استانا تورىنە تورتكۇل دۇنيەنىڭ شاحماتتان تالاسى بار كىل مىقتىلارىن جيناعان ايەلدەر اراسىنداعى كوماندالىق IV الەم چەمپيوناتى باستالدى.
بايراقتى باسەكەدە قىتاي, رەسەي, ۋكراينا, اقش, ءۇندىستان, فرانتسيا, تۇركيا, گرۋزيا, رۋمىنيا جانە قازاقستاننىڭ شاحماتتان ايەلدەر كومانداسى باق سىنايدى. ءدۇبىرلى دودانىڭ الدىندا شاحماتشىلار مەن ۇيىمداستىرۋشىلار جۋرناليستەر قاۋىمىمەن كەزدەسىپ, «دۋمان» قوناقۇيىندە پرەسس-كونفەرەنتسيا وتكىزدى. جيىنعا حالىقارالىق شاحمات فەدەراتسياسىنىڭ پرەزيدەنتى كيرسان يليۋمجينوۆ, قر شاحمات فەدەراتسياسىنىڭ پرەزيدەنتى اسەت يسەكەشەۆ, جارىستىڭ باس دەمەۋشىسى «سامۇرىق-قازىنا» ۇلتتىق ءال-اۋقات قورىنىڭ اتقارۋشى ديرەكتورى دارحان قالەتاەۆ سىندى بىرقاتار وكىلدەرمەن قوسا قىتاي كومانداسىنىڭ توپ باسشىسى يۋ.ۆەنيۋن, ۋكراينا كومانداسىنىڭ ۇزدىك ويىنشىسى اننا ۋشەنينا جانە قازاقستان قۇراماسىنىڭ ليدەرى گۇلىسحان ناحباەۆا قاتىستى.
جيىن بارىسىندا حالىقارالىق شاحمات فەدەراتسياسىنىڭ پرەزيدەنتى قازاق شاحماتشىلارىنىڭ مارتەبەسى جىل سايىن الەمدىك ارەنادا ءوسىپ كەلە جاتقاندىعىن العا تارتىپ, ۇلتتىق فەدەراتسيا 2018 جىلى استانا قالاسىندا شاحماتتان دۇنيەجۇزىلىك وليمپيادا وتكىزۋگە ۇسىنىس ءبىلدىرىپ وتىرعاندىعىن جانە ونى وتكىزۋگە قازاقستاننىڭ مۇمكىندىگى جوعارى ەكەندىگىن تىلگە تيەك ەتتى.
ءبىزدىڭ كوماندانىڭ توپ باسشىسى حالىقارالىق گروسسمەيستەر دارەجەسىنە يە گۇلىسحان ءوز ءسوزىندە: «وتە مىقتى رەسەي, قىتاي, فرانتسيا, تۇركيا, اقش كوماندالارى كەلدى. رەيتينگ بويىنشا 9-شى ورىندا تۇرمىز. كوماندالىق جارىس بولعاندىقتان, بىرگە دايىندالىپ, بىرگە جۇمىس ىستەپ جاتىرمىز. جەڭىسكە جەتۋگە تىرىسامىز», – دەدى.
راسىندا, بۇل سايىس وتە تارتىستى وتەدى دەپ كۇتىلۋدە. سەبەبى, ايەلدەر اراسىنداعى شاحماتتان مىقتى دەگەن الەمدىك بەستىكتىڭ ءتورت مۇشەسى قاتىسىپ وتىر. ولار: قىتاي, رەسەي, گرۋزيا, ۋكراينا. ال, بەسىنشىسى – ۆەنگريا. بىراق, ولار جارىسقا قاتىسۋشىلار تىزىمىندە جوق بۇل جولى. ونىڭ ۇستىنە, الەمدىك دەڭگەيدەگى مىقتى ويىنشىلار دا وسىندا. ماسەلەن, جوعارىدا ايتقان اننا ۋشەنينا, الەمنىڭ ەكس-چەمپيونى الەكساندرا كوستەنيۋك (روسسيا) جانە ەڭ مىقتى گروسسمەيستەرلەر: نانا دزاگنيدزە (گرۋزيا), اننا زاتونسكيح (اقش), يۋ.ۆەنيۋندەر (قىتاي) – تالاي قارسىلاسىن قاپى قالدىرعان مىقتىلار.
ءباسپاسوز ماجىلىسىنەن كەيىن الەمدىك دودانىڭ سالتاناتتى اشىلۋى بولىپ ءوتتى.
چەمپيونات ناۋرىز ايىنىڭ 12-سىنە دەيىن جالعاسادى. جارىس بارىسىن www.worldcherss.kz سايتىنان قاداعالاپ وتىرۋ ءمۇمكىندىگى بار.
ەربول جانات
