استانادا بوكستان ءVى قازاقستان رەسپۋبليكاسى پرەزيدەنتىنىڭ كۋبوگى ءۇشىن وتەتىن حالىقارالىق تۋرنير جالاۋىن كوتەردى. بيىلعى جارىستا 15 ەلدىڭ بوكسشىلارى ونەر كورسەتەدى.
بۇكىلالەمدىك بوكس قاۋىمداستىعى اياسىندا وتەتىن ايتۋلى جارىستىڭ دەڭگەيى جىل سايىن ارتىپ كەلەدى. بيىلعى تۋرنيردە ايەلدەر بوكسىن دا كورەتىن بولامىز. بۇرىمدى بوكسشىلار ءتورت سالماقتا قولعاپ تۇيىستىرەتىن بولادى. ال ەرلەر اراسىنداعى 10 سالماقتا وتە تارتىستى جەكپە-جەكتەر بولاتىنى قازىردەن-اق بەلگىلى بولىپ وتىر.
ءتۋرنيردىڭ اشىلۋ سالتاناتىندا استانا قالاسى اكىمىنىڭ ورىنباسارى ەرمەك امانشاەۆ ءسوز سويلەپ, جارىسقا قاتىسۋشىلارعا ساتتىلىك تىلەدى.
– بيىل التىنشى رەت ءوتىپ وتىرعان قازاقستان رەسپۋبليكاسى پرەزيدەنتىنىڭ كۋبوگى تۋرنيرىنە بىرنەشە وليمپيادا ويىندارىنىڭ چەمپيوندارى مەن جۇلدەگەرلەرى, سونىمەن قاتار الەم بىرىنشىلىكتەرى مەن قۇرلىق چەمپيوناتىنىڭ جۇلدەگەرلەرى قاتىسۋدا. بۇل – جارىستىڭ حالىقارالىق دەڭگەيىنىڭ جوعارى ەكەنىن بىلدىرەتىن كورسەتكىش. بيىل ءبىزدىڭ استانامىز ءوزىنىڭ 20 جىلدىق مەرەيتويىن اتاپ وتەدى. وسى جارىس تا سول مەرەيلى مەرەكەنىڭ اياسىندا وتكىزىلىپ وتىر. سوندىقتان بارشاڭىزعا قالا باسشىلىعى اتىنان استاناعا قوش كەلدىڭىزدەر دەمەكپىن. شارشى الاڭدا سىزدەرگە ساتتىلىك تىلەيمىن, – دەدى ەلوردا اكىمىنىڭ ورىنباسارى ە.امانشاەۆ.
جارىس «داۋلەت» سپورت كەشەنىندە كۇن سايىن ساعات 13.00-دە باستالادى. پرەزيدەنت كۋبوگىنىڭ جەڭىمپازدارى 10 ماۋسىم كۇنى فينالدىق جەكپە-جەكتەردە انىقتالادى.
