سارىارقا اۋداندىق ارداگەرلەر كەڭەسىنىڭ قۇرىلعانىنا بيىل – 10 جىل. وسىعان بايلانىستى اۋداندىق ارداگەرلەر كەڭەسىنىڭ توراعاسى ەبەنعاپپاس احمەتوۆپەن سۇحباتتاسقان ەدىك.
– اۋداندىق ارداگەرلەر كەڭەسى قالاي قۇرىلىپ ەدى؟
– قوعامىمىزدا زەينەتكەرلەر مەن سوعىس ارداگەرلەرىنە قامقورلىقتىڭ قاجەتتىگىن ەسكەرگەن اۋداندىق اكىمدىك, 2004 جىلدىڭ 21 ساۋىرىندە سارىارقا اۋداندىق ارداگەرلەر كەڭەسىن قۇرۋدى قولعا الدى. وسى جەردە كەڭەستى العاش قۇرىسقانداردىڭ ەسىمدەرىن اتاماي كەتۋگە بولمايدى. سول كەزدەگى سارىارقا اۋدانى اكىمىنىڭ ورىنباسارى, قازىردە قر پارلامەنتى ءماجىلىسىنىڭ دەپۋتاتى ورازگۇل اسانعازى, استانا قالالىق ارداگەرلەر كەڭەسى توراعاسىنىڭ ورىنباسارى ساكەن تۇرسىنبەكوۆ, سوتسياليستىك ەڭبەك ەرى, قازىردە كوكتالداعى ارداگەرلەر كەڭەسىنىڭ ءتورايىمى, رەسپۋبليكالىق ارداگەرلەر كەڭەسى پرەزيديۋمىنىڭ مۇشەسى ساعيلا ەسەنجولوۆا, رەسپۋبليكالىق ارداگەرلەر كەڭەسىنەن ۆلاديمير مولوجاۆىي, پارتيا جانە كەڭەس قىزمەتكەرلەرى روزا اسىلبەكوۆا, اننا دانيلەنكو اۋداندىق ارداگەرلەرىنىڭ كەڭەسىن قۇرىپ, 87 دەلەگاتتىڭ ءبىراۋىزدى داۋىسىمەن ونىڭ العاشقى توراعاسى ەتىپ ساپار ءمۇستافيندى سايلاعان ەدى.
بۇگىنگى تاڭدا اۋداندىق ارداگەرلەر كەڭەسىنىڭ جانىندا 124 بىرلەستىك بار. جالپى, سارىارقا اۋدانىندا 25 000 زەينەتكەر تىركەلگەن. ۇلى وتان سوعىسىنا قاتىسقان 103 ارداگەرىمىز, سونىمەن قاتار ارداگەر جۋرناليستەرىمىز بەن جازۋشىلارىمىز دا بار.
– سوعىس ارداگەرلەرىمەن بايلانىستارىڭىز قانداي?
– ءيا, ادامزات تاريحىنداعى سۇراپىل سوعىس قازاق حالقىنا دا قاسىرەتىن تيگىزبەي قويمادى. قانشاما جاۋىنگەرلەرىمىز تۋعان جەرىنە ورالماي, جاۋ قولىنان قازا تاپتى. قانشاما وتباسى اكەلەرى مەن بالالارىنان ايىرىلىپ, جاپا شەكتى. ۇلى وتان سوعىسىنىڭ ارداگەرلەرى سونىڭ كۋاسى عانا بولعان جوق, جەڭىس ءۇشىن قاسىق قانى مەن جاندارىن اياماي فاشيستەرمەن شايقاستى. سول جىلداردا قازاقستاننان ۇلى وتان سوعىسىنا 1 ميلليون 700 مىڭنان اسا جاۋىنگەر مايدانعا اتتاندى. اقمولا وبلىسىنان 63 مىڭ جاۋىنگەر اتتانسا, ونىڭ 34 مىڭى ورالماعان. ول جەڭىس, ارينە, بىرلىكتىڭ ارقاسىندا كەلدى. قانشاما ۇلت وكىلى, ءبىر تۋدىڭ استىنا بىرىككەن حالىق بار كۇشىن سالىپ, وسى قاندى قىرعىندا جەڭىپ شىقتى. سول ءبىر سۇراپىل سوعىستى كورگەن قارت جاۋىنگەرلەرىمىز بەن ەلدە قالعان تىل مايدانگەرلەرى شىن مانىسىندە وتانىن سۇيگەن پاتريوت جاندار ەدى, ومىرگە دەگەن كوزقاراستارى دا ەرەكشە بولدى. ولار ءالى دە قازاق ەلى ءۇشىن ەڭبەك ەتىپ, ءارتۇرلى شارالارعا قاتىسىپ, بۇگىنگى جاستارعا ۇلگى-ونەگە كورسەتۋدە.
اۋدان ارداگەرلەرى جىل سايىن استانادا وتكىزىلەتىن سەنبىلىكتەرگە قاتىسىپ, ەلوردامىزدىڭ گۇلدەنىپ-كوركەيۋىنە ۇلەس قوسۋمەن بىرگە, ايتۋلى مەرەكەلەرگە وراي ۇيىمداستىرىلاتىن مازمۇندى دا قىزىقتى شارالارعا قۇرمەتتى قوناق رەتىندە شاقىرىلادى. سونداي-اق, ارداگەرلەر ەلباسىنىڭ جىل سايىنعى قازاقستان حالقىنا ارناعان جولداۋىن تالقىلاۋعا بەلسەنە اتسالىسادى.
