Quandyq QASYMOV, rejisser: «Naǧyz dramaturgiia men käsıbi akterler «saiqymazaqtardyŋ» köleŋkesınde qalyp qoidy»

Qazaq akterlık mektebı men rejissurasy älemnıŋ eşbır memleketınıŋ teatr önerınen artyq bolmasa, kem emes. Būǧan belgılı rejisser Quandyq Qasymovtyŋ spektaklderı qatysqan halyqaralyq festivalderdegı jeŋısterdı aitar edık. Älemdık deŋgeidegı är türlı jarystarda rejisserdıŋ «Medeia», «Troia arulary» jäne «Qyz Jıbek» bes ret bas jülde, ekı ret «Eŋ üzdık äiel obrazy», ekı märte «Eŋ üzdık rejissura» nominasiialary boiynşa laureat atandy. Qazaq teatr önerın Europa jerınde nasihattap jürgen rejissermen teatr salasyndaǧy özektı mäseleler jönınde äŋgıme örbıtken edık.

Än aitudy äteşten üirenıp jürmız

– Teatr dese, Stanislavskiidıŋ jüiesı eske tüsedı. Sol jüie eskırıp bara jatqan siiaqty. Sız qalai oilaisyz?
– Jüie eskırgen joq. Teatr önerındegı adamdar jaŋaryp, jüiesızdık jailap barady. Sol Konstantin Sergeevich Stanislavskiidıŋ jyldar boiy oi elegınen ötkızıp, körgen-bılgenın tüiındep jazǧan teoriiasyn sız ben bız tereŋ ūǧynyp, jetık meŋgerdık pe? Kümänım bar. «Nege?» dersız. Menıŋ baǧyma institutta därıs bergen ūstazym Qazaq elınıŋ halyq artisı, alǧaşqy käsıbi rejisser Asqar Toqpanov aǧamyz boldy. Ol kısı sol Stanislavskiidıŋ şäkırtterınıŋ bırı Sahnovskii myr­zadan Moskvada oqyp, bılım alǧan. Sondyqtan jüienıŋ egjei-tegjeiın bıletın jalǧyz maman edı. Onyŋ leksiialary men sabaq beru täsılı sol jüiege negızdelıp otyryp jasaluşy edı. Negız dūrys qalansa, jüie ärqaşan şyǧarmaşylyqty örkendetuge kömektesedı. Stanislavskii – mäŋgılık jüie oilap tapqan daryndy adam.

Bılımsızdık basym bolǧan jerde nigilistık oi örbidı. Diplom bar, bıraq bılım joq! Oǧan kınälı akterdıŋ nemese rejisserdıŋ özı.Tek qana özı. Men de ol jüienı sol kezde tolyq meŋgerıp şyqtym deuden aulaqpyn. Mümkın 50 paiyzyn qabyldaǧan şyǧarmyn. Bıraq jyldar öte, sol jüiemen sahnada akter jäne rejisser retınde jūmys ıstei otyryp män-maǧynasyna jetuge tyrystym. Tereŋ üŋılıp zerttegen saiyn būl jüie jaŋa qyrynan aşylady. Sondyqtan Stanislavskiiden qaşuǧa bolmaidy.

– Qazır teatrda söz arzandap, ūsaqtalyp bara jatqandai körınbei me sızge? Teatrdy ömırlık sūraqtarǧa jauap beretın joǧary intensiia dep aita alamyz ba?
– El arasyndaǧy sözdıŋ qadırı ketken kezde ǧana söz arzandaidy. Teatrǧa da söz dramaturgiiamen enedı. Iаǧni, naqty adamnyŋ, dramaturgtıŋ söz saptauymen keledı. Onyŋ ömırge degen közqarasy men pälsapasy arqyly bız rejisserler, akterler, suretşıler sol dramaturgtyŋ ideiasyn tüsıngımız keledı. Sol ideiany körermenge jetkızemız. Bügınde sahna törındegı keiıpkerdıŋ auzynan şyqqan sözdıŋ maǧynasy tereŋdıkten görı saiazdyqqa tartatyny ras. Äsırese, satiradaǧy arzan söz akterlerge kerı äserın tigızedı. Öitkenı olar qazırgı taŋdaǧy interaktivtı tehnologiiany molynan qoldanu arqyly adamnyŋ sanasy men sezımıne sol jadaǧai sözımen qatty äser etedı. Arzan sözben, arzan oimen ulaidy. Dramaturgiia bar bolsa da kündelıktı küibeŋ tırşılıktı jyrlaityn bır sydyrǧy maǧynasyz şyǧarmalar qaptady. Bızge däl qazır ülken bır qūbylys kerek siiaqty.

