نۇر-سۇلتان قالاسى ورتالىقتاندىرىلعان كىتاپحانالار جۇيەسىنە قاراستى كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحانادا اقىن تولقىن قابىلشانىڭ «وسى ءبىر ءسات ۇنايدى» اتتى اۋديوكىتابىنىڭ تۇساۋكەسەرى ءوتتى.
– تۇساۋكەسەردى اقىنمەن پوەزيالىق ولەڭ كەشى, وقىرمان مەن اۆتور اراسىنداعى ديالوگ جانە ونىمەن فوتوسەسسيا فورماتىندا وتكىزدىك. بۇل – ءبىزدىڭ «دىبىستاندىرىلعان الەم» جوباسى اياسىندا جارىققا شىعارىپ وتىرعان ەكىنشى اۋديوكىتابىمىز. ءبىزدىڭ كىتاپحانادا ءوز ستۋديامىز بار, اۋديوكىتاپتاردى سوندا جازامىز. وقىرمانداردىڭ سۇراۋى بويىنشا بۇل جولى تولقىن قابىلشانىڭ «وسى ءبىر ءسات ۇنايدى» اتتى كىتابىن جازىپ شىقتىق, – دەيدى كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحانانىڭ باسشىسى عالىم نۇرلانوۆ.
بەلگىلى ساياحاتشى-بلوگەر, جۋرناليست, «Media-trend» مەكتەبىنىڭ ديرەكتورى نۇربەك بەكباۋ كىتاپتىڭ تۇساۋىن كەستى. تەاتر اكتەرى مۇرات ءىلياستىڭ ورىنداۋىندا اقىن ولەڭدەرى وقىلىپ, وقىرماندارعا اۆتور قولتاڭباسى بار اۋديوكىتاپتار تاراتىلدى. تۇساۋكەسەر بارىسىندا اۆتور مەن وقىرماندار ەمەن-جارقىن اڭگىمەلەسىپ, شىعارماشىلىق تۋراسىندا پىكىر الماستى.
«دىبىستاندىرىلعان الەم» جوباسى بيىل باستالعان. ارنايى كىتاپحانانىڭ ستۋدياسىندا ءوزىنىڭ شىعارماشىلىعىن اۋديوكىتاپ تۇرىندە تەگىن باسىپ شىققىسى كەلەتىن كەز كەلگەن وقىرمان كىتاپحانا باسشىلىعىنا جۇگىنە الادى.
بوتاگوز ماراتقىزى
