قالانى جەتكىلىكتى ازىق-تۇلىكپەن جابدىقتاۋ, كوكونىس ساقتاۋ قويمالارى مەن جىلىجايلاردىڭ جاي-كۇيى, اۋىل شارۋاشىلىق جارمەڭكەلەرىن وتكىزۋدىڭ الەۋمەتتىك از قامتىلعاندار ءۇشىن ماڭىزى, تاعى دا باسقا ماسەلەلەر تۋرالى استانا قالاسى اۋىل شارۋاشىلىعى باسقارماسىنىڭ باستىعى مۇرات دالاباەۆ اڭگىمەلەيدى.
– باعانى تۇراقتاندىرۋ ءۇشىن قانداي جۇمىستار جۇرگىزىلۋدە؟
– الەۋمەتتىك ماڭىزدى ازىق-تۇلىك تاۋارلارىنا نەگىزسىز باعا وسۋىنە جول بەرمەۋ ماقساتىندا جۇمىس توبى قۇرىلىپ, ءىس-شارالار جوسپارى بەكىتىلدى. قالادا سىيىمدىلىعى الپىس توننا كوكونىس ساقتاۋ قويماسى بار. قازىر جالپى ساقتاۋ كولەمى 21 850 توننالىق 5 كوكونىس قويماسى جۇمىس ىستەپ تۇر.
ماۋسىمارالىق كەزەڭدە قالاعا جەتى مىڭ بەس ءجۇز توننا جىلىجاي ونىمدەرىنىڭ قاجەتتىلىگى انىقتالدى. وسىعان بايلانىستى جىلىنا قۋاتتىلىعى 2 500 توننا ءونىم بەرەتىن ەكى جىلىجاي كەشەنى – «استانا ەكو ستاندارت» جشس مەن «ناۋرىزالين» جك پايدالانۋعا بەرىلگەن. قازىرگى كەزدە قۋاتتىلىعى 3650 توننا جىلىجاي قۇرىلىسى جۇرگىزىلىپ, جالپى ونىمدىلىگى 5 200 توننادان جوعارى 3 جىلىجاي سالۋ جوبالانۋدا.
سونىمەن قاتار استانا قالاسىنىڭ اكىمدىگى مەن ساۋدا ۇيىمدارى اراسىندا جىل سايىن استانا قالاسى بويىنشا الەۋمەتتىك ماڭىزى بار ازىق-تۇلىك تاۋارلارىنا كوتەرمە-بولشەك ساۋدانى جۇزەگە اسىراتىن مەموراندۋمعا قول قويىلدى. قالانىڭ ساۋدا ۇيىمدارىنداعى ازىق-تۇلىك باعاسىنا اكىمدىكتىڭ قىزمەتكەرلەرى كۇن سايىن مونيتورينگ جۇرگىزەدى.
– الەۋمەتتىك پاۆيلونداردىڭ جۇمىسى قالاي?
– ازىق-تۇلىك قاۋىپسىزدىگى باعدارلاماسىن جۇزەگە اسىرۋ ءۇشىن باعانىڭ تۇراقتاندىرىلۋى مەن الەۋمەتتىك ماڭىزدى تاۋارلاردى ساتۋعا شىعاراتىن ساۋدا پاۆيلوندارى «سارىارقا-اگرو» جشس-ىنا بەرىلدى. «سارىارقا-اگرو» – «Astana» الەۋمەتتىك كاسىپكەرلىك كورپوراتسياسى» ۇك» اق ەنشىلەس كاسىپورنى. ماقساتى – استانا قالاسىندا ازىق-تۇلىك بەلدەۋىن قۇرۋ.
ساۋدا پاۆيلوندارىن قالا سىرتىنا شىعارۋ تۋرالى استانا قالاسى ءماسليحاتىنىڭ قاۋلىسىنا وراي وسى سەرىكتەستىك باسقارۋشى كومپانيانى جالعىز وپەراتور رەتىندە بۇرىنعىسىنشا الەۋمەتتىك از قامتىلعاندارعا ازىق-تۇلىك باعاسى جونىنەن جەڭىلدىك جاساۋ ءۇشىن تارتىپ وتىر.
قالا اۋماعىندا اتالعان پاۆيلونداردى قويۋعا رۇقسات بولماۋىنا بايلانىستى قازىر ۋاكىلەتتى ورگاندار قالا ماڭىنان جەر تەلىمىن ءبولۋ ماسەلەسىن قاراستىرۋدا.
– باسقا دا قانداي ءىس-شارالار بار؟
– اۋىل شارۋاشىلىعى ونىمدەرىن كوتەرمە-بولشەك ساۋداعا شىعاراتىن كوپ سالالى ساۋدا-لوگيستيكا كەشەنى قۇرىلىسىنىڭ جوباسى قولعا الىندى.
تۇراقتى تۇردە اۋىل شارۋاشىلىعى ءجارمەڭكەلەرى وتكىزىلۋدە. تاعى ءبىر اتاپ وتەرلىگى, اكىمدىك «قازاقستان قۇس شارۋاشىلىعى وداعىمەن» «قۇس شارۋاشىلىعى سالاسىندا ءوزارا تۇسىنىستىك پەن ىنتىماقتاستىق تۋرالى» مەموراندۋم جاساستى. مەموراندۋم ىشكى نارىقتا وتاندىق قۇس شارۋاشىلىعى ونىمدەرىن قولجەتىمدى باعامەن قامتاماسىز ەتۋگە باعىتتالعان.
