Шығармашылықты шыңдаған «шаттық»
Конгресс-холл сарайында балалар мен жасөспірімдер арасындағы «Шаттық-2016» шығармашылық фестивалінің гала-концерті өтті. Оныншы мәрте өткізілген шара биыл Қазақстан Тәуелсіздігінің 25 жылдығына арналды.
Байқау Дельфий ойындарының бағдарламасы бойынша өтетіні белгілі. Ал ол дегеніміз – фестиваль халықтық және классикалық жанрдан бастап, заманауи жанрға дейін өнердің сан алуан салаларын қамтиды. Конкурс 8 жанр негізінде 15 номинация бойынша ұйымдастырылды. Олар – жеке және ансамбльдік аспапта орындау, классика, халық аспаптары, хор, эстрадалық ән, вокалдық ансамбль, халық әні, халық биі, қазіргі би, поэзия, театр, фотосурет, бейнелеу, соны жанр және киім дизайны. Соңғы екеуі бағдарламаға алғаш рет енгізілді. Бұл туралы М.Өтемісұлы атындағы Оқушылар сарайының директоры Вадим Моторин мәлімдеді. Оның айтуынша, биылғы «Шаттық» осы және басқа да өзгерістерімен ерекше. «Жеңімпаздарға дәстүрлі медальдардың орнына мерейтойлық мүсіндер берілмек. «Соны жанр» номинациясында паркуршылар, акробаттар, гимнасттар өз өнерін көрсетуге дайын. Ал «Киім дизайнында» сән әлемінің сырына қанық талапкерлер бәсекеге түседі. Жаңа номинациялар бойынша жиырма бестен астам өтініш қабылданды» деді ол.
Салтанатты марапаттау рәсімін ашқан Астана қаласы әкімінің орынбасары Ермек Аманшаев алғашқы «Шаттық» байқауынан алған әсерін есіне алды.
– Осыдан он жыл бұрын фестиваль тұңғыш рет ұйымдастырылды. Он жылдың ішінде қаламыздың қаншама жас өнерпаздары фестивальге қатысып, үлкен өнер жолына жолдама алды. Ағайынды Жүгінісовтер сол кезде сахна төріне шығып, барлығымызды ерекше таңғалдырған болатын. Қазіргі таңда олардың қазақ эстрадасында өзіндік орны бар. Меніңше, «Шаттық» әлі де көптеген жұлдыздың бағын жандырады. Фестиваль ерекше құбылысқа айналды. Елорданың білім беру саласына да, мәдениет саласына да елеулі өзгерістер алып келді, – деді.
Өткен жылдардағы байқау жеңімпазы қала әкімінің орынбасарына фестивальдің дамуына қосқан елеулі үлесі үшін «Шаттық-10 жыл» мерейтойлық құрмет медалін табыстады.
Жас дарындар, шынымен де, көрерменге шаттық сыйлады. Сахна төрінде ән шырқалып, қыздар мың бұрыла би биледі. №37, №64 мектептің домбырашылар ансамблі көрерменді күмбірлеген күйге бөледі. «Зерде» мектебінің әншісі Ақкербез Тілеубекова вокалдық қабілетімен ерекшеленсе, №68 және №37 мектеп оқушылары Рауан Әдетхан мен Әмина Рахимова аспаптық ансамбль құрды. Концерт барысында №32 мектеп шәкірті Мирас Сартманов флейтаны сызылта тартса, №60 мектеп оқушысы Жәмилә Тілеуқұл пианиноның құлағында ойнады. Тәлімгерлер арасында «Астана Операның» болашақ жұлдыздары бар болып шықты. №50 мектепте оқитын Нұрғиса Әбдімомын №30 мектеп-гимназиясының хор ұжымымен өз партиясын сәтті орындап шықты. Олармен бірге №3 мектеп-гимназиясының хореографиялық ұжымы өнер көрсетті. Жеңімпаздар тізімінен аталған балалардың есімін кездестіруге болады.
Конкурсқа 5000-нан астам үміткер қатысты. Олардың 200-ден астамы күміс және қола мүсіндермен марапатталды. Ал 33 жүлдегерге алтын мүсіндер табысталды. «Соны жанры» бойынша №77 мектеп-гимназиясының клоундар театры және №14 орта мектеп оқушысы Шержон Рашитовтың өнері жоғары бағаланды. Айрықша киім дизайнымен менеджмент және бизнес колледжінің студенті Назерке Тайшыбаева ерекшеленді, сондай-ақ, №54 мектеп-гимназиясының шәкірті Дана Сариева мамандардың жоғары бағасын алды. №56 мектеп-лицейінің тәлімгері Аружан Дарханбаева мен №4 мектеп-гимназиясында оқитын Азат Балташтың суреттері фотоөнеріне қойылатын талаптарға сай болып танылды. №71 мен №63 мектеп-лицейлерінің оқушылары Әлия Айтжанова мен Лаура Қарамысова бейнелеу өнерімен тамсандырды. №54 мектеп-гимназиясының қойылымы сәтті шығып, №48 мектеп-лицейдің оқушысы Болат Ибраевтың актерлік шеберлігі үздік атанды.
Гүлдана ТАЛҒАТҚЫЗЫ,
astana-akshamy.kz