استانا قالاسىنىڭ اكىمى اسەت يسەكەشەۆ پەن «دامۋ» قورىنىڭ باسقارما توراعاسى قانىش تولەۋشين ءتيىستى مەموراندۋمعا قول قويدى. قۇجاتقا سايكەس, ەلوردا اكىمدىگى مەن «دامۋ» قورى پاريتەتتى نەگىزدە بولشەك ساۋدا, مەيرامحانا بيزنەسى, ازىق-تۇلىك جەتكىزۋ قىزمەتى سالالارىندا جانە فرانشيزالار ساتىپ الۋ ءۇشىن شاعىن جانە ورتا بيزنەسكە 600 ميلليون تەڭگە بولەدى.
قارجى ەكىنشى دەڭگەيلى بانكتەر ارقىلى بەرىلەدى. جىلدىق سىياقى مولشەرلەمەسى – 8,5%. نەسيەنىڭ ەڭ كوپ مولشەرى – 200 ملن تەڭگەگە دەيىن. نەسيە بەرۋ مەرزىمى – 84 اي. اينالما قارجىنى تولىقتىرۋ ءۇشىن نەسيە مەرزىمى 36 ايعا دەيىن بولادى. نەگىزگى قارىزدى وتەۋ بويىنشا جەڭىلدىكتى كەزەڭ – 18 ايدان اسپايدى.
– استانا زاماناۋي مەگاپوليسكە اينالىپ كەلەدى, قالا ەكونوميكاسىنىڭ ايتارلىقتاي بولىگىن سەرۆيستىك سەكتور قۇرايدى. قازىرگى كەزدە ەلوردا ەكسپو-2017 كورمەسىن وتكىزۋگە دايىندىق ۇستىندە. جەرگىلىكتى حالىق پەن تۋريستەر ءۇشىن سەرۆيستى ودان ءارى دامىتىپ, بولشەك ساۋدا, مەيرامحانا بيزنەسىن, قىزمەت كورسەتۋ تۇرلەرىن جاڭا زاماناۋي دەڭگەيگە شىعارۋ ماڭىزدى. سوندىقتان «دامۋ» قورىمەن بىرگە وسى باعىتتاعى بىرقاتار باعدارلامالاردى ىسكە قوسامىز, – دەدى قالا باسشىسى اسەت يسەكەشەۆ.
– استانا اكىمدىگىمەن جاسالعان كەلىسىم شاعىن جانە ورتا بيزنەسكە قولايلى جاعدايلار جاساۋدا مەگاپوليس ءۇشىن ماڭىزدى بولىپ تابىلادى. ستاتيستيكالىق مالىمەتتەرگە سايكەس, استانا قالاسى شوب دامىتۋ كورسەتكىشتەرى بويىنشا الدىڭعى قاتاردا. بۇگىندە قالادا 104 مىڭ كاسىپورىن جۇمىس ىستەيدى. ولار 3,2 ترلن تەڭگەنىڭ ءونىمىن شىعارادى. شاعىن جانە ورتا بيزنەسپەن اينالىساتىنداردىڭ ۇلەسى بويىنشا استانا رەسپۋبليكا بويىنشا ەكىنشى ورىندا تۇر. بۇل قالا حالقىنىڭ 62 پايىزىن قۇرايدى. اكىمدىكپەن بىرلەسىپ قولعا الىناتىن باعدارلامالار وسى شوب ءوسىمىنىڭ وڭ ءۇردىسىن ساقتاۋعا جانە جاقسارتۋعا باعىتتالعان. ءبىر جاعىنان, نەسيە بويىنشا جەڭىلدىكتى شارتتار – جىلدىق 8,5 پايىز – ەلوردادا بارىنە بەلگىلى برەندتەردىڭ پايدا بولۋىنا نەمەسە سەرۆيستى جاڭا دەڭگەيگە كوتەرۋگە مۇمكىندىك بەرەدى, ال ەكسپو-2017 قارساڭىندا بۇل وتە ماڭىزدى, – دەدى «دامۋ» قورىنىڭ باسقارما توراعاسى قانىش تولەۋشين.
