Memleket basşysy Qasym-Jomart Toqaev Aşhabadqa memlekettık sapary barysynda Türıkmenstan Prezidentı Gurbanguly Berdımūhamedovpen kelıssöz jürgızdı. Kelıssözderge deiın Täuelsızdık alaŋynda saltanatty türde resmi qarsy alu şarasy öttı. Qūrmet Qarauylynyŋ bastyǧy ekı el basşylaryna raport berıp, Qazaqstan men Türıkmenstannyŋ Änūrandary şyrqalǧannan keiın Qasym-Jomart Toqaev pen Gurbanguly Berdımūhamedov bır-bırıne resmi delegasiialardyŋ qūramyn tanystyrdy.
Saltanatty räsımnen keiın şaǧyn qūramda kezdesu boldy. Memleketter basşylary saiasi, sauda-ekonomikalyq, kölık-tranzit jäne mädeni-gumanitarlyq salalardy keŋeituge erekşe köŋıl böle otyryp, qazaq-türıkmen strategiialyq serıktestıgınıŋ auqymdy mäselelerın talqylady. Sonymen qatar jahandyq jäne aimaqtyq kün tärtıbındegı problemalar qarastyryldy.
Qazaqstan Prezidentı bauyrlas Türıkmenstanǧa memlekettık saparmen keluge şaqyrǧany üşın Gurbanguly Berdımūhamedovke rizaşylyǧyn bıldırdı. «Qasiettı türıkmen topyraǧyna tabanymyz tigen sätten şynaiy nietterıŋızdı körıp, boiymyzdy erekşe sezım biledı. Ädemı Aşhabad qalasyna taǧy da kelgenıme quanyştymyn. Qalalaryŋyzdaǧy qūrylystyŋ auqymy men sapasy bızdı taŋ qaldyrdy. Saparǧa keletın bolsaq, bız būǧan öte tyŋǧylyqty daiyndaldyq. Menımen bırge Qazaqstan Respublikasy negızgı vedomstvolarynyŋ basşylary da keldı. Bız memleketterımız arasyndaǧy strategiialyq serıktestıktıŋ odan ärı damuyna tyŋ serpın berıledı dep senemız. Türıkmender – bızge bauyrlas halyq. Halyqtarymyz arasyndaǧy dostyqtyŋ tamyry tereŋde. Köp närse bızge ortaq. Būl ortaq şekaramyzǧa da qatysty. Bauyrlas Türıkmenstan halqyna degen nietımız taza. Strategiialyq serıktestıktı damytu, memleketterımız arasyndaǧy yntymaqtastyqty nyǧaitu mäselelerı – jeke baqylauymda. Būl – bızdıŋ saiasatymyzdyŋ basym baǧyty. Osy sapar barysynda yntymaqtastyǧymyzdyŋ baǧytyn aiqyndaityn asa maŋyzdy qūjattarǧa qol qoiylady dep oilaimyn. Bız būrynǧyşa halyqaralyq arenadaǧy belsendı yntymaqtastyǧymyzdy jalǧastyra beremız. Kezınde BŪŪ Bas Assambleiasy maqūldaǧan Türıkmenstannyŋ beitarap el märtebesıne Qazaqstan zor qūrmetpen qaraidy» dedı Qasym-Jomart Toqaev.
Gurbanguly Berdımūhamedov özınıŋ şaqyruyn qabyl alyp, Türıkmenstanǧa saparmen kelgenı üşın Qasym-Jomart Toqaevqa alǧys aitty.
