تۋريزم, دەنە تاربيەسى جانە سپورت باسقارماسى مەن قالالىق ارداگەرلەر كەڭەسىنىڭ ۇيىمداستىرۋىمەن ەلوردامىزداعى «دينامو» سپورت كەشەنىندە 60 جاستان اسقان ارداگەر-زەينەتكەرلەر اراسىندا جۇزۋدەن جارىس ءوتتى.
«بۇل ءىس-شارا سالاۋاتتى ءومىر سالتىن قالىپتاستىرۋ جانە اعا بۋىن وكىلدەرىن سپورتپەن بەلسەندى اينالىسۋعا تارتۋ ماقساتىندا ۇيىمداستىرىلىپ وتىر. ءبىز بۇدان بولەك, ەلوردادا ارداگەرلەر ءۇيىن اشۋ ءماسەلەسىن قالا اكىمىنىڭ قاراۋىنا ۇسىندىق. ەگەر ۇسىنىسىمىز اكىمدىك تاراپىنان قولداۋ تاۋىپ جاتسا, ارداگەرلەردىڭ ءبىر ورتادا باس قوسىپ, اڭگىمە-دۇكەن قۇرۋىنا مۇمكىندىك تۋار ەدى», – دەيدى قالالىق ارداگەرلەر كەڭەسىنىڭ توراعاسى بەكەن ءالىمجانوۆ.
جارىسقا الماتى, سارىارقا جانە ەسىل اۋداندارىنان بارلىعى 54 ارداگەر قاتىستى. 60-65 جانە 65-70 جاس ارالىعىنداعى ەرلەر, 58-60 جانە 60-63 جاسقا دەيىنگى ايەلدەر ەكى توپقا ءبولىنىپ, جارىسقا ءتۇستى.
سايىسقا «دينامو» سپورت كەشەنى دەمەۋشىلىك جاساپ, تورەشىلەر مەن مەديتسينا قىزمەتكەرلەرىنىڭ قىزمەتىن ۇيىمداستىردى.
جارىس قورىتىندىسىندا 60-65 جاس ارالىعىنداعى ەرلەر سايىسىندا 1-ءشى ورىندى ا.كۇدەباەۆ, 65-70 جاس ارالىعىندا ش.باياكەشوۆ جەڭىپ الدى. ايەلدەر سايىسىندا باس جۇلدە 58-60 جاس ارالىعىندا م.قاسىموۆاعا جانە 60-63 جاس ارالىعىندا ب.قۇسايىنوۆاعا بۇيىردى.
ال, جالپى كوماندالىق ەسەپتە 9 جۇلدەلى ورىندى يەلەنگەن ەسىل اۋدانىنىڭ ارداگەرلەرى ءبىرىنشى ورىنعا شىقتى.
ەربول جانات