Tarihqa üŋılsek, orys halqynyŋ «skomoroh» nemese evropanyŋ «şut» degen keiıpker maskalary bolǧan. Būl keiıpkerler qara halyqtyŋ oiyn alaŋǧa şyǧyp nemese han saraiyndaǧy patşa aldynda qoryqpastan aita bılgen. Al bızdıŋ satiramyz sahnadan ne aitady? Aitqan sözınde maǧyna bar ma? Külegeş halyq bylai şyqqan soŋ nege külgenın ūmytyp qalady. Olar da teatr degen aidar taǧyp alatyn boldy. Sondyqtan körermen, äsırese, jas körermen sözdıŋ qadırın qūndylyǧy az, jadaǧai sözı köp osyndai «teatrlar» arqyly ūǧyp, teatr degen ūǧymdy sol arqyly boiyna sıŋırıp jür. Al naǧyz dramaturgiia men käsıbi akterler jaŋaǧy «saiqymazaqtardyŋ» köleŋkesınde qalyp qoidy. Sebebı bız interaktivtı jüieler arqyly qadırlı, maŋyzdy, däiektı sözdı sirek därıpteimız. Sondyqtan ömırımız arzan sözdıŋ qūlyna ainalyp bara jatyr.

Eger şyǧarmaşylyq adamǧa materialdyq jaǧdai jasamasa, sol arzan külkılı, jadaǧai sözdı ortaǧa itermelep, olardy toi-dumannan tabamyz. Olarǧa sahnadan görı sol jer qymbat, ärı qyzyqty. Ömır süruıne, jaqsy ömır süruıne qarajat tabady. «Auyrdyŋ üstımen, jeŋıldıŋ astymen» kün keşudı ädetke ainaldyrady. Qasiettı sahna akter üşın kelıp ketetın, mardymsyz ailyq alatyn «jerge» ainalady. Soǧan qaramastan qazaq akterlık mektebınıŋ ūşqyndary keibır spektaklderde körınıp jatady. Tek ūşqyndary ǧana. Būl – tragediia!

Şyny kerek, telearnalarymyz reitingterın arzan sözben jinap jür. Osy arzandarǧa äbden qanǧan körermenge teatr nege qyzyq? Teatr sahnasyndaǧy tereŋ oily pälsapany estıgende jan düniesı jiyrylyp, otyrǧan ornynan tūryp, zaldan şyǧyp ketkısı keledı. Al satiralyq teatrlar qai qalaǧa barsa da, olardyŋ bilet baǧasynyŋ qymbatşylyǧyna qaramastan esıktı būzyp kıruge daiyn. Yrqy ketken, yrzyǧy joq, saiaz, maǧynasyz sözdı estıp, yrjyŋdap şyqqany üşın ol qarajatyn da, uaqytyn da aiamaidy. Nege? Sebebı bızdıŋ qoǧam tereŋ sözdı säigülıktıŋ ertoqymyn sypyryp tastap, jalaŋ sözdı jaidaq atqa mınıp jaibaraqat ömır süruge köşken. Adamdardyŋ denı miyn qozǧap oilanudyŋ ornyna yrbaqai söz, tyr­baqai äreket jasauǧa qūmar.

Sözdıŋ qadırın toidaǧy arzan sözdı asaba «şoumender» de tüsırıp bıttı. Aiyna bırneşe toiǧa bas sūǧatyn qazaq ol jerden qandai söz tyŋdaidy? Bız osyǧan män bermeimız. Mıne, osy sebepterdıŋ bärı teatr sahnasyndaǧy mändı, maǧynaly tereŋ oily sözge kerı äserın tigızedı. Osy jerde oiyma Abai atamyzdyŋ audarmasyndaǧy Krylov myrzanyŋ «Būlbūl men esek» mysaly eske tüsedı. Sonda būlbūldyŋ äsem ünıne baǧa bergen esek: «Sen än aitudy äteşten üiren» deidı ǧoi. Qazırgı bızdıŋ qoǧamnyŋ beinesı osyǧan keledı. Būlbūldyŋ sairaǧan ünınen görı, qiqulap qiqyrǧan äteştıŋ ünıne qūmar bolyp baramyz.

