بۇرىن تەحنيكانى سىرتتان تاسىمالداپ كەلگەن ەلىمىزدىڭ اسكەري سالاسى ەندى كوپ ۇزاماي وزىمىزدە وندىرىلگەن كولىكتەردى قولداناتىن بولادى. كەشە استانا قالاسىنىڭ اكىمى يمانعالي تاسماعامبەتوۆ جانە قر قورعانىس ءمينيسترى ادىلبەك جاقسىبەكوۆ اسكەري جانە ازاماتتىق ماقساتتاعى ارنايى ماشينالار وندىرەتىن جاڭا زاۋىتتىڭ ىرگەتاسىنا كاپسۋلا قويدى.
بولاشاق زاۋىت «استانا – جاڭا قالا» ارنايى ەكونوميكالىق ايماعىنا كىرەتىن يندۋستريالدىق پارك اۋماعىندا ورنالاسقان. تمد مەن ورتالىق ازيا اۋماعىندا العاش رەت قولعا الىنىپ وتىرعان جوبانى جۇزەگە اسىرۋعا وڭتۇستىك افريكالىق «پاراماۋنت گرۋپپ» كومپانياسى جانە «قازاقستان ينجينيرينگ» ۇلتتىق كومپانياسى اق مەن «قازاقستان ينجينيرينگ ديستريبيۋشن» جشس-نىڭ بىرلەسكەن كۇشى جۇمىلدىرىلماق. ءوندىرىستىڭ نەگىزگى سالماعىن كوتەرگەلى وتىرعان «پاراماۋنت گرۋپپ» كومپانياسى – قارۋلى كۇشتەر سالاسىنا زاماناۋي تەحنيكا ءوندىرۋ جاعىنان دۇنيەجۇزىندەگى الدىڭعى قاتارلى كاسىپورىن. ولاردىڭ شىعارعان اسكەري تەحنيكالارى قانداي شابۋىلدارعا دا توتەپ بەرەتىن قورعانىسى بەرىك, ساپاسى جوعارى ەكەن. كومپانيانىڭ بروندالعان دوڭگەلەكتى ماشينالارى ەلىمىزدىڭ قارۋلى كۇشتەرىنىڭ اسكەري پوليگونىندا وتكىزىلگەن سىناقتان دا ءساتتى ءوتىپتى. ايتالىق, وڭتۇستىك افريكالىقتاردىڭ تانك شابۋىلدارىنا قارسى زىمىراندىق قۇرىلعىسى بار كولىكتەرى مەن جاياۋ اسكەرلەردى قارۋ جاعىنان قولدايتىن وق وتپەيتىن ماشينالارىنىڭ قانداي شايقاسقا دا قارسى تۇرا الاتىن قاۋقارى بار. جارىلعىش زاتتارعا قارسى قورعانىسى بار تاعى ءبىر كولىگى «الەمدەگى ەڭ جويقىن تەحنيكا» اتىن الىپ تا ۇلگەرگەن. 
زاۋىتتىڭ كەلەشەكتە وندىرەتىن كولىكتەردىڭ نوبايىمەن تانىسىپ شىققان استانا قالاسىنىڭ اكىمى يمانعالي تاسماعامبەتوۆ پەن قورعانىس ءمينيسترى ادىلبەك جاقسىبەكوۆ بۇل جوبا مەملەكەت باسشىسى – قر قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ: «2020 جىلعا قاراي مەملەكەتتىك قورعانىس تاپسىرىسىنىڭ 80 پايىزى وتاندىق وندىرىسپەن قامتاماسىز ەتىلۋى كەرەك» دەگەن تاپسىرماسىنا سايكەس كەلەتىنىن اتاپ ءوتتى. سەبەبى, زاۋىت اسكەري تەحنيكالار ءوندىرىپ قانا قويماي, وعان قاجەتتى قوسالقى بولشەكتەردى, وق وتپەيتىن تەمىر تاقتايلاردى كەسۋ, دانەكەرلەۋ, ماشينالاردى قۇراستىرۋ سىندى كوپتەگەن شارۋالاردى اتقاراتىن امبەباپ كاسىپورىن بولماق. جىلىنا 120-دان 360-قا دەيىن كولىك شىعارۋدى جوسپارلاپ وتىرعان زاۋىت كەلەسى جىلدىڭ اياعىندا ىسكە قوسىلماق. ال, ونىڭ العاشقى ءونىمىن شىعارۋ 2015 جىلدىڭ قاڭتار-اقپان ايلارىندا جوسپارلانىپ وتىر. «پاراماۋنت گرۋپپ» كومپانياسىنىڭ بيزنەستى دامىتۋ جونىندەگى ديرەكتورى مايكلز چەمبەرستىڭ ايتۋىنشا, زاۋىت تەك اسكەري-قورعانىس تەحنيكالاردى عانا ەمەس, جولاۋشىلارعا ارنالعان 40, 100 ورىندىق اۆتوبۋستار شىعارۋدى دا ويلاستىرىپ وتىر. بىراق, بۇل سۇرانىسقا بايلانىستى, – دەيدى ول. وندىرىستىك كاسىپورىن ىسكە قوسىلسا, 150 ادامدى جۇمىسپەن قامتاماسىز ەتەدى. وعان قوسا, زاۋىتتا جۇمىس ىستەيتىن 50-دەن استام ينجەنەردى الىس-جاقىن شەت ەلدەردە وقىتۋ جوسپارلانىپ وتىر.
قىمبات توقتامۇرات
