Elordadaǧy Säken Seifullin mūrajaiynda Abai künıne jäne Şäkärım Qūdaiberdıūlynyŋ 165 jyldyǧyna orai «Abai men Şäkärım» körmesı aşyldy. Sondai-aq Halyqaralyq jastar künıne arnalǧan «Bolaşaqqa ümıt, jastarǧa senım» atauymen kezdesu öttı.
Körmenıŋ aşyluynda Abai men Şäkärımnıŋ tuystyq qatynasy men bailanysy turaly äŋgımelendı. Abaidyŋ aǧasy Qūdaiberdıden tuǧan Şäkärım jetı jasynda jetım qalyp, atasy Qūnanbaidyŋ tärbiesınde bolǧan. Şäkärım jetımdık tauqymetın tarta qoimaǧan. Atasy onyŋ köŋılıne qaiau tüsırmei, betınen qaqpai erkeletıp ösırdı. Ol jönınde aqyn özınıŋ «Mūtylǧannyŋ ömırı» atty eŋbegınde jazyp ketken. Şäkärımnıŋ öleŋge degen zerektıgın baiqaǧan Abai öz qamqorlyǧyna aldy.
Şäkärımnıŋ özı keiinirek bylai dep jazdy: «Äkemızdıŋ bır şeşesınen tuǧan İbrahim myrza, qazaq ışınde Abai dep ataidy, sol kısı mūsylmanşa häm orysşa ǧylymǧa jüirık häm Allanyŋ bergen aqyly da būl qazaqtan bölek dana kısı edı, erjetken soŋ sol kısıden taǧylym alyp, ärtürlı kıtaptaryn oqyp, nasihatyn tyŋdap, az ǧana ǧylymnyŋ säulesın sezdım».
Kezdesu qonaqtary bolǧan «ALJİR» memorialdy-mūrajai keşenı mamany Qaiyrjan Küzembaev pen maman-ädısker Qairat Şaǧiev jüzdesudı Abaidyŋ «Men eskınıŋ soŋy edım, Ol bolaşaqtyŋ basy edı» jäne «Sen de bır kırpış düniege, ketıgın tap ta, bar qalan!» dep tūzdyqtap, hakım jastarǧa jol sıltegenın aitty.
