Qaita testıleu ötedı
QR Bılım jäne ǧylym ministrınıŋ 2017 jylǧy 2 mamyrdaǧy №204 būiryǧymen bekıtılgen qaǧidaǧa säikes şektı baldy almaǧan, nätijelerı joiylǧan tülekter jäne atalǧan synaqqa qatyspaǧandarǧa joǧary oqu oryndaryna aqyly negızde tüsu üşın aldaǧy 15-19 tamyz aralyǧynda qaita ūlttyq bıryŋǧai jäne keşendı testıleu ötedı. Qazır joǧary oqu oryndarynyŋ qabyldau komissiiasynda talapker ötınışın qabyldau bastaldy, ol 3 tamyzǧa deiın jalǧasady.
Būl testıleu oquǧa tüsuşılerdıŋ qalauymen qazaq, orys nemese aǧylşyn tılınde Qazaqstan tarihy, matematikalyq sauattylyq, oqu sauattylyǧy (oqu tılı) jäne ekı beiındık pän boiynşa ötkızıledı. Al qaita ūlttyq bıryŋǧai jäne keşendı testıleudı aǧylşyn tılınde tapsyruşylar «Qazaqstan tarihy» pänın qazaq nemese orys tılınde jauap bere alady.
QR BǦM Ūlttyq testıleu ortalyǧy direktorynyŋ orynbasary Quanyşbek Mälıkovtıŋ aituynşa, qaita ūlttyq bıryŋǧai jäne keşendı testıleu tapsyratyn talapkerler bılım grantyna ümıtker bola almaidy. Būl testıleudı tapsyru aqyly türde jüzege asady. Oǧan qatysu üşın 2242 teŋge töleisız.
Sondai-aq, jedeldetılgen oqu merzımımen qysqartylǧan bılım beru baǧdarlamalary boiynşa ūqsas mamandyqtarǧa tüsu üşın kolledj tülekterı testıleudı öz erkımen qazaq nemese orys tılınde jalpy beiındık jäne beiındık pänder boiynşa tapsyrady.