Komediia janry – teatrlardyŋ künkörısı

– Keŋestık qazaq teatrynda qazırgı teatrda joq qandai igı dästürdı aita alasyz?
– Aityp otyrmyn ǧoi, akter şeberlıgı saiazdap barady. Būnyŋ sebebı nede? Keŋestık däuırde sahnaǧa şyqqan akterge talap qatqyl bolatyn edı. Jäne oqyǧan oqu oryndaryndaǧy därıs beru baǧdarlamalary da qataŋ tärtıppen enetın. Emtihan tapsyru bız üşın eŋ ülken syn bolatyn. Äsırese, mamandyq boiynşa jüretın sabaqtar eŋ maŋyzdy sabaqtar bolatyn. Qazır de solai bolar degen senımdemın. Degenmen, olai emes-au degen küdık enedı sanama. Sebebı oqudy tämamdap kelgen keibır akter azamattyŋ bılımıne köŋıl qoisaŋ – kezınde özımızdıŋ sanamyzǧa engızılgen şeberlıktıŋ mektebınıŋ negızın qalaityn käsıbi elementterdı bılmei jatady. Bıraq qoldarynda diplomdary bar, bırı qyzyl, bırı kök. Jalǧyz talantpen şauyp bäige ala almaitynyn sol jas akter sezbeidı. Onyŋ talantyn şyŋdaityn bılım ekenın ūqpaidy. Ony ūǧyndyrmaǧan ūstaz kınälı dep esepteimın.

Keŋes däuırınde käsıbi akter önerıne, äsırese, rejissuraǧa köp köŋıl bölınetın. Olardyŋ materialdyq jaǧdaiyn jasauǧa tereŋ män berıletın. Äsırese, öner şeberlerıne, jeke tūlǧasy men şyǧarmaşylyǧyna arnalǧan jiyr­ma şarşy metr qosymşa baspana berıletın. Būl akter, rejisser, suretşı, dramaturg jeke dara şyǧarmaşylyqpen ainalysuyna, ızdenıske enuıne mümkındık tuǧyzu edı. Qazırgı kezde qosymşa emes, negızgı baspanany aludyŋ özı qiiamet. Eger şyǧarmaşylyq adamǧa materialdyq jaǧdai jasamasa sol arzan külkılı, jadaǧai sözdı ortaǧa itermelep, olardy toi-dumannan tabamyz. Olarǧa sahnadan görı sol jer qymbat, ärı qyzyqty. Ömır süruıne, jaqsy ömır süruıne qarajat tabady. «Auyrdyŋ üstımen, jeŋıldıŋ astymen» kün keşudı ädetke ainaldyrady. Qasiettı sahna akter üşın kelıp ketetın, mardymsyz ailyq alatyn «jerge» ainalady. Soǧan qaramastan qazaq akterlık mektebınıŋ ūşqyndary keibır spektaklderde körınıp jatady.

Tek ūşqyndary ǧana. Būl – tragediia! Sebebı akter önerı – kündelıktı ızdenıske süiene otyryp, adam psihologiiasyn zertteudı maqsat tūtatyn, «inemen qūdyq qazǧandai» eŋbek etudı talap etetın öner. Tüsınesız be, ÖNER! Al bız qazır būl önerdı «qolbalaǧa» ainaldyryp baramyz. Boiymdaǧy talantymdy kündelıktı küibeŋ tırşılıktıŋ qamyna orai satamyn da kün köremın. «Qu tırlıkke qūl bolyp aiaŋ basyp, qūlaşymdy jaia almai baratyrmyn» degen Mūqaǧali aqynnyŋ qanatty sözı qazırgı kezeŋnıŋ teatr önerınıŋ atmosferasyna däl keledı. Erteŋ ūşqyn öşedı. Şoq sönıp qolamtaǧa ainalmasyna kım kepıl? Qazırgı kezde qazaq teatrynda rejissura joq degen ūǧym qalyptasyp, sony därıpteitın qairatkerler paida boldy. Rejissura qaşan qanat jaiady? Rejissura mamandyǧyna tolyqqandy jaǧdai jasalǧanda ǧana, rejisser keŋ kösılıp şaba alady. Sahnanyŋ patşasy akter bolǧandyqtan, rejisser sonyŋ daryny men şeberlıgıne täueldı. Aktersız rejisser, rejissersız akter tūl. Şaban atqa mınıp bäigege qatyssaŋyz ne bolatynyn özıŋız de sezetın bolarsyz.

