اليمەنت تولەمەي, اۋەجايدا ۇستالدى
اليمەنت ماسەلەسى ءالى كۇنگە دەيىن الەۋمەتتىك شەشىمىن تاپپاي كەلەدى. زاڭعا سايكەس اتا-انانىڭ ەكەۋى دە كامەلەتتىك جاسقا تولماعان بالالارىن اسىراۋعا مىندەتتى. الايدا, اليمەنت تولەۋدەن جالتارىپ جۇرگەندەر كوپ. ونداي بورىشكەرلەرگە سوت اكتىسىن ورىنداماعانى ءۇشىن قر «اكىمشىلىك قۇقىق بۇزۋشىلىق تۋرالى كودەكسىنىڭ» 524-بابىنا ساي اكىمشىلىك جازا قولدانۋ ءۇشىن جادىعات تولتىرىلىپ, سوتقا جولدانادى.
كوپ جاعدايدا ەل ازاماتتارى زاڭدى كۇشىنە ەنگەن سوت اكتىلەرىن ورىنداۋدان باس تارتىپ جاتادى. ەندىگى جەردە ماجبۇرلەپ ورىنداۋدىڭ ءبىر شاراسى – بورىشكەردىڭ قازاقستاننان شىعۋىنا ۋاقىتشا شەكتەۋ قويۋ. سوت ورىنداۋشىسىنىڭ قاۋلىسى قازاقستان رەسپۋبليكاسىنىڭ ازاماتتىق ءىس جۇرگىزۋ زاڭناماسىندا بەلگىلەنگەن ءتارتىپپەن سوتتىڭ سانكتسيالاۋىنا جاتادى.
بورىشكەرلەرگە قاتىستى قولدانىلاتىن بۇل شەكتەۋ از ۋاقىت ىشىندە تيىمدىلىگىن كورسەتتى. استانادا جىل باسىنان بەرى «بۇركىت» بازاسى بويىنشا بورىشكەرلەرگە قاتىستى 467 رەت شەتەلگە شىعۋعا تىيىم سالىندى. ماسەلەن, احمەتوۆ ەسىمدى ازامات تۇركيا مەملەكەتىنە ۇشۋ كەزىندە ەلوردا اۋەجايىندا ۇستالدى. وعان 156 مىڭ تەڭگە اليمەنت قارىزىن تولىق وتەگەننەن كەيىن عانا ەلدەن تىسقارى شىعۋعا رۇقسات بەرىلدى. ال, 430 مىڭ تەڭگە كولەمىندە اليمەنت تولەمەگەن ىسقاقوۆ ەسىمدى ازامات شەتەلگە ساپار شەككەلى تۇرعان جەرىنەن جولىنا توسقاۋىل قويىلدى. سوندىقتان, ءاربىر ازامات سوت شەشىمىنە قۇرمەتپەن قاراپ, ۋاقىتىلى اليمەنت تولەمەۋدىڭ سالدارى جەكە باسىنا, قىزمەتىنە نۇقسان كەلەتىنىن ءتۇسىنگەن ابزال.
سالتانات ءتۇيجانوۆا,
استانا قالاسى پروكۋراتۋراسىنىڭ باسقارما پروكۋرورى