وسىدان تۋرا 39 جىل بۇرىن, 1979 جىلدىڭ 25 جەلتوقسان كۇنى كەڭەس اسكەرى اۋعانستانعا كىرگەن ەدى. وسى ەلدەگى سوعىس جاعدايىندا ءبىر مىڭعا جۋىق قازاقستاندىق جاۋىنگەر ەرلىكپەن قازا تاپتى. 1989 جىلدىڭ 15 اقپانى كۇنى كەڭەس اسكەرىنىڭ شەكتەۋلى كونتينگەنتى اۋعانستاننان شىعارىلدى.
استانا قالاسىنىڭ ورتاسىندا, قازىر ايتىپ جۇرگەنىمىزدەي, ەسىلدىڭ وڭ جاعالاۋىنداعى اباي داڭعىلى مەن م.اۋەزوۆ كوشەسىنىڭ قيىلىسىندا ورنالاسقان وتان سوعىسى مۇگەدەكتەرىنە ارنالعان گوسپيتال ەرتەرەكتە «وبكومنىڭ ەمحاناسى» اتالاتىن. مۇندا, نەگىزىنەن, تسەلينوگراد وبلىستىق پارتيا كوميتەتىنىڭ باسشىلىق قىزمەتكەرلەرى مەن ۇلى وتان سوعىسىنىڭ مايدانگەرلەرى عانا ەمدەلەتىن. كەيىننەن بۇل مەكەمە تەك سوعىس ارداگەرلەرى مەن چەرنوبىل اپاتى سالدارىن جويۋعا قاتىسۋشىلارعا, سەمەي پوليگونىندا قىزمەت اتقارعاندارعا مەديتسينالىق قىزمەت كورسەتەتىن بولدى.
تسەلينوگراد قالاسىنداعى مەديتسينا ۋچيليششەسىن بىتىرگەن باقىت قاليەۆا ەڭبەك جولىن وسى مەكەمەدە, اتاپ ايتقاندا №4 ەمحانادان باستاعان. بۇل 1983 جىل ەدى. بالا كەزىنەن اق حالات كيىپ ەمحانادا جۇمىس ىستەۋدى ارماندايتىن مەيىرىمدى قىزعا مۇنداعى جۇمىس بىردەن ۇنادى. اسىرەسە, مايدانگەرلەر اتالارعا كومەكتەسكەن سايىن كوڭىلى كوتەرىلە تۇسەتىن.
تاعدىر دەگەن تابان استىندا كۇتپەگەن تارتۋ جاسايدى ەكەن, جاپ-جاس مەدبيكە باقىتتىڭ ءومىرى دە ءبىر ساتتە وزگەرىپ شىعا كەلدى. ەمحانادا جاتقان قالالىق اسكەري كوميسسارياتتىڭ باستىعى وسىنداعى مەدبيكە قىزداردى جيناپ الىپ «اۋعانستانعا باراتىندارىڭ بار ما؟ ول جاقتا جارالانعان, سىرقاتتانعان جاۋىنگەرلەرگە ەم-دوم كورسەتەتىن مەديتسينا قىزمەتكەرلەرى جەتپەي جاتىر. بىراق ەسكەرتەمىن, بۇل – تاۋەكەلدى ۇسىنىس. سوعىس بولىپ جاتقانىن بىلەتىن شىعارسىڭدار» دەپ اشىعىن ايتتى. سودان ويلانىپ-تولعانىپ ءتورت-بەس قىز باراتىن بولدى. ءبارى ءبىر كۇندە قالالىق اسكەري كوميسسارياتقا راپورت بەردى. الايدا تەك باقىت قاليەۆا عانا شاقىرتۋ الاتىن بولدى. ءسويتىپ, 1984 جىلدىڭ اقپان ايىندا قازاقتىڭ قارشاداي قىزى وق پەن وتقا ورانعان اۋعانستاننىڭ پۋلي-حۋمري پروۆينتسياسىندا ورنالاسقان اسكەري گوسپيتالعا كەلدى.
