بۇگىندە ەلىمىزدە ءدىني راسىمدەردى ورىنداۋدا ەشبىر كەدەرگى جوق. سونىڭ ءبىرى قاسيەتتى مەككە مەن ماديناعا قاجىلىققا بارۋعا ەركىن جول اشىلدى. 1991 جىلى تۇڭعىش رەت قازاقستاننان قاجىلىققا نەبارى 21 ادام اتتانسا, بيىل 3000 ادامعا كۆوتا ءبولىنىپ وتىر.
قۇندىلىعى باسىم قۇلشىلىق
قوعامدىق دامۋ مينيسترلىگى ءدىن ىستەرى كوميتەتى توراعاسىنىڭ ورىنباسارى بالعابەك مىرزاەۆتىڭ ايتۋىنشا, مەككە, ماديناعا ساپار شەگiپ, قاجىلىق پارىزدارىن وتەۋ باقىتىنا يە بولعان باۋىرلارىمىزدىڭ قاتارىندا ەلىمiزدە تۇراتىن 26 ۇلتتىڭ وكىلى تۇگەل قامتىلعان ەكەن.
«جالپى, قاجىلىق دەگەن – ءسان-سالتاناتىمەن سەرۋەندەۋ, قىزىقتاپ قىدىرۋ ەمەس, قيىندىعى مەن ماشاقاتى قىرۋار, ورىندالۋى اۋىر, ءاربىر مۇسىلماننىڭ جاۋاپكەرشىلىگى جوعارى پارىزى ءارى جاراتقان اللانىڭ سىناعى. سوندىقتان قاجىلىق – ادامدى سابىرلىلىق پەن توزىمدىلىككە, شىدامدىلىق پەن شۇكىرشىلىككە, كىشىپەيىلدىك پەن ىزگىلىككە تاربيەلەيتىن تەڭدەسى جوق قۇلشىلىق ءراسىمى» دەيدى ول.
كۆوتا قالاي ءبولىندى؟
وتكەن اپتادا قاجىلىققا باراتىن ازاماتتاردىڭ العاشقى لەگى جولعا شىقتى. ايتا كەتەيىك, بيىل ساۋد ارابيا كورولدىگىنىڭ قاجىلىق مينيسترلىگى ەلىمىز ءۇشىن 3000 ادامعا كۆوتا بولگەن. بۇل بىلتىرعىمەن سالىستىرعاندا 500 كۆوتاعا ارتىق. قازاقستان مۇسىلماندارى ءدىني باسقارماسى اتالمىش 3000 كۆوتانى 18 تۋريستىك فيرماعا ءبولىپ بەرگەن.
«ەلىمىزدە قاجىلىققا كەز كەلگەن ازامات كەزەكسىز جانە بىرنەشە مارتە بارا الادى. ماسەلەن, 210 ملن مۇسىلمان تۇراتىن يندونەزيادا ازاماتتار قاجىلىققا بارۋ كەزەگىن 6 جىلعا جۋىق كۇتەدى ەكەن. ال تۇركيادا كەزەكتە ءجۇز مىڭداي مۇسىلماندار تۇرسا, وزبەكستاندا بۇل كەزەكتى بەس جىل, تاجىكستان مەن قىرعىزستاندا 2-3 جىل كۇتۋدە. ءتىپتى ساۋد ارابياسىنىڭ وزىندە مەككەدەن باسقا قالالاردان قاجىلىققا بەس جىلدا ءبىر رەت كەلۋگە عانا رۇقسات ەتىلەدى ەكەن. قازىردىڭ وزىندە الەمدە العاشقى قاجىلار لەگى ساۋد ارابياسىنا بارا باستادى» دەيدى بالعابەك مىرزاەۆ.
