Өнер орталығына айналады
Бүгін елордада қала әкімі Бақыт Сұлтанов 2 маусым мен 10 тамыз аралығында өтетін халықаралық Astana Art Show заманауи өнер фестивалінің арт-директоры және жетекшісі Жером Санспен кездесті.
Шаһар басшысы заманауи суретшілер форумын өткізуге жан-жақты көмек көрсететінін айтты. Көрме екі алаңда – Бейбітшілік және келісім, Тәуелсіздік сарайларында өтеді. Ол 15 елдің 40-қа жуық суретшісінің басын қоспақ. Сондай-ақ өнер фестивалі аясында «Бірінші байланыс» жастар көрмесі мен халықаралық Racing the Galaxy көрмесі де ұйымдастырылады.
«Бұл жоба екінші жыл жұмыс істеуде. Біздің басты мақсатымыз – қазіргі заманғы өнер көрсететін дарынды суретшілерді бір алаңда жинау. Astana Аrt Show-2019 барлық суретшілерге тән номадизм мен еркіндік рухын паш етеді» деді Artios және TSE Art Destination галереясының негізін қалаушы Дина Байтасова.
«Бірінші байланыс» жастар көрмесінде отандық 22 жас суретшінің жұмыстары ұсынылады. Ал Racing the Galaxy көрмесінде танымал қазақстандық өнер иелерімен қатар шетелдік суретшілердің жұмыстарын да көруге болады. Көрме аяқталғаннан кейін жұмыстардың басым бөлігі мұражайларға берілсе, арт-инсталляциялар мен мүсіндер қала көшелерінде орналастырылатын болады.