Шаттыққа толы шырша тойы
Жаңа жыл қарсаңында Астана әкімі Әсет Исекешевтің атынан жаңа жылдық шырша ұйымдастырылды. Оқушылар сарайында өткізілген шаттыққа толы шырша тойына елордалық 300-ден астам бала қатысты. Оқу озаттары, жетім балалар, аз қамтылған отбасылардың балалары мен ерекше қажеттілігі бар бүлдіршіндер шақырылған ерекше кешке елорда әкімінің орынбасары Ермек Аманшаев қатысып, балаларды құттықтады.
– Өткен жылға өкпе жоқ. Бұл жылы ЭКСПО халықаралық көрмесі Астанамызда дүркіреп өтті. Алдағы жылдан да күтеріміз көп. Бас қаламыздың 20 жылдығын қарсы алғалы отырмыз. Жаңа жылда барлығыңыздың армандарыңыз орындалсын! Әрбіріміздің үйімізде жаңа жылдық ғажайыптар орын алсын! Оқуда озат болып, еліміздің ертеңі деп сенер білімді азамат болыңыздар! – деді Ермек Әмірханұлы.
Интерактивті шоу-қойылымға балалар да араласып, барынша атсалысты. Өздерінің сүйікті ертегілерінің кейіпкерлерімен қол ұстасып, шыршаны бірге айналған оқушыларға тосын сыйлар жасалды.
«Барлық оқушыларды келе жатқан Жаңа жыл мерекесімен құттықтағым келеді. Біздің балаларымыз оқуда озат, білімді екендіктерін жыл сайын дәлелдеп келе жатыр. Биыл да 11 жыл қатарынан республика бойынша бірінші орынға табан тіредік. Барлық балалардың өмірі қуанышқа толы болып, бақытты ғұмыр кешуіне тілектеспін!» деген қалалық Білім басқармасының басшысы Әнуар Жанғозин балалардың биылғы жетістіктерін саралап, келер жылы одан да үлкен жетістіктер күтетінін жеткізді.
Музыкалық қойылым ретінде ұсынылған шарада балалар әннен шашу шашып, би биледі. Мереке соңы «ЭКСПО-2017» көрмесі аумағында орналасқан «Нұр Әлем» сферасындағы экскурсиямен жалғасты.
Гүлжан РАХМАН