ارامىزدا ونەرلى ارداگەرلەر دە كوپ. كەڭەس جانىنان دومبىرا-فولكلورىق ءانسامبلىن قۇرعان كەنجەتاي جانۇزاقوۆانىڭ قاسىندا نەبىر ونەرلى, زەينەت جاسىنداعى اپالارىمىز ءجۇر. ول كىسى اۋداندىق ارداگەرلەر كەڭەسى جانىنان شاحماتشىلار كلۋبىن دا ۇيىمداستىرعان بولاتىن, ءوزى – سول شاحمات كومانداسىنىڭ كاپيتانى. ولار ەسىل اۋدانىندا وتكەن قالالىق شاحمات تۋرنيرىندە كۋبوك جەڭىپ الدى.
«ءتورت ۇرپاق وكىلىنىڭ كەزدەسۋى» اتتى مادەني شارانى دا ەرەكشە اتاپ ايتۋعا بولادى. استاناعا ستولىپين كەزىندە جەر اۋدارىلىپ كەلگەندەر مەن قالانىڭ وركەندەۋىنە ۇلەس قوسقاندار, ۇلى وتان سوعىسىنا قاتىسقاندار جانە تىڭ يگەرۋشىلەرمەن بولعان بۇل كەزدەسۋ وتە مازمۇندى ءوتتى. ارداقتى اعا بۋىن وكىلدەرى, سونداي-اق, «قازاقستان» كونتسەرت زالى جانە باسقا دا مادەني وشاقتارداعى مەرەكەلەرگە, كورمە زالدارى مەن مۋزەيلەرگە قۇرمەتتى قوناق رەتىندە شاقىرىلىپ تۇرادى.
كەڭەس جۇمىسىن ۇيىمداستىرۋ مەن قانداي دا ءبىر مەرەكەلىك شارانى وتكىزۋ ءۇشىن قاراجات كەرەك ەكەنى بەلگىلى. مىنە, وسى ورايدا بەلسەندى زەينەتكەرلەر زىرىلداپ ءجۇرىپ دەمەۋشى ىزدەيدى. سونداي ادامداردىڭ اتتارىن ايتىپ ءوتۋ – بىزگە مىندەت. ولار – سارا ينەرباەۆا مەن گالينا مۇحتاروۆا. سولاردىڭ ۇيىمداستىرۋمەن ورازا ايتى مەن قۇربان ايتى, حالىقارالىق ايەلدەر مەرەكەسى وتكىزىلدى.
– ارداگەرلەردى ەمدەۋ-ساۋىقتىرۋ ورىندارىنا جىبەرىپ تۇرۋعا مۇمكىندىكتەر قاراستىرىلعان با؟
– سوعىس ارداگەرلەرىنىڭ ەڭ جاسى – بۇگىندە 90-دى القىمداپ قالعاندار. بىرەن-سارانى بولماسا, ولاردىڭ ەل ارالاپ, كۋرورتتارعا بارۋعا جاعدايلارى جوق. سوندىقتان, ولارعا بار مۇمكىندىك ۇيدە جاسالىپ جاتىر. ەكى جىل بولدى, ءبىزدىڭ اۋدان زەينەتكەرلەرى, نەگىزىنەن بەلسەندىلەرىمىز تايتوبەدەگى «نۇرا» دەمالىس ۇيىنە تەگىن جولداما الىپ ءجۇر. بيىل ءبىزدىڭ اۋداننان 45 ادام سول جەرگە بارىپ, 10 كۇن دەمالىپ قايتتى.
ءبىز وتكىزىپ جاتقان قانداي شاراعا بولسىن اۋدان اكىمشىلىگى ۇنەمى كومەكتەسىپ وتىرادى. سول ءۇشىن دە ولارعا العىسىمىز شەكسىز. ءبىزدىڭ ۇيىمىمىزدا گالينا سلەپتسوۆانىڭ باسقارۋىمەن قۇرىلعان ارداگەرلەردىڭ دەنساۋلىعىن ساقتاۋ كوميسسياسى جۇمىس ىستەيدى. ون بەس مەديتسينالىق مەكەمە جانىنان قۇرىلعان بۇل كوميسسيا ارداگەرلەردىڭ ءتىسىن سالدىرۋعا تەگىن جولداما الىپ بەرۋدە. مەديتسينالىق كومەك سۇراعان ادامدارعا كوميسسيا كەز كەلگەن ەمحانا, اۋرۋحانالارمەن بايلانىس جاساپ, ماسەلەلەرىن شەشىپ, قول ۇشىن بەرۋدە. وسى ورايدا قالاداعى №4 ەمحانا ارداگەرلەرگە جاقسى قىزمەت كورسەتىپ وتىر. ولار ءۇشىن جەكە ءبولىم دە اشىپ قويعان. جالپى, اۋدانىمىزدىڭ ارداگەرلەرى قاي جاعىنان الىپ قاراساق تا قامقورلىق قۇشاعىندا.
