QAI JOLDAR JABYLADY?
Keşe elorda äkımdıgınıŋ ǧimaratynda kei köşelerdıŋ uaqytşa jabylatynyna bailanysty brifing öttı.
– Bügınde Astana qalalyq Avtomobil joldary basqarmasy «Naiza-Qūrylys» konsernımen bırlesıp, Qabanbai batyr köşesınıŋ №26 köşeden äuejai ainalma jolyna deiıngı bölıgın qaita qalpyna keltıru jūmysymen ainalysuda. Sonyŋ şeŋberınde Qabanbai batyr köşesınıŋ Husein ben Talal köşesınen №31 köşege deiıngı bölıgın uaqytşa jabu qajettılıgı tuyndady. Būl jerde jylu beretın jäne su tartatyn injenerlık jelılerdı töseuge arnalǧan jūmystar jürgızıledı. Olar 10 qazanǧa deiın aiaqtalady dep josparlanyp otyr, – dedı atalmyş basqarmanyŋ basşysy Symbat Myrzaǧūlov.
Būdan soŋ Astana qalalyq IID Äkımşılık polisiia basqarmasy basşysynyŋ orynbasary Eljan Chupekov joǧaryda aitylǧan özgerıster jaily elorda tūrǧyndarynyŋ aldyn ala habardar bolyp, öz ısterın erterek josparlauy kerektıgın eskerttı:
– Qabanbai batyr köşesı jabylsa, şaharda tek ekı ırı magistral ǧana qalady. Olar – Orynbor jäne Tūran daŋǧyldary. Onyŋ üstıne, 4 qyrküiekte «Astana marafony» atty ülken şara ūiymdastyrylmaq. Soǧan orai, däl osy künı saǧat 7.30-14.00 aralyǧynda Tūran, Orynbor, Saraişyq, Baitūrsynūly, Täuelsızdık, Qaldaiaqov, Näjımedenov, Amanjolov, Qoşqarbaev, Ainaköl, Abylaihan, Puşkin, Seifullin, Saryarqa köşelerınıŋ, saǧat 7.30-12.00 aralyǧynda Tūran, Orynbor, Qonaev, Türkıstan, Dostyq, Aqmeşıt köşelerınıŋ, al saǧat 7.30-11.00 aralyǧynda Tūran, Dostyq, Nūrlyjol jäne Qonaev köşelerınıŋ kei tūstarynda qozǧalys şekteledı.
Astana qalalyq Jolauşylar kölıgı basqarmasy bölımınıŋ basşysy Tūrsynǧali Jäkenov marafon kezınde kei avtobustardyŋ qozǧalysy toqtatylyp, keibıreuınıŋ baǧyty özgeretının jetkızdı. Ol turaly tolyq aqparatty elorda äkımdıgınıŋ resmi saitynan nemese 57-47-77 telefony arqyly aluǧa bolady.
Botagöz MARATQYZY