الماتىداعى قازاقستان رەسپۋبليكاسى ۇلتتىق كىتاپحاناسىندا ۇلتتىق عىلىم اكادەمياسى, ا.بايتۇرسىنۇلى اتىنداعى ءتىل ءبىلىمى ينستيتۋتى مەن قاينار اكادەمياسىنىڭ ۇيىمداستىرۋىمەن نۇر-سۇلتان قالاسى قوعامدىق كەڭەسىنىڭ مۇشەسى, قوعام قايراتكەرى, ۇلتتىق عىلىم اكادەمياسىنىڭ اكادەميگى كارىمبەك قۇرماناليەۆتىڭ 60 جىلدىق مەرەيتويىنا ورايلاستىرىلعان «قازاق ءتىل ءبىلىمىنىڭ بۇگىنى مەن بولاشاعى» اتتى دوڭگەلەك ۇستەل وتىرىسى ءوتتى.
جيىندا قازاق ءتىل ءبىلىمىنىڭ قازىرگى جاعدايى مەن بولاشاعى تۋرالى جانە ءتىل ءبىلىمىن دامىتۋدىڭ جاڭا باعىتتارى جايلى كوكەيكەستى ماسەلەلەر تالقىلاندى. ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ باستاعان زەينەپ بازارباەۆا, كارىمبەك قۇرماناليەۆ, شەرۋباي قۇرمانبايۇلى سىندى ۇلتتىق عىلىم اكادەمياسىنىڭ اكادەميكتەرىمەن قاتار بەلگىلى ءتىلشى-پروفەسسورلار انار سالقىنباي, جاڭالىق بالتاباەۆا, راۋشان اۆاكوۆا بايانداما جاسادى. ءىس-شارا اياسىندا اكادەميك كارىمبەك قۇرماناليەۆتىڭ «قازاق تىلىندەگى سوزجاسامدىق ۇيا: تەوريا جانە پراكتيكا» اتتى كىتابى تانىستىرىلدى.
