МЕМЛЕКЕТ БАСШЫСЫ НҰРСҰЛТАН НАЗАРБАЕВТЫҢ ЖАРЛЫҒЫНА СӘЙКЕС, 2003 ЖЫЛДАН БЕРІ МАУСЫМ АЙЫНЫҢ ҮШІНШІ ЖЕКСЕНБІСІ ДӘРІГЕРЛЕРДІҢ ТӨЛ МЕРЕКЕСІ РЕТІНДЕ АТАЛЫП ӨТІЛЕДІ. ОСЫҒАН ОРАЙ, ОҚУШЫЛАР САРАЙЫНДА МЕДИЦИНА ҚЫЗМЕТКЕРЛЕРІНІҢ КӘСІБИ МЕРЕКЕСІНЕ АРНАЛҒАН САЛТАНАТТЫ ШАРА ӨТТІ.
Салтанатты шараға Денсаулық сақтау министрі Елтай Біртанов пен Астана қаласының әкімі Әсет Исекешев қатысты. Қала басшысының айтуынша, бүгінгі таңда Астанадағы 37 медициналық мекемеде 3606 дәрігер және 6579 орта топ қызметкері еңбек етеді. Міне, осы қызметкерлердің ішінде ең үздік мамандар құрмет грамотасы және алғыс хаттармен марапатталды. Сондай-ақ, Әсет Өрентайұлы салтанатты шара барысында 10 дәрігерге пәтер кілтін табыс етті.
– Құрметті медицина саласының қызметкерлері, ардагерлері, осынау салтанатты күні сіздерді әкімдіктің атынан кәсіби мерекелеріңізбен құттықтауға рұқсат етіңіздер. Қала тұрғындары атынан ыстық лебіздеріміз бен шын жүректен құттықтауларымызды қабыл алыңыздар. Медицина саласы қызметкерлерінің күні – адамгершілікке толы, қайырымды және де ең қиын мамандықты таңдаған адамдардың мерекесі. Туған күнімізден бастап өмір бойы сіздердің бақылауларыңыз бен қамқорлықтарыңызда боламыз. Өз істеріңізді құрметпен атқарып, қасиетті парыздарыңызды барынша орындауға еңбектенесіздер. Бүгін біз медицина қызметкерлеріне 25 құрмет грамотасын, 25 алғыс хат табыстаймыз, – деді қала әкімі.
Әсет Өрентайұлының айтуынша, медицина саласында қызмет көрсететін мамандарға елордада жан-жақты қолдау көрсетілуде. Мәселен, өткен жылы 35 пәтер берілген және дәрігерлердің балалары үшін балабақшаларда 120 орын бөлінген. Сондай-ақ, 2016 жылы 15 медициналық арнайы көлік, ал осы жылы қосымша заманауи құралдармен жабдықталған 49 автомашина сатып алынған.
Ал Елжан Біртанов медицина қызметкерлерін кәсіби мерекесімен құттықтай отырып, дәрігерлерге жағдай жасап отырған әкімдікке алғысын айтты.
– Биылғы мерекеміз өте ерекше. Оның себебі – Елбасының арқасында Астанамыз халықаралық деңгейде танымал қала болды. Бұған елордада өтіп жатқан халықаралық ЭКСПО көрмесі дәлел. Біз бұл көрмеге ұзақ әрі жан-жақты дайындалдық. Елордамызда халықаралық талаптарға сай ауруханалар бой көтерді, онда тәжірибелі, білімді де білікті сіздер секілді мамандар жұмыс істейді. Медициналық көмекке жүгінгендердің арасында Үндістан, Ресей, Эквадор секілді елдерден келген шетелдіктер де бар. Барлығына жоғары деңгейде көмек көрсетіліп жатқанын айтып жатыр. ЭКСПО – бізге қиындық емес, керісінше, үлкен мүмкіндік. Біз көрме арқылы дүние жүзіне өзіміздің тәжірибемізді, медициналық саладағы мүмкіндігімізді көрсетеміз. Сіздерді мерекелеріңізбен шын жүректен құттықтаймын, – деді министр мырза.
Құттықтау сөзден кейін ведомство басшысы медицина саласына 30 жылдан астам уақытын арнаған 5 дәрігерді «Денсаулық сақтау ісінің үздігі» төсбелгісімен марапаттады. Сондай-ақ, бірқатар қызметкер «Денсаулық сақтау ісіне қосқан үлесі үшін» төсбелгісіне ие болды. Салтанатты шараның соңы елімізге кеңінен танымал өнер жұлдыздарының концерттік бағдарламасымен түйінделді.
Серік ЖОЛДАСБАЙ
