قپل-دىڭ 17-تۋرىندا «استانا» سىرت الاڭدا قوستانايدىڭ «توبىلىمەن» كەزدەسىپ, تەڭ تارقاستى.
ەل بىرىنشىلىگىندە ەڭ ءبىرىنشى كەلە جاتقان «استاناعا» ءۇشىنشى ورىنداعى «توبىلدىڭ» اجەپتاۋىر قارسىلىق كورسەتۋگە الەۋەتتى ەكەنى انىق بولدى. ويتكەنى جىل سايىن ليگانىڭ باستى ءفاۆوريتى سانالاتىن ەكى كوماندانىڭ ءبىرى «قايرات» ءدال وسى قوستانايدىڭ كومانداسىنا ەسە جىبەرگەن ەدى.
سوندىقتان چەمپيون اتاعىن كەزەكتى ماۋسىمدا قورعاپ جاتقان «استانا» بۇل ويىندا ارقانى كەڭگە سالا المادى. ونىڭ ۇستىنە الدا چەمپيوندار ليگاسىنىڭ ىرىكتەۋ كەزەڭى كۇتىپ تۇر.
دەگەنمەن قوس كوماندانىڭ دا ءوز دەگەنىن جاساۋىنا كۇرت بۇزىلعان كۇن رايى ايتارلىقتاي كەدەرگى كەلتىردى. ەكى جاقتا دا ەسەپتى اشاتىنداي مۇمكىندىكتەر بولدى. بىراق ءتۇپتىڭ تۇبىندە تارازى باسى ەشقايدا اۋمادى. ەسەپ – 0:0.
«استانا» اتتىڭ باسىن تارتقان كەزدە «قايرات» ايانىپ قالمادى. ءوز الاڭىندا «ەرتىسكە» جاۋاپسىز ءتورت گول سوعىپ, ەس جيعىزبادى. قالعان ويىندارعا كەلسەك, «ورداباسى» «قايساردان» – 1:2, «شاحتەر» «اقجايىقتان» – 1:2 ەسەبىمەن ۇتىلدى. ال «قىزىلجار» مەن «اقتوبە» ويىنى 2:1 ەسەبىمەن اياقتالسا, «جەتىسۋ» – «اتىراۋ» ماتچىندا 2:2 ەسەبى تىركەلدى.
