Keşe elordada Qazaqstannyŋ şeteldegı studenttık ūiymdarynyŋ IV sletı bastaldy. Şaraǧa älemnıŋ 16 elınen 250-den asa student keldı.
Slet «Bolaşaq» qauymdastyǧy, «Jas Otan» jastar qanaty jäne QR Bılım jäne ǧylym ministrlıgınıŋ qoldauymen ötıp jatyr. Ūlybritaniia, Kanada, Germaniia, Fransiia, İspaniia, Vengriia, Malaiziia jäne basqa elderden kelgen qatysuşylar aldymen studenttık ūiymdardyŋ atqarǧan jūmystarymen tanysty. Şaranyŋ plenarlyq bölıgın «Bolaşaq» qauymdastyǧynyŋ müşesı, «Nūr Otan» partiiasy qoǧamdyq saiasat institutynyŋ direktory Saiasat Nūrbek jürgızdı. «Bızder, «Bolaşaq» baǧdarlamasynyŋ tülekterı, özımızge artylǧan zor jauapkerşılıktı sezıne bıluımız qajet. Bügınde baǧdarlamanyŋ 8 jarym myŋnan astam tülegı bar. Bıraq, olardyŋ arasynda jeke käsıp bastauǧa ūmtylatyndary az eken. Jastardyŋ tek konsalting, memlekettık jäne jergılıktı basqaru salasyna qyzyqpai, biznes salasyna da nazar audarǧany jön» dedı Saiasat Nūrbek.
Al, «Bolaşaq» qauymdastyǧy keŋesınıŋ töraǧasy Quandyq Bişımbaev qatysuşylarǧa jas mamandardy qoldauǧa baǧyttalǧan baǧdarlamalar men baiqaular turaly maǧlūmat berdı. «El arasynda «qazır jastardyŋ köpşılıgı memlekettık qyzmetke ūmtylady» degen qasaŋ stereotip bar. Bıraq, men jeke sektorda da jemıstı eŋbek etıp jürgen jastardyŋ köp ekenın aitqym keledı. «Bolaşaq» qauymdastyǧy jas käsıpkerlerdı qoldau maqsatynda türlı start-ap jobalardy qolǧa aldy. Jaqyn arada biznes-keister jinaǧy jaryqqa şyǧady. Onda jekelegen kompaniialar men qauymdastyqtardyŋ ökılderı öz täjıribelerımen bölısedı. Sondai-aq, soŋǧy jyldary «Bolaşaq» älemdık blokbasterlerdı qazaq tılıne audaryp, körermenge ūsynyp jatyr. Būl qauymdastyqtyŋ taǧy bır igı bastamasy dep bılemın» deidı Quandyq Uälihanūly.
Plenarlyq otyrysta jastar saiasatyn ıske asyru mäselelerı men «EXPO-2017» körmesınıŋ jastarǧa arnalǧan jaŋa mümkındıkterı de aityldy. Al, bügın şara qonaqtary Qazaq gumanitarlyq-zaŋ universitetınde ūiymdastyrylǧan biznes-treningterge qatysyp jatyr. Slettı keşke «Pecha Kucha Night Astana» konferensiia formatyndaǧy kezdesu qorytyndylaidy.
Roza ÄREN
