1997 جىلدىڭ 10 جەلتوقسانى – مەملەكەت تاريحىنداعى ەلەۋلى داتا. ءدال وسى كۇنى ەل استاناسى الاتاۋدان ارقاعا كوشىرىلدى. سودان بەرى ارادا ون التى جىل ءوتىپ, استانا الەم ەلدەرى قىزىعاتىن شاھارعا اينالدى. وسىعان بايلانىستى بۇرناعى كۇنى بەيبىتشىلىك جانە كەلىسىم سارايىندا سالتاناتتى كونتسەرت ءوتتى.
استانا قالاسىنىڭ اكىمى يمانعالي تاسماعامبەتوۆ قاتىسقان كونتسەرت شىمىلدىعىن ەلوردانىڭ قالىپتاسۋ كەزەڭىن بەينەلەيتىن دەرەكتى فيلم ءتۇردى. ودان كەيىن بيىل اشىلعان «استانا وپەرا» مەملەكەتتىك وپەرا جانە بالەت تەاترىنىڭ سوليستەرى قازاق اندەرى مەن يتاليالىق اريالاردان قۇرالعان پوپپۋري ايتىپ, وتاندىق ەستراداعا ەندى عانا جول باستاعان «سارىن» دۋەتى ءان شىرقادى. جاس ءانشى ەركىن كەنەباەۆ ءوزىنىڭ «استانا» اتتى تۋىندىسىمەن حالىقتى بيلەتتى. بەلگىلى ءانشى مارجان اراپباەۆا مەن «Ringo» توبى ەلگە تانىس «پەرۆوە ۋترو ستوليتسى» ءانىن تامىلجىتا ورىندادى. «ايالاعان استانا» بايقاۋىنىڭ جۇلدەگەرلەرى روزا سامەتوۆا مەن ەركەش حاسەن «Viva per lei» انىمەن جۇرتشىلىقتىڭ جۇرەگىنە جول تاپتى. «ليتسا ستوليتسى» سكەتچ شوۋىنىڭ جىگىتتەرى جينالعانداردى كۇلكىگە باتىردى.
«مۋزارت» ءانسامبلىنىڭ ساحناعا شىعۋى ەلوردالىق كورەرمەنگە ۇلكەن سىي بولدى. مەيرامبەك, ساكەن, كەنجەبەك حالىق ءسۇيىپ تىڭدايتىن «قازاقتاي ەل قايدا؟!», «ءوز ەلىم» سەكىلدى رۋح بەرەتىن اندەرمەن قاتار بىرنەشە جىل بۇرىن ەلوردا تويىنا تاماشا تارتۋ بولعان احمەديار ەسمۇحانوۆتىڭ «ەسىل اعادى» ءانىن ايتىپ, كورەرمەندەرگە كوتەرىڭكى كوڭىل كۇي سىيلادى.
استانانىڭ بيىلعى مەرەيتويى قارساڭىندا «پەداگوگ», «ۋچاسكەلىك ينسپەكتور», «دارىگەر», «جولشى», «قۇرىلىسشى», «ەنەرگەتيك» اتالىمدارى بويىنشا وتكىزىلگەن «استانا تاڭداۋى» بايقاۋىنا قاتىسقاندار انشىلەرمەن بىرگە «استانانى بىرگە سالامىز» انىمەن كونتسەرتكە نۇكتە قويدى.
امانعالي شميتۇلى
