باۋىرلاس ەلدەردىڭ باسقوسۋى
استاناداعى «BI Village Deluxe-1» كوتتەدج قالاشىعىندا تاتارستان رەسپۋبليكاسىنىڭ قازاقستانداعى وكىلەتتى وكىلدىگى رەسمي تۇردە اشىلدى. بۇل سالتاناتتى شاراعا استانا قالاسىنىڭ اكىمى اسەت يسەكەشەۆ, تاتارستان رەسپۋبليكاسىنىڭ پرەزيدەنتى رۇستەم ميننيحانوۆ قاتىستى.
سونداي-اق, دەلەگاتسيا قۇرامىندا قازاقستانداعى رەسەي ىنتىماقتاستىعى وكىلدىگىنىڭ جەتەكشىسى, رەسەي فەدەراتسياسىنىڭ قازاقستانداعى ەلشىلىگىنىڭ كەڭەسشىسى ۆيكتور نەفەدوۆ جانە باسقالارى بولدى.
سالتاناتتى شارادا ءسوز العان استانا قالاسىنىڭ اكىمى اسەت يسەكەشەۆ ەكى ەل اراسىنداعى دوستىق قارىم-قاتىناستىڭ جاقسى دامىپ كەلە جاتقانىن تىلگە تيەك ەتتى.
– استانا قالاسىنان جاڭا وكىلدىكتىڭ اشىلۋى – ءبىزدىڭ جاقىن دوستىعىمىزدىڭ ايقىن دالەلى. ءبىزدىڭ ەلىمىز كوپتەگەن سالا بويىنشا ىنتىماقتاستىعىن جىل وتكەن سايىن ورىستەتۋ ۇستىندە. جاڭادان اشىلعان وكىلدىك ءبىزدىڭ قارىم-قاتىناسىمىزعا جاڭا سەرپىن بەرەتىنىنە سەنىمدىمىن, – دەدى اسەت ورەنتايۇلى.
تاتارستان رەسپۋبليكاسىنىڭ پرەزيدەنتى رۇستەم ميننيحانوۆ ءوز كەزەگىندە قازاقستاندى ستراتەگيالىق ارىپتەسى سانايتىنىن, ەكى ەل اراسىندا ەكونوميكالىق, مادەني-رۋحاني بايلانىس نىعايىپ كەلە جاتقانىنا ريزاشىلىعىن ءبىلدىردى.
– قازاقستانعا كەلگەن سايىن ءسىزدەردىڭ جەتىستىكتەرىڭىزدى كورىپ, ءبىز دە قۋانامىز. وسىندا تاتار دياسپوراسى وكىلدەرىمەن دە جاقىن تانىسۋعا مۇمكىندىك الىپ, تاتار ۇلتىنىڭ ءتىلى مەن ءدىنى ساقتالۋىنا, مادەنيەتىنىڭ دامۋىنا جاقسى جاعدايلار جاسالىپ جاتقانىنا دا كۋا بولدىم. وسىنداي قولداۋلارى ءۇشىن قر پرەزيدەنتى نۇرسۇلتان ءابىشۇلىنا, استانا قالاسىنىڭ اكىمى اسەت ورەنتايۇلىنا بارشا دياسپورا اتىنان, ءوز اتىمنان زور العىس سەزىمىمدى بىلدىرەمىن! – دەپ اياقتادى ول ءسوزىن.
سالتاناتتى شاراعا استاناداعى تاتار-باشقۇرت دياسپوراسىنىڭ وكىلدەرى دە كوپتەپ جينالعان ەدى. كوپشىلىكتىڭ الدىندا وكىلدىكتى سالتاناتتى جاعدايدا اشقان استانا قالاسى اكىمى مەن تاتارستان رەسپۋبليكاسىنىڭ پرەزيدەنتى كوپشىلىكتى ىشكە باستادى. ولار ۇلكەن عيماراتتىڭ ءىشىن اسىقپاي ارالاپ, جاڭا وكىلدىكتىڭ جۇمىس باعىتى جايلى دا پىكىر الماستى.
ورايى كەلگەندە ايتا كەتەيىك, تاتارستان رەسپۋبليكاسىنىڭ قازاقستانداعى وكىلەتتى وكىلدىگى العاش رەت 1997 جىلى 25 تامىزدا ەكى ەل پرەزيدەنتتەرىنىڭ اراسىندا جاسالعان كەلىسىمگە قول قويىلعان ساتتەن باستاپ اشىلعان ەكەن. سودان بەرى بۇل ەلدىڭ وكىلدىگى ەلىمىزدە دوستىق قارىم-قاتىناستى نىعايتۋدا تابىستى جۇمىس ىستەپ كەلەدى.
مەڭدوللا نۇرىمۇلى