قاجىلىق ميسسياسى قاداعالايدى
بۇعان دەيىن ەلىمىزدەن ءمادينا, جيددا قالالارىنا تىكەلەي رەيس بولمادى. وسىعان بايلانىستى قاجىلىققا باراتىن ازاماتتار تۇركيانىڭ نەمەسە بىرىككەن اراب امىرلىكتەرى اۋەجايلارىندا ءبىراز ۋاقىتىن جوعالتاتىن. ەندى بۇل ماسەلە تۇبەگەيلى شەشىمىن تاپتى. سەبەبى, استانا, الماتى, شىمكەنت جانە اقتاۋ قالالارىنان تىكەلەي رەيس ۇيىمداستىرىلدى. نەبارى 5 جارىم ساعات ىشىندە جول اۋىرتپالىعىن سەزىنبەستەن جەتۋگە مۇمكىندىك بار.
جالپى, قاجىلىق – قازاقستان مۇسىلماندارى ءدىني باسقارماسىنىڭ تىكەلەي ۇيىمداستىراتىن ساپارى. سوندىقتان باسقارما جانىنان قاجىلىق ساپارىن ۇيىمداستىرۋمەن اينالىساتىن قاجىلىق ميسسياسى جۇمىس ىستەيدى. ونىڭ قۇرامىندا ۋاعىز-ناسيحات جانە دارىگەرلەر توبى قامتىلعان.
مىندەتتى ۆاكتسينا – 22 مىڭ تەڭگە
قاجىلىققا بارۋدىڭ وزىندىك تالاپتارى مەن ءتارتىبى بار. قازاقستان مۇسىلماندارى ءدىني باسقارماسىنىڭ قاجىلىق ءبولىمى رەفەرەنتى نۇرقانات بايزاقوۆتىڭ ايتۋىنشا, بيىل 18 تۋريستىك كومپانيا قاجىلىق ساپاردى قامتاماسىز ەتۋگە قابىلەتتى دەپ تانىلىپ, اككرەديتاتسيادان وتكەن.
ال ساۋد ارابيانىڭ دەنساۋلىق ساقتاۋ مينيسترلىگىنىڭ تالابى بويىنشا, قاجىلىققا باراتىن ازاماتتار مەنينگيتكە قارسى ەكپە سالدىرۋى كەرەك. ەگەر ەكپە سالىنعانى تۋرالى ارنايى سەرتيفيكات بولماسا, ۆيزا بەرىلمەيدى.
«الەمنىڭ 160 مەملەكەتىنەن 2 ميلليونعا جۋىق حالىق جينالعان ايماقتا حالىقتىڭ تىعىزدىعى ارتىپ, ادامداردا قولايسىزدىق تۋىندايدى. بۇل قاجىلاردىڭ دەنساۋلىعىنا الاڭداعاندىقتان تۋىنداعان تالاپ» دەيدى قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشين. مەنينگوكوكك ينفەكتسياسىنا قارسى ەكپەنى اتىراۋ, جامبىل, وڭتۇستىك قازاقستان وبلىستارى مەن الماتى, استانا قالالارىندا الۋعا بولادى. مىندەتتى ۆاكتسينا قۇنى – 22 مىڭ تەڭگە. ال جەكەمەنشىك كلينيكالاردا 30-35 مىڭ تەڭگەگە دەيىن بارادى.
بىرىڭعاي فورما بەكىتىلدى
بيىلدان باستاپ قاجىلارعا ءار ءتۇرلى كيىممەن جولعا شىعۋعا تىيىم سالىندى.
بەكىتىلگەن بىرىڭعاي كيىمگە سايكەس, ولاردىڭ كيىمى نەگىزىنەن اق ءتۇستى بولادى. ال ايەل ادامداردىڭ كوك ءتۇستى كۇرتەشەسى بار. كيىمنىڭ ارقا جاعىندا «قازاقستان» دەپ جازىلعان. سونىمەن قاتار جانىنا قمدب لوگوتيپى مەن ءار تۋرفيرما ءوز بەلگىسىن قويا الادى. وڭ جاق يىعىندا قازاقستان تۋىنىڭ سۋرەتى بەينەلەنگەن. سونىمەن, 2018 جىلعى قاجىلىق ماۋسىمىندا ەل ازاماتتارى 9-15 تامىز ارالىعىندا ساپارعا اتتانىپ, 27 تامىز – 1 قىركۇيەك ارالىعىندا ەلگە ورالاتىن بولادى.
