استانا ينۆەستيتسيالار تارتۋ, كاسىپكەرلىكتى, ينفراقۇرىلىمدى دامىتۋ جانە جاڭا تەحنولوگيالاردى ەنگىزۋ جۇمىستارىن جالعاستىرادى.
استانا اكىمى اسەت يسەكەشەۆ پەن «بايتەرەك» ۇبح» اق باسقارما توراعاسى ەربولات دوساەۆ وسىنداي ۋاعدالاستىققا قول جەتكىزدى. تاراپتار شاعىن جانە ورتا بيزنەستى دامىتۋ باعدارلامالارىن, ينۆەستيتسيالار تارتۋ, تۇرعىن ءۇي قۇرىلىسى ماسەلەلەرىن جانە بىرلەسكەن جۇمىستىڭ باسقا دا باعىتتارىن ءسوز ەتتى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.
ايتا كەتەيىك, استانادا يندۋستريالاندىرۋ باعدارلاماسى بەلسەندى ىسكە اسىرىلىپ كەلەدى. «استانا – جاڭا قالا» ارنايى ەكونوميكالىق ايماعى اۋماعىندا ءۇيدمب 2010-2014 جىلدارعا ارنالعان ءبىرىنشى بەس جىلدىق اياسىندا 22 جوبا تاپسىرىلدى, 3000-عا جۋىق جۇمىس ورنى اشىلدى.
سونىمەن قاتار, «بيزنەستىڭ جول كارتاسى – 2020» باعدارلاماسى قولعا الىنعالى جالپى قۇنى 94,2 ملرد تەڭگەنى قۇرايتىن 531 جوبا ماقۇلداندى, 8000-نان استام جۇمىس ورنى ساقتالىپ, 4300 جۇمىس ورنى جاڭادان اشىلدى.
اكىمدىك پەن حولدينگتىڭ اراسىنداعى ىنتىماقتاستىقتىڭ باستى باعىتتارىنىڭ ءبىرى – شاعىن جانە ورتا بيزنەستى قولداۋ. ءجوو-دەگى شوب-تىڭ ۇلەسى بويىنشا استانا ەلىمىز بويىنشا ءبىرىنشى ورىندا. «بايتەرەك» ۇبح وسى باعىتتا ىنتىماقتاستىق ورناتۋعا بولاتىن ەكى باستاما كوتەردى.
حولدينگ پەن اكىمدىك مەملەكەتتىك جەكەمەنشىك ارىپتەستىك سالاسىنداعى ىنتىماقتاستىقتى دامىتۋ تۋرالى كەلىستى. اتاپ ايتقاندا, ءمجا مەحانيزمىن بالاباقشالار, اۋرۋحانالار جانە باسقا دا نىساندار قۇرىلىسى بارىسىندا قولدانۋ ماسەلەسى تالقىلاندى.
سونىمەن قاتار, قولجەتىمدى تۇرعىن ءۇي سالۋ بويىنشا جۇمىستار دا قولعا الىنباق. 2015 جىلى «ارەندالىق تۇرعىن ءۇي» باعىتى بويىنشا «قازاقستان يپوتەكالىق كومپانياسى» اق جالپى اۋدانى 56,7 مىڭ شارشى مەتردى قۇرايتىن 10,8 ملرد تەڭگەنىڭ 853 پاتەرىن سالۋ جانە ساتىپ الۋ بويىنشا كەلىسىمگە قول قويىلدى, قۇرىلىس-مونتاجداۋ جۇمىستارىن اياقتاۋ مەرزىمى – 2016 جىلعى جەلتوقسان.
سونداي-اق, «بايتەرەك دەۆەلوپمەنت» اق جەلىسى بويىنشا ارەندالىق جانە نەسيەگە تۇرعىن ءۇي سالۋدى قارجىلاندىرۋ بەلسەندى تۇردە جۇرگىزىلۋدە.
«جەرگىلىكتى اتقارۋشى ورگاندار ارقىلى نەسيەلىك تۇرعىن ءۇي» باعىتى بويىنشا اكىمدىك ارقىلى نەسيەلىك تۇرعىن ءۇي قۇرىلىسىن قارجىلاندىرۋ اينالىم مەرزىمى 2 جىلعا دەيىنگى وبليگاتسيالار شىعارۋ ارقىلى جۇزەگە اسىرىلادى. 2016 جىلعى 30 ماۋسىمدا «بايتەرەك دەۆەلوپمەنت» اق 1,7 ملرد تەڭگەنىڭ العاشقى وبليگاتسيالارىن ساتىپ الدى.
– اكىمدىكتىڭ ەكونوميكا باسقارماسىنىڭ جۇمىسىنىڭ ۇيلەسىمدىلىگىن ەرەكشە اتاپ وتپەكپىن, ول «قازاقستان قور بيرجاسى» اق الاڭىندا العاشقى بولىپ وبليگاتسيالاردى شىعارىپ, قاراجات الدى, – دەدى ەربولات دوساەۆ.
وڭىرلەردى دامىتۋ باعدارلاماسى اياسىندا تۇرعىن ءۇي قۇرىلىس جيناق بانكى مەن استانا قالاسىنىڭ اكىمدىگى اراسىندا «حالىقتىڭ بارلىق ساناتىنا ارنالعان تۇرعىن ءۇي» جەلىسى بويىنشا 3328 پاتەرلىك 14 ءۇيدى سالۋ مەن وتكىزۋ بويىنشا ىنتىماقتاستىق تۋرالى كەلىسىمگە قول قويىلدى. بۇگىندە 2321 پاتەرلىك 10 تۇرعىن ءۇي پايدالانۋعا بەرىلدى. تاپسىرىلعان پاتەرلەرگە 29 639 ءوتىنىش قابىلداندى. باعدارلاما جۇزەگە اسقالى تاپسىرىلعان 2 321 پاتەر ءۇشىن استانا قالاسىنىڭ اكىمدىگىنە 15 594 ملن تەڭگە قارجى اۋدارىلدى.
– مەملەكەت باسشىسى ايتقانداي, استانا شاعىن جانە ورتا بيزنەسى دامىعان «اقىلدى قالاعا» اينالۋى ءتيىس. سوندىقتان ينۆەستيتسيالار تارتۋ, كاسىپكەرلىكتى قولداۋ ماسەلەلەرى بويىنشا ءبىز «بايتەرەك» حولدينگىمەن ءىس-ارەكەتتەر جوسپارىن, قانداي باعدارلامالار بويىنشا بىرگە جۇمىس ىستەيتىنىمىزدى تالقىلادىق. بۇل رەتتە جەكە ينۆەستيتسيالار مەن ءمجا تەتىكتەرىن بارىنشا پايدالاناتىن بولامىز, – دەدى قالا باسشىسى اسەت يسەكەشەۆ.
كەڭەس قورىتىندىسى بويىنشا «بايتەرەك» حولدينگى مەن استانا اكىمدىگى قىركۇيەك ايىنا قاراي ەگجەي-تەگجەيلى ءىس-ارەكەتتەر جوسپارىن ازىرلەۋ تۋرالى كەلىستى.