– Komediiaǧa kelgende taqyrybymyz tapşy bolyp qalady. Älı künge deiın qazaq teatrlary özıŋız audarǧan İbrohim Sodikovtıŋ «Äpendınıŋ bes qatyny» men Sūltanälı Balǧabaevtyŋ «Eŋ jaqsy erkek» sekıldı komediialarymen kün körıp jür. Nege taqyryp aiasy sonşalyqty tar?

– Sözıŋnıŋ jany bar, komediia janry Qaltai aǧamyzben bırge ketken siiaqty. Negızı komediia janry teatrlardyŋ künkörısı ǧoi, qalqam. Bıraq qazır ol janr eşkımge kerek emes bolyp barady. Sondyqtan ministrlıktıŋ teatr bölımı komediia janryn därıpteitın teatr festivalderın ūiymdastyru kerek. Sonda baryp dramaturgtar qoldaryna qalam alyp jaŋa şyǧarmalar jazatyn bolar. Şymkent qalasyndaǧy Satira teatrynyŋ negızınde «Taqiialy perışte» nemese basqa da taqyrypta komediia janryndaǧy spektaklderdıŋ halyqaralyq festivalı ūiymdastyrylsa, qūba qūp bolar edı. Būndai festivalder älemde neken saiaq.

«Köşedegı paqyrdy äkım bol dep şaqyrdy»

– Qazırgı taŋda «Mädeniet turaly» zaŋǧa teatr tarmaǧy boiynşa özgertuler engızıldı. Osy özgerısterge toqtalyp ötıŋızşı.
– İä, dūrys aitasyŋ. Būl zaŋ boiynşa ötken ǧasyrda damyp, qanat jaiyp qalyptasqan teatrdyŋ rejissurasy qūrdymǧa kettı. Onyŋ atqarar rolı joiyldy. Teatrdyŋ körkemdık deŋgeiı men şyǧarmaşylyq repertuaryn qalyptastyru, akterlerdıŋ şeberlıgın şyŋdau direktor myrzaǧa jükteldı. Sonda ol adam şyǧarmaşylyqqa jauap bere me, älde şaruaşylyqqa jügıre me? Endıgı taŋda direktorlyqqa mädeniet salasynda bes jyl basşylyq qyzmet atqarǧan azamattyŋ kez kelgenı taǧaiyndaluyna mol mümkındık tudy. Rejisser direktordyŋ «qolbalasyna» ainalyp nemese tıptı de joiylyp, közdıŋ qarasynan būlbūl ūşady.

– Sol özgertuler engızılgen jiynǧa özıŋızdıŋ de qatysqanyŋyzdy aityp edıŋız. Nege aitpadyŋyz osyny?
– Jalǧyzdyŋ «ünı şyqpas» degen. Bekbolat Tıleuhan bastaǧan top būl özgertulerdı teatr rejisserlarynyŋ oiyn tyŋdamastan qabyldap, direktorlardyŋ yǧyna jyǧyldy. Teatr direktory äkımşılık tarapty basqaratyn atqaruşy organ ekenı būrynnan mälım. Al bas rejisser mektebı teatr jüiesıne engelı berı teatrdyŋ şyǧarmaşylyq truppasynyŋ bolaşaǧy men onyŋ qabıletınıŋ ösıp örkendeuıne, sonymen qatar teatr repertuarynyŋ tolyqqandy körkem şyǧarmalarmen tolyǧuyna jauap beretın lauazym retınde qalyptasqan edı. Qazırgı taŋda būl lauazym qazaq teatryna kerek bolmai qaldy. «Köşedegı paqyrdy äkım bol dep şaqyrdy» degen küige enetın kezeŋ bastaldy. Men ondai direktorlardyŋ bırazyn kördım de. Endı sol lauazym iesınıŋ qūqy būrynǧydan da joǧarylady. Jäne zaŋdy türde. Rejisserdıŋ ünı öştı.

