alǧa qadam basarmyz. Tek, syrttan tier soqqydan saq bolaiyq, saqtanaiyq! – dedı.
Osydan keiın Prezident batysqazaqstandyqtardyŋ qol jetken jetıstıkterıne toqtala kelıp:
– Oblysta ötken jyly egın jaman şyqqan joq. Dihandar barynşa mol astyq jinady. Osy jyly da jauyn-şaşyn mol jauyp, aua-raiy mümkındık berse, eŋbekkerler aianyp qalmas, – dedı.
Söittı de zalda aldyŋǧy qatarda otyrǧan belgılı jazuşy Engels Ǧabbasovqa: «Sız ūzaq jyldan berı aua-raiyn baqylap jürsız ǧoi. Qalai oilaisyz, kelesı jaz qalai bolady?» dedı.
Engels Ǧabbasov ta osyny kütıp otyrǧandai, «Nūreke, men köpten aityp jürmın. Köktem men jazdyŋ basy jaŋbyrly bolady. Aldaǧy jyl dihandarǧa jaily bolǧaly tūr. Oblys taǧy da mol astyq jinaidy. Bız älı süiınşı sūraityn bolamyz» dep quanyşty köŋıl küimen söilei jöneldı.
Osy sözge qatty mereilengen Elbasy balaşa quanyp, «Jaraisyŋ, Engels, jaraisyŋ! Süiınşıŋdı men-aq bereiın» dep bılegındegı saǧatyn şeşıp berdı. Osy kezde Nūrsūltan Äbışūlynyŋ märttıgıne riza bolǧan zal alaqan qyzdyra qol soǧyp, şattanyp kettı.
Sol bır sättı batysqazaqstandyqtar ūmyta almaidy. Ülkenı de, kışısı de rettı jerınde aityp jüredı. Aitqandai, kelesı jyly boljanǧan egın mol şyǧyp, el yrysqa keneldı. Al, Engels Ǧabbasov kelesı 1995 jyldyŋ säuırınde qūrylǧan Qazaqstan halyqtary kışı assambleiasy atqaruşy hatşylyǧynyŋ töraǧasy bolyp taǧaiyndaldy. Keiın alǧaşqy qos palataly Parlamenttıŋ Senat deputaty bolyp sailandy.
Qazaqstan Prezidentınıŋ özı syilaǧan sol qol saǧatty jazuşy közdıŋ qaraşyǧyndai saqtap keledı.
«Men üşın būl oqiǧanyŋ maŋyzy öte zor. Şyn jüregımen, adal köŋılımen memleket basşysy syilaǧan dünie üiımnıŋ törınde jarqyrap tūrǧany üşın de men özımdı baqytty adam sanaimyn. Ärı ony kelesı ūrpaqqa maqtanyş sezımımen aityp otyramyn» deidı jazuşy.
Saǧi ORAL