Мерейтойлық шаралар бекітілді
Жақында Қазақстан Республикасының Мемлекеттік хатшысы Г.Әбдіқалықованың төрағалағымен Қазақстан халқы ассамблеясы жылын ұйымдастыру және өткізу жөніндегі мемлекеттік комиссиясының кеңейтілген отырысы өтті.
Кеңес жұмысына Мемлекеттік комиссияның мүшелері, Парламент депутаттары, мемлекеттік органдардың өкілдері, республикалық этномәдени бірлестіктердің басшылары, ҚХА ғылыми-сараптамалық кеңесінің мүшелері, бұқаралық ақпарат құралдарының өкілдері қатысты.
«Біз бүгін Елбасының 2014 жылғы 29 тамыз күнгі Жарлығымен жарияланған 2015 – Қазақстан халқы ассамблеясы жылын ұйымдастыру және өткізу жұмысын үйлестіруші кеңесші орган – Мемлекеттік комиссияның алғашқы отырысында бас қосып отырмыз. Осы комиссияның кеңесіп қабылдаған шешімдері, тиімді ұсынымдары еліміз үшін, Қазақстанның әлемдік өркениеттегі беделін арттыру үшін маңызды да жауапты жылға арналған шаралардың мағыналы, сапалы өтуіне өз үлесін қосады деп сенемін» деді Мемлекеттік хатшы Гүлшара Әбдіқалықова жиналған қауым алдында.
Жиын барысында 2015 жылға межеленген Қазақстан халқы ассамблеясы жылын ұйымдастыру және өткізу жөніндегі ұлттық іс-шаралар жоспарын іске асыру, Қазақстан Республикасы Конституциясының 20 жылдығына арналған іс-шараларды ұйымдастыру бойынша дайындық мәселелері қаралды.
Мемлекеттік комиссияның мүшелері Қазақстан халқы ассамблеясы жылын өткізу тұжырымдамасын, Қазақстан халқы ассамблеясы жылының эмблемасының (логотип) және мерейтойлық медаль эскиздерінің үлгілерін бекітті.
Сонымен қатар, ҚР Конституциясының 20 жылдығын, Қазақ хандығының 550 жылдығын, Жеңістің 70 жылдығын қоса алғанда, 2015 жылға арналған мерейтойлық іс-шаралардың жоспарларын іске асыру бойынша мемлекеттік органдардың жұмысын үйлестіру және өзара іс-қимылдарын ұйымдастыру мәселелері талқыланды.
Айгүл УАЙСОВА