قازاقستان ۇلتتىق قۇراماسىن يندونەزيادا وتەتىن XVIII جازعى ازيا ويىندارىنا شىعارىپ سالۋ سالتاناتتى ءراسىمى ءوتتى.
سالتاناتتى راسىمگە ازيادا الدىنداعى سوڭعى جاتتىعۋ جيىندارىن الماتىدا وتكىزگەن سپورتتىق گيمناستيكا, ساداق اتۋ, نىسانا كوزدەۋ, ستەند اتۋ, ەركىن كۇرەس, سپورتتىق قۇزعا ورمەلەۋ, سۋ دوبى جانە ۆولەيبول كوماندالارى قاتىستى.
– قۇراما كوماندالاردىڭ ازياداعا تىڭعىلىقتى دايىندالۋى ءۇشىن بارلىق مۇمكىندىك جاسادى. قازاقستان ۇوك پرەزيدەنتى تيمۋر قۇلىباەۆ سپورتشىلاردى كەشەندى-عىلىمي توپتارمەن, تەحنيكالىق ماماندارمەن قامتاماسىز ەتىپ, وليمپيادالىق سپورت تۇرلەرى بويىنشا وقۋ-جاتتىعۋ جيىندارىن تولىقتاي وتكىزۋدى ءوز باقىلاۋىنا الدى. ءبىز بۇل ەڭبەك اقتالىپ, ءوز جەمىسىن بەرەدى دەپ ۇمىتتەنەمىز. قازاقستان اتلەتتەرى قۇرلىقتىق دودادا ءداستۇرلى تۇردە ۇزدىكتەر قاتارىنان كورىنەدى. سوندىقتان سپورتشىلارىمىز بيىلعى ويىنداردا دا جانكۇيەر قۋانىشىن ەسەلەي تۇسەدى دەپ سەنەمىن, – دەدى قازاقستان ۇوك باس حاتشىسى ەلدوس رامازانوۆ.
ازيا ويىندارىنا قازاقستان قۇراماسىن باستاپ باراتىن سپورت ديرەكتسياسىنىڭ جەتەكشىسى ەلسيار قاناعاتوۆ قۇرلىق دوداسىنىڭ الدىندا سپورتشىلارعا ساتتىلىك تىلەدى.
جازعى ازيا ويىندارى 18 تامىز كۇنى باستالادى. بايراقتى باسەكەدە ەل نامىسىن 440 سپورتشى قورعايدى. ونىڭ ىشىندەگى 404 سپورتشى 25 وليمپيادالىق سپورت تۇرىنەن باق سىنايدى. قازاقستان تۋىن بوكسشى ءابىلحان امانقۇل كوتەرىپ شىعادى.
ۇلتتىق قۇرامانىڭ ساپىندا استانا قالاسىنان 53 سپورتشى 20 سپورت تۇرىنەن باق سىنايدى. ونىڭ ىشىندە 8 قاتىسۋشى 4 سپورت تۇرىنەن پارازيالىق ويىنداردا سايىسقا تۇسەدى.
جاكارتاداعى ازيا ويىندارىندا جالپى ەسەبى 462 مەدالدار جيىنتىعى ساراپقا سالىنادى. ونىڭ 363-ءى وليمپيادالىق سپورت تۇرلەرىنىڭ ۇزدىكتەرىنە ۇلەستىرىلەدى.
بيىل ازيا ويىندارىنىڭ باعدارلاماسىنان نىسانا كوزدەۋ جانە ستەند اتۋدان كوماندالىق جارىس پەن بوكستان ەرلەر اراسىندا اۋىر سالماق دارەجەلەرى (81 كەلى, 91 كەلى, +91 كەلى) الىنىپ تاستالدى.
قۇرلىق دوداسى جاكارتا جانە پالەمبانگ قالالارىندا وتەدى. اتلەتيكالىق اۋىلدار ەكى قالادا دا ورنالاسقان.
جاكارتادا وتەتىن جارىستار مىنالار: جەڭىل اتلەتيكا, بوكس, دزيۋدو, كۇرەس تۇرلەرى, ۆەلوسپورت (ترەك, شوسسە, ماۋتينبايك), سۋ دوبى, قازىرگى بەسسايىس, تاەكۆوندو, سەمسەرلەسۋ, كاراتە, رەگبي, سۋدا ءجۇزۋ, گاندبول, سينحروندى ءجۇزۋ, ساداق اتۋ, كوركەم گيمناستيكا, جەلكەندى سپورت, كوگالداعى حوككەي, ەسكەك ەسۋ (سلالوم), سپورتتىق گيمناستيكا, ۆولەيبول, گولف, باسكەتبول, باسكەتبول 3ح3, باتۋتتا سەكىرۋ.
ال پالەمبانگتا اكادەميالىق ەسۋ, بايداركا مەن كانوەدە ەسۋ, نىسانا كوزدەۋ, ستەند اتۋ, ترياتلون, جاعاجاي ۆولەيبولى, سپورتتىق قۇزعا ورمەلەۋ جانە تەننيس سياقتى سپورت تۇرلەرىنەن جەڭىمپازدار انىقتالادى.
جاكارتادا رەسمي تۇردە قازاقستان بايراعىن كوتەرۋ ءراسىمى 16 تامىز كۇنى وتەدى. پالەمبانگتاعى اتلەتيكالىق اۋىلعا ءبىرىنشى بولىپ اكادەميالىق ەسۋشىلەر كومانداسى اتتاندى. 12 تامىز كۇنى گاندبول, سۋ دوبى جانە باسكەتبولدان ايەلدەر كومانداسى, سونداي-اق گرەك-ريم كۇرەسىنىڭ بالۋاندارى جەتتى. يندونەزياعا بارلىق سپورتشىلار الدىن الا بەكىتىلگەن كەستە بويىنشا ساپارعا شىعادى.
قازاقستان قۇراماسىنىڭ بارلىق سپورتشىلارى كەشەندى-عىلىمي توپ ماماندارىمەن جابدىقتالعان. اتالعان توپ مۇشەلەرى قازاقستان ۇوك باستاماسىمەن وليمپيادالىق سپورت تۇرىندەگى كوماندالارمەن جۇمىس ىستەي باستادى. جاكارتا مەن پالەمبانگتا دارىگەرلەر شتابى, پسيحولوگتار مەن كەزەكشى ماسساجشىلار تاۋلىك بويى قىزمەت ەتەدى.
ازيا ويىندارى 2 قىركۇيەككە دەيىن جالعاسادى.