Sözdıŋ qadırın toidaǧy arzan sözdı asaba «şou­mender» de tüsırıp bıttı. Aiyna bırneşe toiǧa bas sūǧatyn qazaq ol jerden qandai söz tyŋdaidy? Bız osyǧan män bermeimız. Mıne, osy sebepterdıŋ bärı teatr sahnasyndaǧy mändı, maǧynaly tereŋ oily sözge kerı äserın tigızedı. Osy jerde oiyma Abai atamyzdyŋ audarmasyndaǧy Krylov myrzanyŋ «Būlbūl men esek» mysaly eske tüsedı. Sonda būlbūldyŋ äsem ünıne baǧa bergen esek: «Sen än aitudy äteşten üiren» deidı ǧoi. Qazırgı bızdıŋ qoǧamnyŋ beinesı osyǧan keledı. Būlbūldyŋ sairaǧan ünınen görı, qiqulap qiqyrǧan äteştıŋ ünıne qūmar bolyp baramyz.

– Bıluımşe, Reseide zaŋdylyq küşı bar «Teatr turaly» arnaiy ereje bar. Mıne sol erejede direktor men körkemdık jetekşı nemese bas rejisser degen lauazymdar nemen ainalysatyny anyq jazylyp, jık-jıkke bölıngen. Bızge de osy kerek şyǧar?

– Menıŋ de aityp otyrǧanym osy. Şyǧarmaşylyqpen, repertuarlyq saiasatpen, teatrdyŋ körkemdık deŋgeiın biık maqsattarǧa jeteleu, akter önerınıŋ şeberlıgın şyŋdau bas rejisserdıŋ nemese körkemdık jetekşınıŋ tıkelei mındetı ekenın myǧymdap jazyp qoiǧan. Sol körkemdık jetekşınıŋ nemese bas rejisserdıŋ közdegen maqsat-müddesın ıske asyru üşın jaǧdai jasau – direktor myrzanyŋ mındetı. Iаǧni, şyǧarmaşylyq topqa jaǧdai tuǧyzu äkımşılık tarapynda otyrǧan direktor bastaǧan qūramnyŋ negızgı maqsaty bolu kerek. Būl qyruar jūmys pen bılımdı talap etedı. Teatr önerınıŋ ekonomikasyn meŋgermegen maman teatrdyŋ ekonomikalyq tūrǧydan örkendep ösuın josparlai ala ma? Bılımı men mamandyǧy sai emes mamanǧa teatr basqarudy jükteu qylmyspen para par.

– Kezınde özıŋız eŋbek etken Aigül İmanbaevanyŋ muzykalyq teatry Makedoniiadaǧy teatr festivalınıŋ bas jüldesın jeŋıp aldy. Oǧan rejisser retınde sızdıŋ eŋbegıŋız ölşeusız boldy. Qazır būl «A.İ» teatry qaida? Jalpy, Qazaqstanda jeke teatrlar qanşalyqty ömırşeŋ bola alady? Olardyŋ aiaǧynan qaz tūryp qana qoimai, körermennıŋ süiıktı öner ordasyna ainaluyna qanşalyqty alǧyşarttar bar?

– Men Aigül İmanbaeva degen qyzymyzdyŋ közsız erlıgıne bas iem. Onyŋ qazaq teatrynyŋ tarihyna engızgen jaŋalyǧy üşın täntımın. Erlık emei nemene?Joq jerden öz qarajatyna jeke teatr aşu – būl közsız erlık. Aigüldıŋ ıstegen batyl qadamyna, müiızı qaraǧaidai elge tanymal akter aǧalarymyz nemese dramaturg myrzalar bara aldy ma? Teatr ūǧymyn el arasyna basqaşa qyrynan tanyta aldy ma? Barlyǧy tek memleket qoldau körsetken teatr ūjymdarynda ǧana qyzmet etıp, jeke dara teatr aşyp basyn auyrtqysy kelmeidı.

Al Aigül şet elde qazaq teatr önerınıŋ tuyn jelbıretıp, namysyn qorǧap, qazaq teatr önerınıŋ köptegen Europa elderınen biık tūrǧanyn däleldedı. Jan Anuidyŋ «Medeia» tragediiasy halyqaralyq teatr festivalderınde ekı märte bas jüldege ie bolyp, «Gran Pri» aluy – qaitalanbas tarihi oqiǧa. Evropa tamsandy,taŋǧaldy. Makedoniia memleketınıŋ aqparat közderı Aigül İmanbaeva oinaǧan «Medeia» spektaklın «teatr önerınıŋ gauhary» dep baǧalady. Söitıp qazaq teatrlaryna Aigüldıŋ teatry jol aşty.

