МАҚТЫМҚҰЛЫ – ТҮРКІ ЖҰРТЫНЫҢ МАҚТАНЫШЫ
Бұрнағы күні Л.Гумилев атындағы Еуразия ұлттық университетінде «Мақтымқұлы және дәстүрлі түркі поэзиясы» тақырыбында конференция өтті. Түркі академиясы ұйымдастырған бұл шара түркіменнің ұлы ақынының 290 жылдығына арналған. Басқосуға түркі тілдес елдердің елшілері, мемлекет және қоғам қайраткерлері, сенат және мәжіліс депутаттары, сондай-ақ, көрнекті жазушылар, ғалымдар қатысты.
Конференцияны Қазақстанның Еңбек Ері Әбіш Кекілбаев құттықтау сөзбен ашты. Халық жазушысы бұл жиын екі ел арасындағы рухани-адамгершілік негіздерді нығайта түсетінін айтып, Мақтымқұлы шығармаларын кеңінен таратып, жастардың бойына сіңіру қажеттігін баса айтты. «Шығыс поэзиясының жарық жұлдызы Мақтымқұлы Пырағы тек түркімен халқының ғана мақтаны емес, түгел түркінің тегеуірінді ақыны һәм ортақ жауһары» деген Ә.Кекілбаев сөзінің соңында түркімен тілінен өзі тәржімалаған Мақтұмқұлының «Мызғымас ел» дейтін өлеңін оқып берді.
Отырыс барысында Түркіменстанның Қазақстандағы төтенше және өкілетті елшісі Мақтымқұлы Ақмырадов, Қазақстан Жазушылар одағының төрағасы, сенат депутаты Нұрлан Оразалин, «Егемен Қазақстан» республикалық газетінің президенті Сауытбек Абдрахманов, Түркі кеңесі ақсақалдар кеңесінің төрағасы Әділ Ахметов, Президент баспасөз қызметі жетекшісінің орынбасары Бауыржан Омаров, түркітанушы Шәкір Ыбыраев, түркіменстандық ғалым Аннагурбан Аширов баяндама жасады.
Осыған дейін «ТҮРКСОЙ» халықаралық ұйымы түркі халықтарының ұлы тұлғаларына арналған «Мақтымқұлы» медалін әзірлеген екен. Жиында осы сыйлықтың алғашқысы түркі тілдес халықтардың әдебиетін әлемге танытып, қазақ-түркімен ынтымақтастығына үлес қосқаны үшін Әбіш Кекілбаевқа берілді.
Жиында арнаулы қарар қабылданып, Мақтымқұлының әндері шырқалды.
Сәния СПАНДИЯР