«قولجەتىمدى باسپانا» باعدارلاماسى بويىنشا قۇجات قابىلداۋ باستالادى دەگەلى جۇرتشىلىقتا مازا جوق. ولاردىڭ كوڭىلىن كۇپتى ەتكەن سۇراقتار دا بارشىلىق. سونىڭ ءبىرى – جىلجىمايتىن مۇلىككە مەنشىك ۇلەسى بار جاستار اتالمىش باعدارلاماعا قاتىسا الا ما دەگەن ساۋال. بۇل تۋرالى استانا قالاسى تۇرعىن ءۇي باسقارماسى باسشىسىنىڭ ورىنباسارى رۋسلان احمەتوۆتەن بىلگەن ەدىك.
ەلوردالىق باسقارما باسشىسىنىڭ ورىنباسارى حابارلاعانداي, اتا-اناسىنىڭ پاتەرىنە مەنشىكتىك قۇقىعى بار جاستار «قولجەتىمدى باسپانا» باعدارلاماسىنا قاتىسا الادى. جىلجىمايتىن مۇلىككە ۇلەستىك مەنشىگى وعان ەش كەدەرگى ەمەس.
– ەلىمىزدىڭ «تۇرعىن ءۇي قاتىناستارى» زاڭى بويىنشا, مەملەكەتتىك باعدارلاماعا قاتىسۋعا نيەتتى جاس جۇپتاردىڭ بىرىندە جىلجىمايتىن مۇلكى, ياعني, جەكەمەنشىك ءۇيى بولسا, وندا ول مەملەكەتتىك باعدارلاماعا قاتىسىپ, ءۇي الا المايدى. ال, قانداي دا ءبىر جىلجىمايتىن مۇلىككە, مىسالى, اتا-اناسىنىڭ پاتەرىنە مەنشىك ۇلەسى بولسا, وندا باعدارلاما بويىنشا ءۇي الۋعا قۇقىسى بار. ول ءۇشىن «قولجەتىمدى باسپاناعا» قاتىسۋ كەزىندە قۇجاتتار تىزىمىنە جىلجىمايتىن مۇلىكتى يەلەنۋگە ۇلەسى بارى جونىندەگى زاڭدىق قۇجاتتى قوسۋ كەرەك. ەگەر نەگىزگى ۇلەسكەر – باعدارلاماعا قاتىسۋشى بولسا, وندا وعان ارەندالىق ءۇي بەرۋدەن باس تارتىلادى, – دەيدى رۋسلان احمەتوۆ.
تاعى دا ەسكەرتە كەتەيىك, «قولجەتىمدى باسپانا» باعدارلاماسى بويىنشا جاس وتباسىلار ءتيىستى قۇجاتتاردى 2-14 ماۋسىم ارالىعىندا قالاداعى حالىققا قىزمەت كورسەتۋ ورتالىقتارىندا تاپسىرا الادى. باعدارلاماعا قاتىسۋعا ءۇمىتتى جۇپتاردىڭ جاسى 29-عا جەتپەگەن بولۋى كەرەك. ءارى نەكەدە كەمى ەكى جىل تۇرۋى ءتيىس. استانادا تىركەلگەن ۋاقىتى دا كەمى ەكى جىل بولۋى شارت.
قىمبات نۇرعالي
