Qazırgı taŋda sporttyŋ aluan türı būqaraǧa mälım. Erejelerı ärtürlı bolǧanymen maqsaty jeŋıs bolatyn är sporttyŋ özınıŋ janküierlerı bar. Qūqyq qorǧau organdary men äskerilerge, qūtqaruşylarǧa arnalǧan sport bar. Bügın bız tılsız jaudy tızgındep, ūtqyr qimyl arqyly qūtqaruǧa baǧyttalǧan ört söndıru-qūtqaru sporty turaly aitpaqpyz.
Qazaqstan Respublikasynyŋ Tötenşe jaǧdailar ministrlıgıne qarasty aumaqtyq departamentte atalmyş sport boiynşa arnaiy jasaq bar. Olar öz elımızde jäne şetelderde namysty qorǧap, naǧyz qūtqaruşy degen atqa laiyqty bolu jolynda atoi salyp jür. Sonyŋ bırı – Nūr-Sūltan qalasy Tötenşe jaǧdailar departamentıne qarasty sport jasaǧy.
Olar bas qaladaǧy Tötenşe jaǧdailar ministrlıgınıŋ «Qūtqaruşy» sport keşenınde bekıtılgen kestege säikes daiyndyqtan ötıp tūrady. Tynymsyz eŋbek pen tyŋǧylyqty jattyǧu öz nätijesın beredı. Ötken jyldyŋ aqpanynda Nūr-Sūltan qalasynda erler arasynda ört söndıru-qūtqaru sporty boiynşa Qazaqstan Respublikasynyŋ XXIX qysqy chempionaty, VII qysqy äielder men VI qysqy jasöspırımder arasynda chempionat ötkızılgen.
Chempionatta barlyǧy 18 komanda (oblystar men qalalardyŋ 17 komandasy, sondai-aq Kökşetau tehnikalyq instituty) keldı, oǧan 18 erler, 8 äielder jäne 11 jasöspırımder komandasy qatysqan.
Jarys ört-qūtqaru sportynyŋ ekı baǧyty boiynşa öttı: Oqu mūnarasynyŋ terezesıne şabuyl satysymen köterılu jäne 100 metrlık kedergılerı bar jolaqtan ötu. Jalpykomandalyq qorytyndy esepte bas qalanyŋ äielder qūrama komandasy Ört söndıru-qūtqaru sporty boiynşa Qazaqstan Respublikasynyŋ chempiony atandy. Mūndai jeŋıs joly jyl boiy jalǧasqan.
Al 2021 jyldyŋ 2-4 jeltoqsanynda elordalyq TJD Täuelsızdıktıŋ 30 jyldyǧyna orai soltüstık öŋırlerdegı departamentter arasynda «Soltüstık kubogyn» ötkızgen. Jarys qorytyndysy boiynşa alaŋ ielerı komandalyq esepte bırınşı oryn alǧan. Aqmolalyq jäne qaraǧandylyq komanda ekınşı, üşınşı oryndy enşılegen.
Biylǧy ört söndıru-qūtqaru sporty boiynşa qysqy chempionat Şyǧys Qazaqstan oblysynda ötken bolatyn. Oǧan oblystardan, respublikalyq maŋyzy bar qalalardan jäne elordadan 400-den astam sportşy jüzden jüirık atanu üşın baǧyn synaǧan. Chempionattyŋ bırınşı künı qatysuşylar oqu mūnarasynyŋ tık qabyrǧasyna şabuyl jasady. Onda jas erekşelıkterı boiynşa ekınşı, üşınşı jäne törtınşı qabattyŋ terezesıne şabuyl satymen köterıldı. Alǧaşqy minuttardan bastap-aq elordalyq komanda jarysta belsendılık tanytqan.
Atalǧan doda aqpan aiynyŋ 23 künı bastalyp 3 künge sozylǧan. Alǧaşqy künı Nūr-Sūltan qalasynyŋ TJD sportşylary komandalyq esepte 3-oryn ielengen. Al elordalyq näzık jandylar komandasy bırınşı orynǧa ie boldy. Jekelei jarysta erlerden Dmitrii Snegirev, äielder arasynda Kristina Bulykina syndy astanalyq sportşylar jeŋıs tūǧyrynan körındı.
Ört söndıru-qūtqaru sporty – ört söndıruşılerdıŋ jauyngerlık äzırlıgın arttyratyn jäne ört söndıru täjıribesınde qoldanylatyn qoldanbaly sport türı. Ūzyndyǧy – 4 metr, salmaǧy 8,5 kelı bolatyn satymen bırneşe sekund ışınde oqu mūnarasynyŋ törtınşı qabatynda köterılu üşın köz ılespes jyldamdyq, şymyrlyq häm şiraqtyq kerek.
Özındık erekşelıgı bar ört-söndıru qūtqaru sporty osyndai.
Äsiia NŪRBEKQYZY