Qazır būl teatr elordamyz Astanada. Jaŋa beleske engendei küi keşude. Memlekettık tūrǧydan tıkelei kömek körmegen jeke teatr ūjymy bolaşaqta sönıp te qaluy ǧajap emes. Aigül İmanbaeva qaşanǧy öz qarajatymen ömır sürsın?!Jeke teatrlarǧa da memlekettık subsidiia kerek-aq. Memleket qoldap, demep jatsa, jaŋa baǧyttaǧy, jaŋa formattaǧy teatrlar sany köbeierı sözsız. Äzırge olai emes. Mesenattar tapşy.

Teatrǧa tehnik mamandar jetıspeidı

– Älemdık teatr önerındegı qandai jaŋalyqtar bızge enbei jatyr?
– Eger teatrlardyŋ materialdyq tehnikalyq bazasy jūtaŋ bolsa, qandai jaŋalyq boluy mümkın? Materialdyq tehnikalyq baza nyǧaiǧan künde de ony meŋgerıp ketetın mamandar joqtyŋ qasy. Sondyqtan jaŋalyqtar engızu üşın aldymen tehnik mamandardy oqytyp, olarǧa jaǧdai jasaudy közdeitın baǧdarlama qabyldau kerek. Menıŋ aityp otyrǧanym – teatrdy jaryqpen, dybyspen qamtamasyz etıp, körkemdık därejege köteretın eŋ maŋyzdy mamandar. Bızdıŋ teatrlarda, äsırese, aimaqtyq teatrlarda, äzırge köbısı köşeden kelıp, öz jetkenımen jetkerıp jürgen mamandar legı qyzmet ısteidı. Olarǧa kınä taǧuǧa bolmaidy. Sebebı olar özınıŋ aldyndaǧy jyldar boiy körgen-bılgenımen qyzmet ıstegen mamandardan üirengenın aldyŋa tartady.
– Mümkındıgıŋız bolsa, Qazaqstannyŋ teatr salasyna qandai reforma jasar edıŋız?
– «Körkemdık keŋes» degen qoǧamdyq ūiymnyŋ közın tübegeilı joiar edım.
– Nege?
– Būl – akterge de, rejisserǧa da kömektespeitın ūiym. Endı köz aldyŋyzǧa elestetıp körıŋızşı, Mūhtar Äuezov myr­za qolyna qalam alyp «Abai jolyna» kırıskende bärımız otyryp alyp jan-jaqtan būlai emes, bylai jazu kerek desek, ol kısı sol romandy jaza alar ma edı? Oral Taŋsyqbaevqa surettı bylai salmaŋyz, bylai salyŋyz desek ne bolar edı? Mūhtar Şahanov «Tanaközdı» jazǧan sätınde onyŋ öleŋ joldaryn talqyǧa salsaq, qandai poema tuar edı. Şyǧarma ol jalǧyz adamnyŋ janynan tuatyn, şabytpen keletın erekşe qūbylys. Osyǧan bız män beruımız kerek. Keŋes däuırınde kırgen «keŋes» qazırgı taŋda kerek pe? Ol «keŋes» suretkerge senımsızdık ūialatady.

Keŋestıŋ keŋesıne jügıngen akter de, rejisser de özındık dara oiynan aiyrylyp, boiyna senımsızdık ūialauy ǧajap emes. Keŋes şyǧarmaşylyqqa kedergı. Eger eldıŋ keŋesın tyŋdasa, Salvador Dali, Pikasso, Repin, Puşkin, Dostoevskii, Äuezov, Müsırepov syndy daryndar bolar ma edı.

Keŋestıŋ arqasynda qanşama daryndar näubet jyldary ömırımen qoştasty. Şyǧarmaşylyqtan tüŋılıp qūrdymǧa kettı. Bükıl älemde joq keŋesu bızdıŋ qazaq teatrynda qaita jandana bastady. Jauapty qūjattardy direktor myrza sol keŋeske jügıne otyryp qol qoiudy ädetke ainaldyryp aldy. Keŋeske jügıngen direktorǧa tiımdı. Qūjattan qate ketse, «Men ony keŋestıŋ şeşımımen qabyldadym» dep jauapkerşılıkten taiqu oŋaiǧa ainalady. «Körkemdık keŋes» – qazırgı uaqytta direktordyŋ qolşoqpary. Onyŋ sözın söileitın adamdardy özı taǧaiyndaǧannan keiın körkemdık keŋesten ne sūraisyz? Sondyqtan būl ūiymdy tübegeilı joiu qajet. Rejisser men akterge senım artu kerek.

Sūhbattasqan:
Güljan RAHMAN