Būl turaly keşe Ükımet otyrysynda QR Premer-ministrı Asqar Mamin mälımdedı. «1 mamyrdan bastap bız köpbalaly otbasylarǧa päter berudı bastaimyz. Ekı jyldyŋ ışınde «Qazaqstannyŋ tūrǧyn üi qūrylys jinaq bankı» arqyly 22,5 myŋ otbasy jeŋıldetılgen nesie alady» dedı Ükımet basşysy.
Ol «Nūrly jer» jäne «7-20-25» baǧdarlamasy Memleket basşysynyŋ halyqtyŋ tūrǧyn üi jaǧdailaryn jaqsartuǧa negızdelgenın atap öttı. 2019 jyly elımızde 13,1 million şarşy metr tūrǧyn üi paidalanuǧa berıledı. Būl jospar oryndaluy üşın öŋır äkımderı jer bölu, qūrylys alaŋdaryna kommunikasiialar tartu jūmystaryn jedeldetuı tiıs. Prezidenttıŋ halyqty äleumettık qoldau şaralary şeŋberınde Qazaqstandaǧy 6 myŋ köpbalaly otbasy baspanamen qamtamasyz etıledı. Zaŋnamalyq aktılerge özgerıster engızılıp bolǧannan keiın, päterler bölınıp berıle bastaidy.
Ükımet otyrysynda söz söilegen İndustriia jäne infraqūrylymdyq damu ministrı Roman Skliar jyl basynan berı elımızde 1,7 mln şarşy metr tūrǧyn üi paidalanuǧa berılgenın habarlady. Aldaǧy uaqytta jalǧa berıletın tūrǧyn üilerdıŋ qūrylysyna respublikalyq biudjetten 32,8 mlrd teŋge bölu qarastyrylǧan. Būl qarajatqa şamamen 4500 päter salynady.
«Memleket basşysynyŋ tapsyrmasyn jüzege asyru maqsatynda 2019 jyldyŋ biudjetın naqtylau aiasynda köpbalaly otbasylarǧa arnalǧan jalǧa berıletın baspanalardy saluǧa jäne satyp aluǧa öŋırlerge 50 mlrd teŋge bölu qarastyrylǧan. Jetı jyldyŋ ışınde 350 mlrd teŋge bölınedı» dep tüsındırdı Roman Skliar. Ol elımız boiynşa äkımdıkterdıŋ jelısı boiynşa obligasiialyq qaryzdardyŋ esebınen salynǧan 2 myŋ päter satyp alynatynyn da jetkızdı. Üş eselık ainalymnyŋ esebınen 25 jyldyŋ ışınde 56 myŋ köpbalaly otbasylarǧa qaryz berıledı. Sonymen qatar, Astana, Almaty jäne Şymkent qalalaryndaǧy jūmys ısteitın jastarǧa arnalyp salynatyn kem degende 1000 päterge 2019 jyly 7,2 mlrd teŋge qarastyrylǧan.
Asqar Mamin öz kezegınde jekemenşık tūrǧyn üi qūrylysy barysynda ortaq säulettık tūrpatyn saqtau qajettıgın eskerttı. Bügınge deiın būl tapsyrmany üş oblys: Aqtöbe, Soltüstık Qazaqstan jäne Qostanai oblystary ǧana oryndaǧan. Sondai-aq Ükımet basşysy qūrylysta jergılıktı mazmūndy 90 paiyzǧa deiın jetkızu mındetıne erekşe nazar audardy. Onyŋ paiymdauynşa, būl önerkäsıptı damytyp, jaŋa jūmys oryndaryn aşuǧa mümkındık beredı.