Biyl būl mereke elımızde ekınşı ret atalyp ötkelı otyr. Byltyr el Parlamentı osyndai şeşım qabyldaǧan bolatyn. Sebebı, täuelsız Qazaqstannyŋ ırgetasyn qalap, şekarasyn şegelep, bolaşaqqa baǧyt-baǧdar bergen Tūŋǧyş Prezidenttıŋ halyq aldyndaǧy eŋbegı ūşan-teŋız. Oǧan tömendegı astanalyqtar pıkırı de dälel.
Süiındık JŪMAǦŪLOV, Astana qalasy Ädılet departamentı bastyǧynyŋ orynbasary:
– Elımızde ekınşı ret toilanǧaly otyrǧan būl merekenıŋ tarihi maŋyzy orasan zor. Öitkenı, Elbasynyŋ saliqaly saiasatynyŋ arqasynda täuelsız Qazaq elı qalyptasyp, tarihymyz tügendelıp, tılımız, dınımız jäne dılımız qaita oralyp, memleketımızdıŋ ūlttyq rämızderı qabyldandy. «Qazaqstan Respublikasynyŋ memlekettık täuelsızdıgı turaly» Qazaqstan Respublikasynyŋ Konstitusiialyq zaŋy 1991 jyly 16 jeltoqsan künı qabyldandy. Osy zaŋ negızınde elımız özınıŋ Täuelsızdıgın jariia ettı. Bügınde tūŋǧyş Prezidenttıŋ arqasynda törtkül dünie Qazaqstandy tanydy, moiyndady. Qazaq elınıŋ tuy kökke köterılıp, abyroiy asqaqtady. Osyndai aituly kün qazaq halqynyŋ memleket bop qalyptasuynyŋ maŋyzdy kezeŋın aiqyndaidy. Sondyqtan, täuelsızdık tuy ärdaiym biıkte jelbırei bersın!
Qarlyǧaş ŞAHMANOVA, Astana qalasy Basqaru kolledjınıŋ direktory:
– Tūŋǧyş Prezident künın jeke basqa qatysty mereke dep sanamaimyn. Öitkenı, osydan jiyrma ekı jyl būryn, iaǧni 1991 jyly täuelsızdıgın jaŋa ǧana alǧan egemendı elımız üşın būl bır erekşe tebırenıske toly airyqşa aişyqty kün.
Qazaqstan halqy Nūrsūltan Äbışūly Nazarbaevqa taǧdyryn tabystap, el tızgının senıp ūstatyp, senım artty. Būl rette Memleket basşysynyŋ eldı damytu men örkendetu jolynda tökken terı, jūmsaǧan qajyr–qairaty, sıŋırgen eŋbegı ölşeusız.
Maqsat MOMYNOV, Astana qalasyndaǧy №51 mektep-gimnaziiasy tarih pänınıŋ mūǧalımı:
– Küntızbedegı jeltoqsannyŋ 1-ı men üşın özgeşe. Olai bolatyn sebebı, būl – menıŋ tuǧan künım. Jyl saiyn osy kündı özımnıŋ düniege kelgen künım dep qana qabyldap kelsem, byltyrdan berı memlekettık mereke retınde de atap ötudemız
Bız bügınde täuelsız Qazaqstannyŋ alǧaşqy jetıstıkterın elımızdıŋ tūŋǧyş Prezidentı Nūrsūltan Äbışūly Nazarbaevtyŋ esımımen bailanystyryp jürmız. Ärine, onymyz oryndy. Bıraq, osyǧan etımızdıŋ üirenıp ketkendıgı sonşalyq, onyŋ tüp törkınıne ärdaiym jıtı köz jıbere bermeimız.
Bügıngı igılıkterımızdıŋ bärın özdıgınen jüzege asqandai qabyldaimyz. Osynyŋ ar jaǧynda erek tūlǧanyŋ kün-tün qatyp, janyn jep jürıp atqarǧan jūmysy, ūlan–ǧaiyr ūiymdastyruşylyq ısterı tūrǧanyn eskere bermeitın sekıldımız. Mūny qalyŋ jūrtşylyqpen bırge, äsırese, keiıngı tolqyn – jastar jaǧynyŋ da jaqsyraq bılıp, sezınıp öskenderı jön. Sondyqtan, Tūŋǧyş Prezident künın atap ötıp otyrudyŋ taǧylymy mol.
Gülbarşyn ÖKEŞQYZY