باقىتتىڭ العاشقى بايقاعانى, مۇندا ەلدەگىدەي جايباراقات تىرلىك جوق ەكەن. ەمدەۋشى دە, ەمدەلۋشى دە قاھارلى بولىپ كورىندى. پالاتاعا باس سۇققانى سول ەدى, باسىنداعى بايلاعان اق ءمارلىسى قىپ-قىزىل قانعا بويالعان, ىڭىرسىپ جاتقان جاۋىنگەردى كورگەندە باقىتتىڭ دەنەسى مۇزداپ كەتكەندەي بولدى. بۇرىشتاعى كەرۋەتتە جاتقان جىگىتتىڭ وڭ اياعى تىزەدەن جوعارى كەسىلگەن ەكەن… ەرسىلى-قارسىلى جۇرگەن جاۋىنگەر سول قولىن موينىنا جىپپەن بايلاپ الىپتى. وسى كورىنىستىڭ ءبارى «وبكومنىڭ ەمحاناسىنان» كەلگەن جاس مەدبيكەنىڭ ساناسىن ءدۇر سىلكىندىردى. كوپ ۇزاماي-اق «ءوزىم سۇرانىپ كەلگەنمىن. ەندى شەگىنەتىن جەر جوق. مەن وسى جارالى جاۋىنگەرلەرگە كومەكتەسۋىم كەرەك. سول ءۇشىن كەلدىم عوي…» دەپ ءوزىن-ءوزى قامشىلاپ جىبەردى. سول ساتتەن بەرى باقىت قاليەۆا قانشاما ادامنىڭ جانىن ساقتاۋعا قول ۇشىن سوزدى. وزىندەي ورىمدەي جىگىتتەردىڭ ءومىر ءۇشىن كۇرەسۋىنە كومەكتەستى. اۋىر جاراقاتتان جانى قينالعاندارعا مەيىرىمىن كورسەتتى. وسىلايشا اۋعانستان سوعىسىنىڭ الاپاتىن كوزىمەن كورىپ, جۇرەگىمەن سەزىنگەن اقمولالىق ارۋ اراعا ەكى جىل سالىپ ەلگە ورالدى.
1986 جىلدىڭ مامىر ايىندا باقىت قاليەۆا ەڭبەك جولىن باستاعان قالالىق گوسپيتالعا قايتا كەلدى. مۇنداعى دارىگەرلەر قاۋىمى كەۋدەسىنە ەكى مەدال تاققان مەدبيكە قىزدى قۇشاق جايىپ قارسى الدى. ءسويتىپ, بەيبىت ومىردەگى الاڭسىز جۇمىسىن جالعاستىردى. ءوزى جاقسى كورەتىن ۇلى وتان سوعىسى مايدانگەرلەرىنە مەيىرلەنە قىزمەت كورسەتە بەردى.
ءوز ىسىنە جاۋاپكەرشىلىكپەن قارايتىن باقىتتى ەمحانا باسشىلىعى تاشكەنت قالاسىندا وتكەن 1-ءىنشى بۇكىلوداقتىق ينتەرناتسيوناليست-مەديكتەر سلەتىنە دەلەگات رەتىندە جىبەردى. وسى شارا بارىسىندا «اۋعانستان حالقىنىڭ ريزاشىلىعى» مەدالىمەن ماراپاتتالدى. كەڭەس وداعىنىڭ باتىرى رۋسلان اۋشەۆ «زا زاسلۋگي» مەدالىن تابىس ەتتى. سونىمەن قاتار باقىت قاليەۆا – «اسكەري مەديتسيناعا سىڭىرگەن ەڭبەگى ءۇشىن» بەلگىسىنىڭ يەگەرى.
كۇندەلىكتى جۇمىسىمەن قاتار, قوعامدىق شارالارعا دا بەلسەندى قاتىساتىن جاۋىنگەر-ينتەرناتسيوناليست باقىت قاليەۆا بۇگىندە زەينەت دەمالىسىنا شىققان. بىراق ءومىرىنىڭ وزەگىنە اينالعان سۇيىكتى ىسىنەن الىستاپ كەتە الماي ءجۇر. استانا قالاسىنداعى №1 كوپبەيىندى اۋرۋحاناسىندا ديەتولوگ-مەدبيكە قىزمەتىن اتقارادى. ءوزىنىڭ جولىمەن كەلە جاتقان جاس مەدبيكەلەرگە بىلگەنىن ۇيرەتەدى, ومىرلىك تاجىريبەسىمەن بولىسەدى. ال جۇمىستان قولى قالت ەتكەندە «استانا قالاسىنىڭ اۋعانستان سوعىسى مۇگەدەكتەرى مەن ارداگەرلەرى وداعى» ۇيىمىنا اسىعادى. مۇندا ول جان-جۇرەگىن ۇعىناتىن, سوعىس وتىنا شارپىلعان جاۋىنگەر-ينتەرناتسيوناليستەرمەن سىرلاسادى. جاستاردى وتاندىق پاتريوتيزمگە تاربيەلەيتىن قوعامدىق ءىس-شارالارعا قاتىسادى. بۇل – سوعىس تابيعاتىن جان-ءتانىمەن تۇيسىنگەن قازاق قىزىنىڭ ازاماتتىق ۇستانىمى.
