– باسىندا بۇل كاسىپپەن اعا-جەڭگەم وزدەرى اينالىساتىن. كەيىن مەنى شاقىرتىپ الدى. ويتكەنى ساتاتىن نارسەلەرىمىزدىڭ كوبى ءوز قولىمىزدان شىققان. ونىڭ جاساۋدىڭ وزىنە كوپ ۋاقىت, كۇش-جىگەر كەتەدى. سونداي-اق كەيبىرەۋلەرىن قولونەرمەن اينالىساتىن شەبەرلەرگە تاپسىرىس بەرىپ الدىرامىز. ونىڭ بارىنە ءجۇرىپ-تۇراتىن ادام كەرەك. ارينە, كاسىپتىڭ وڭايى جوق. بىراق ءبىز وسىنىڭ ارقاسىندا وتباسىمىزدى اسىراپ, كۇنىمىزدى كورىپ وتىرمىز. تابىسىمىز جامان ەمەس, ساۋدا توقتاپ تۇرعان جوق, – دەيدى 25 جاستاعى جىگىت.
ناۋرىزعاليدىڭ ماماندىعى تەمىرجولشى, بىراق جاستايىنان ۇلتتىق ۋىزعا جارىعان, كونە اڭگىمەلەرگە كوكىرەگىن ءتۇيىپ وسكەن جىگىتتىڭ قازاقى سالتقا دەگەن قۇمارلىعى ەرەكشە بولدى. قولونەرگە دەگەن قىزىعۋشىلىعى دا سونىڭ اسەرىنەن تۋىنداعان سياقتى. ونىڭ ۇستىنە تۋعان اعاسى داۋلەت وسى كاسىپپەن كاسىبي تۇردە اينالىسادى. جاستايىنان كوزى كورگەنى – قولونەر. كوپ نارسەنى سودان ۇيرەندى. قولونەردى ارنايى وقىعان جوق, ءبارى كوزىمەن كورىپ, كوكىرەگىنە تۇيگەندەرى. سوسىن شىن تالاپتانعان ادامعا الىنبايتىن قامال بار ما؟! ارينە, باسىندا قاتەلەستى, قيۋى كەلمەي جاتقان كەزدەرى بولدى, بىراق ءبارى بىرتە-بىرتە قالپىنا كەلە بەردى. كۇن وتكەن سايىن شەبەرلىگىن شىڭداي ءتۇستى.
شاعىن شەبەرحانالارىندا ساۋداعا شىعاراتىن نارسەلەردىڭ كوپشىلىگىن اعا-جەڭگەسى جانە ءوزى جاسايدى. اسىل تاستاردان جانە باعالى مەتالداردان مونشاق, شولپى, القا, سىرعا, ساقينا, بىلەزىك, تاسپيىق دايىندايدى. اعاشتان ويۋ ويىپ, تەمىردەن ءتۇيىن تۇيەدى. مۇيىزدەن تازا قايىستان قامشى ورەدى. ايگەرىم جەڭگەسىنىڭ قولىنان ءۇي شارۋاشىلىعىنا قاجەتتى بۇيىمدار, كەستەلى بەت ورامالدار شىققان.
قالا اكىمدىگى قولونەرشىلەرگە ساۋدا ورنىن الەۋمەتتىك جوبا رەتىندە تەگىن بەرگەن. تەك پايدالانعان ەلەكتر جارىعىنا عانا اقى تولەيدى. بىراق قازىر كۇننىڭ ۇزاقتىعىنا بايلانىستى ولار جارىقتى پايدالانبايدى دەسە دە بولادى. سوندىقتان تۇسكەن كىرىستى تۇگەلدەي شيكىزات ماتەريالدارىن الۋعا, كۇندەلىكتى تۇرمىستىق قاجەتتىلىكتەرىنە جاراتادى. ودان ارتىلىپ جاتسا, ەرتەڭگە قور جيناپ قويۋدى دا ۇمىتپايدى.
زاتتاردىڭ باعاسى دا قىمبات ەمەس: 500 تەڭگەدەن باستالادى. بىراق قالتالى ادامدارعا ارنالعان قىمباتتارى دا بار. كۇردەلى ورنەكتەلگەن, جاسالۋى قيىن ءارى ءبىرشاما كوپ ۋاقىت كەتەتىن ناقىشتالعان ەڭ قىمبات ساقينالار 120 000 تەڭگەگە دەيىن بارادى. ولار التىنمەن اپتالىپ, كۇمىسپەن كۇپتەلىپ, اسىل تاستارمەن بەزەندىرىلەدى. دەگەنمەن ونداي بىرەگەي زاتتار ارنايى تاپسىرىسپەن جاسالادى. ادەتتە ساقينا 1 اپتانىڭ كولەمىندە جاسالسا. قۇنى 50-60 مىڭ تۇراتىن اسىل تاس پەن تازا كۇمىستەن قۇيىلعان القا, قۇسمۇرىن جۇزىك جانە بىلەزىكتەن تۇراتىن قىز-كەلىنشەكتەرگە ارنالعان جيىنتىق جاساۋعا 2 اپتاداي ۋاقىت كەتەدى.
بۇيىمداردى, نەگىزىنەن, ەلورداعا قىدىرىپ كەلگەندەر ەستەلىك رەتىندە ساتىپ الادى. ۇلتتىق بۇيىمدارعا, اسىرەسە, شەتەلدىكتەردىڭ قىزىعۋشىلىعى كۇشتى. ءار زاتتىڭ قۇنىن بىلەتىن شەتەلدىكتەر قولونەردى جوعارى باعالايدى. بىر قۋانارلىعى, تازا تابيعي بۇيىمدار مەن اسىل تاستاردان, باعالى مەتالداردان جاسالعان ۇلتتىق قولونەرگە دەگەن سۇرانىس جاقسى.
