ҚР Президенті жанындағы Орталық коммуникациялар қызметінде Қазақстан Респуб-ликасы Ішкі істер министрлігі Төтенше жағдайлар комитетінің төрағасы В.Беккердің қатысуымен өткен брифинг барысында биылғы су тасқыны кезінде азаматтардың қауіпсіздігін қамтамасыз ету мәселесі кеңінен талқыланды.
Күннің күрт ысып кетуіне байланысты қар мен мұздың шұғыл еруі әсерінен және нөсерлі жаңбырдың салдарынан көктемде су тасқыны болуы ықтимал. Осы жөнінде айта келе комитет басшысы үстіміздегі жылы 807 елді мекенде су деңгейі көтерілуі мүмкін екенін ескертті.
«Қазгидрометтің» алдын ала болжамына сәйкес, әсіресе, Ақмола, Ақтөбе, Қостанай, Қарағанды және Солтүстік Қазақстан облыстарында көктемде қар суы көбейеді. Осыған орай қамданбасақ, қапы қалуымыз мүмкін. Бұл ретте барлық деңгейдегі әкімдіктер төтенше жағдайлардың алдын алу және жою жөніндегі комиссияның 276 отырысын өткізіп, болжап болмайтын салдарға әкелуі мүмкін, қауіпті табиғи құбылыстың алдын алу мәселелері талқыланды.
Тұрғын үйлердің су астында қалуын болдырмау үшін қыс бойы жауған қардан дер кезінде арылу – бүгінгі күн тәртібіндегі басты мәселелердің бірі. Осыған орай, үстіміздегі жылы жергілікті атқарушы органдар елді мекендерден 9 млн текше метрден астам қар шығарған. Бұл жұмыстар әлі күнге дейін жалғасып жатыр.
В.Беккердің айтуынша, 2016 жылғы су тасқыны кезеңіне дайындық аясында халық пен өңірлерді қорғау мақсатында 90 шақырымнан астам қорғау бөгеті салынып, 455 шақырым бөгетке жөндеу жұмыстары жүргізілген. 180 шақырымға жуық өзен арналарында жаға бекіту және тереңдету жұмыстары атқарылып, 2 мың шақырымнан астам арна тазартылыпты. Сонымен бірге су тасқынының алдын алу мен олардың салдарын жою мақсатында 27,5 мың тонна жанар-жағармай, 400 мың тоннадан астам инертті материалдар, 1,3 млн. қап дайындалған.
– Ірі ауқымды су тасқынын жою үшін Ішкі істер министрлігінің жеке құрамынан 9 мыңға жуық адам және 1 мыңнан астам техника, 220 жүзу құралы әзір тұр. Күн жылынған жағдайда қар қоры көп өңірлерге қосымша күштер мен құралдар жіберіледі, – деді В.Беккер.
Комитет төрағасы «Қазгидрометтің» мәліметінше, биылғы жағдай бойынша Қазақстанның солтүстігінде, орталығында және шығысында қардың көп түсуіне байланысты Шығыс Қазақстан, Ақмола, Солтүстік Қазақстан, Қарағанды және Қостанай облыстарында күрделі жағдай қалыптасуы мүмкін екенін жеткізді.
Гүлбаршын ӨКЕШҚЫЗЫ
Материалды “Астана ақшамы” газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.
