Serık JAQSABAEV, «Astana-vetservis» şaruaşylyq jürgızu qūqyǧyndaǧy kommunaldy memlekettık käsıporynnyŋ direktory: QŪTYRMA AURUYNAN TEGIN QŪTQARAMYZ
BAQ-tan, el arasynan, ekeuara äŋgımelerden qaŋǧybas itter men mysyqtardan zardap şekken tūrǧyndar jaily jiı bolmasa da, aragıdık estıp qalatynymyz bar-dy. Sonymen qatar elordalyqtar arasynda da üi januarlaryn ūstap, baǧatyndar jeterlık. Al olardy egıp, baqylaityn arnaiy mekeme uaqyttyŋ sūranysy ekenın osy künge deiın sezetınbız. Köpşılık tılegı basşylyqtyŋ qūlaǧyna jettı. Astana äkımdıgınıŋ qoldauymen şahar aumaǧynda veterinarlyq-sanitarlyq qauıpsızdıktı jäne epizotiialyq qalypty jaǧdaidy saqtau maqsatynda «Astana-vetservis» şaruaşylyq jürgızu qūqyǧyndaǧy kommunaldy memlekettık käsıporny qūryldy. «Jedelsöz» aidarynyŋ bügıngı qonaǧy – jaŋa esıgın aşqan mekemenıŋ direktory Serık Jaqsabaev. Äŋgıme barysy «Astana-vetservistıŋ» atqaratyn qyzmetı töŋıregınde örbıdı.
Serık Orazalūly, aldymen qyzmetterıŋızdıŋ negızgı türlerıne toqtalsaŋyz.
– Qala bolǧan soŋ, türlı januarlardy baǧyp-qaǧatyndar bar. Al mūndai ortada bızdıŋ qyzmettıŋ keregı äldeqaşan baiqalǧan. Endı qyzmet türlerımızge toqtalsaq, üi jäne auyl şaruaşylyq januarlaryn vaksinasiialau arqyly maldardyŋ asa qauıptı jäne enzootikalyq aurularyna qarsy veterinarlyq şaralar ötkızemız. Sonymen qatar qaŋǧybas itter men mysyqtardy aulap, joiu da mındetımızde. Auylşaruaşylyq januarlaryn bırdeilendırudı ötkızu de bızdıŋ qūzıretımız bolyp sanalady.
Qūtyrma auruyna şaldyqqandar da tabylady qaladan. Onyŋ sebebın neden ızdeimız?
– Astana aumaǧy keŋeigen saiyn, Aqmola oblysynyŋ jaqyn territoriialarynan qonys audaruşylar qatary artqanyn bılemız. Būl qarausyz itter men mysyqtar sanynyŋ köbeiuıne äkelıp soqtyrdy. Osynyŋ saldarynan, iaǧni, qarausyz itterdıŋ qabuynan, tısteuınen zardap şekkender älgı atalǧan auruǧa tap bolady. Ondai nauqastar qatary bügınde rasynda ösken. Al qūtyrma – jūqpaly. Osy oraida, aita keteiın, üi januarlaryn qūtyrmaǧa qarsy vaksinasiialau bızdıŋ mekemede aqysyz negızde ötkızıledı.
Elordalyqtarǧa qyzmet körsetu maqsatynda aşylǧan mekemenıŋ basşysy retınde oqyrmandardan sūranaryŋyz bar ma?
– Älbette, qala tūrǧyndarynan 2007 jyly mäslihat şeşımımen bekıtılgen itter men mysyqtardy ūstau erejesın saqtaudy, mal emdeitın emhanalarda januarlaryn tırkeudı jäne uaqytynda vaksinasiia aludy sūraimyn. Sonymen qatar qarausyz qalǧan januarlardy anyqtai qalsaŋyz, bızdıŋ mekemenı qūlaqtandyryŋyz. Vaksinasiia, aulau boiynşa qyzmettı şaqyru jäne basqa da mäseleler boiynşa 44 57 17, 44 57 22 telefondary tegın qyzmet körsetedı.
