Балалар арасында өткен «Memoriad Las-Vegas-2016» (WORLD KIDS CUP) халықаралық олимпиадасының жеңімпазы, 27 елден келген қарсыластарынан алға шығып, дара көрінген дарынды бала Мәди Ердәулетті Астана қалалық Білім басқармасының басшысы Қасымхан Сенғазыев құттықтап, оған планшет сыйлады.
Бүгінде Мәди Ердәулет елордадағы №54 мектеп-лицейінің 4-сыныбында оқиды. Өз қатарының алды атанған бала оқуға да жүйрік. Әсіресе, математика пәнінің күрделі есептеріне қамшы салдырмайды. Айта кетейік, биылғы «Memoriad-2016» халықаралық зияткерлік олимпиадасы Лас-Вегаста өтті. Мәди Ердәулет «Ментальді арифметика мегасы» бойынша ІІ республикалық олимпиадасының жеңімпазы атанып, өткен маусымда халықаралық олимпиадаға жолдама ұтып алған болатын. Мәдимен бірге командада Алматыдан Марғұлан Байжақып (жалпы есепте 10-орында), Степногордан Әзиз Камелиден (21-ші) және Астанадан Далила Сақанов болды.
«Memoriad» есепті ойша шығару және жылдам оқу бойынша дүниежүзілік олимпиада саналады. Ол осындай жарыстарға арналған әлемдегі жалғыз білім сайысы десек болады. Әлемнің 148 елінде тіркелген. Олимпиада төрт жылда бір рет өтеді.
Сонымен, осындай жаһанның ең дарынды деген балалары бас қосқан білім бәйгесінен маңдайы жарқырап, қазақ баласының озып келуі – бөркімізді аспанға атып, қуанарлық жағдай. Алдағы таңда Мәдиге жаңа жеңістер тілейміз!
Азамат ЕСЕНЖОЛ
