Нұр-Сұлтан қаласының көшелеріндегі кептеліс, жол-көлік инфрақұрылымын дамыту, жолда жүру қауіпсіздігі, т.б. мәселелер астана әкімдігінде өткен жиналыста әңгіме өзегіне айналды.
Жол-көлік инфрақұрылымының жағдайы
Елорданың жол-көлік инфрақұрылымы кейінгі сегіз жылда 157 пайызға ұлғайып, қала жолдары 770 км-ға ұзарды. Бүгінде елордада 350 мың көлік тіркелген. Оған сырттан келетін 75 мың қозғалыс құралдарын қоссақ, күн сайын бас қала көшелеріне 400 мыңнан астам көлік шығуы мүмкін. Бұл жағдайда көлік нөпірі жол-көлік инфрақұрылымына түсетін жүктемені көбейтіп, айтарлықтай қолайсыздықтар туғызатыны сөзсіз.
Жолдардың жарамсыз күйге түсуіне жауын-шашын мен ауа температурасының аяқ астынан құбылуы көп кері әсер етеді. Сондай-ақ қалада көлік санының шамадан тыс көбеюі жолдардың жылдам тозуына соқтырады. Көшенің жолдары жарылып, ой-шұңқыр пайда болады. Оның үстіне кей көшелердің уақытылы жөнделмей жататыны да жасырын емес. Жолдарға аралық жөндеу жүргізу мерзімі 5 жыл деп белгіленгенімен, кей көшелерге ұзақ уақыт жөндеушілердің күрегі тимеген. Мәселен, Абай даңғылының Сарыарқа-
Республика учаскесіне жөндеу жасалмағалы 7 жыл өткен. Бөгенбай батыр даңғылының Сарыарқа-
Уәлиханов учаскесі жамалмағалы 9 жыл болған.
Қазіргі күні елорда жолдарындағы қозғалысты реттеу үшін Ақылды көлік жүйесі (ITS) енгізіліп жатыр. Ол жол торабын кептелістен арылтуға және көлік ағымдарын тиімді басқаруға мүмкіндік береді.
Алтай Көлгінов, Нұр-Сұлтан қаласы әкімі:
– Бағдаршамның сары белгісінің жасылға ауысу уақытын 3-тен 5 секундқа ұлғайту жол-көлік оқиғаларын 16 пайызға дейін төмендетуге мүмкіндік береді. Сондай-ақ жаяу жүргінші жолақтарын, боллардтар орнату және реверсивті қозғалысты енгізу, жекелеген учаскелерінде жылдамдықты шектеу және бағдаршамға жақын орналасқан тротуарларды абаттандыру қажет. Егер таңертең машиналар ағыны бір жаққа, ал кешке — екінші жаққа қозғалса, онда қарама-қарсы жолақтар бос қалады. Бұл кептелістен арылуға мүмкіндік береді.
Сонымен қатар азаматтардың жолда жүру мәдениеті болу керек. Барлық бағытта қауіпсіздік жұмыстарын күшейтуге тиіспіз.
Қоғам белсенділері рейдке шығады
Көлік және жол-көлік инфрақұрылымын дамыту басқармасының басшысы Нұрлан Солтамбековтің айтуынша, ағымдағы жылы көлік нөпірі қалың учаскелерде ITS- пайдалану арқылы қозғалыс жылдамдығын 18 пайызға, көшелердің өткізгіштік қабілетін 40 пайызға арттыруға, жолда жүру уақытын 18 пайызға азайтуға қол жеткізілді. 2019 жыл соңына дейін ITS нысандары 207 бағдаршамға дейін жеткізілетін болды.
– Біздің кәсіпорын жол-көлік инфрақұрылымын жетілдіреді және жүйенің кемшін тұстарын анықтайды. Жалпы қолданыстағы автомобиль жолдарына, жөндеу жұмыстарына және материалдар сапасына талдау жүргізеді. Жол-көлік инфрақұрылымының қауіпсіздігін бақылайды, – деді «Жол активтері ұлттық сапа орталығы» РМК бас директоры Замир Сағынов.
Оған қоса орталық қоғам белсенділерімен бірге жолдардың сапасын тексеру рейдтерін ұйымдастырады. Жақында астананың іргесіндегі Қосшы ауылының көшелері тексерілді.
Жол қауіпсіздігін сақтау – басты міндет
ҚР Президенті Қасым-Жомарт Тоқаев астананы дамытуға байланысты өткен жиында көлік-жол инфрақұрылымын жетілдіруге, жолда жүру қауіпсіздігін арттыруға назар аудартқан болатын. Осы жиында жол-көлік оқиғаларын азайту, өлім-жітіммен және жарақаттан сақтандыру бойынша шараларды жүйелі жүргізуді тапсырды. Президент тапсырмасын жүзеге асыру үшін елорда әкімдігінде қала басшысы Алтай Көлгіновтің қатысуымен жол қозғалысы мен қауіпсіздігіне арналған алқалы жиын өтті.
Ресми ақпаратқа сүйенсек, жыл соңына дейін қаланың 7 көшесіне ағымдық жөндеу жасалып, Агроқалашық, Көктал-1, Өндіріс, Оңтүстік-Шығыс (оң жағалау), Энергетик тұрғын алаптарына жалпы ұзындығы 27 шақырымды құрайтын 51 көшеге тас жол салынды.
Полиция департаментінің басшысы Ержан Сәденов жол-көлік оқиғаларының алдын алу үшін, ең алдымен, мектептер мен балабақшалар маңайындағы жол белгілерін, ақпараттық қалқандарды, жаяу жүргіншілер жолақтарын қалыпқа келтіру керек екенін айтты. Өйткені бәрінен бұрын балалардың жүріп-тұруы қауіпсіз болу тиіс.
Алтай Көлгінов жол ережелерін бұзған көлік иелерін жазасыз қалдырмау керектігін, өйткені жазасыздық қатерлі жағдайларға әкелуі мүмкін екендігін айтты.
– Алдын алу шаралары нәтиже береді. Бұл бірден көрінеді. Сонымен қатар азаматтардың жолда жүру мәдениеті болу керек. Барлық бағытта қауіпсіздік жұмыстарын күшейтуге тиіспіз. Алда аяздар күтіп тұр, автобустардың жүріп-тұру уақытының аралығы ұзақ болмасын, жылы аялдамалар жұмыс істеуі керек, көше жарығы мен белгілері жоқ жерлерде оларды жеделдетіп орнату қажет, – деді қала әкімі.
Қала әкімі тұрғындарының қауіпсіздігін қамтамасыз ету басты міндет екенін айтты. Жол қауіпсіздігі бойынша жобаларды іске асырар алдында тұрғындармен кездесіп, ұсыныстары мен сұраныстарын тыңдап, жоспарлап, іске асыру керектігін атап өтті.
