مەملەكەت باسشىسى قاسىم-جومارت توقاەۆ ءوزىنىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا ۇلت الەۋەتىن ارتتىرۋ ماسەلەسىنە ەرەكشە توقتالدى.
جولداۋدىڭ باسىم باعىتى ەكونوميكاعا باعىتتالعانىمەن, بارلىق ەكونوميكالىق ءىس-شارالاردىڭ ناتيجەسى حالىقتىڭ جاعدايىنا تىكەلەي اسەر ەتۋى ءتيىس. «ەلىمىزدىڭ باستى قۇندىلىعى – ادام» دەدى پرەزيدەنت بيىلعى جولداۋىندا. وسىعان وراي مەن جەتەكشىلىك ەتەتىن «استانا سۋ سەرۆيس» پيك-ءى تۇرعىنداردىڭ ساپالى ءومىر سۇرۋىنە بارىنشا ءمان بەرىپ كەلەدى. قازىر كەز كەلگەن ادام پاتەرىندە جارىقتىڭ سونبەۋىن, سۋدىڭ تاۋلىك بويى توقتاۋسىز اعىپ تۇرۋىن, ءۇي ماڭىنىڭ قوقىستان ارىلىپ, عيماراتتىڭ قاسبەتى مەن اينالاسىنىڭ سانيتارلىق نورمالارعا سايكەس بولۋىن, اۋماقتىڭ زامان تالابىنا ساي كوگالداندىرىلۋىن, ءتىپتى بالالارىنىڭ الىسقا بارماي-اق ەسىك الدىندا الاڭسىز ويناعانىن قالايدى. بۇل رەتتە ءبىز ەلوردالىقتاردىڭ جايلى ءارى قاۋىپسىز ورتادا ءومىر سۇرۋىنە قولدان كەلگەنشە جاعداي جاساۋدامىز.
ءبىزدىڭ پيك بۇگىنگى تاڭدا 488 پاتەردەن تۇراتىن سەگىز ۇيگە قىزمەت كورسەتەدى. 2020 جىلى تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى بويىنشا كىرەبەرىستى جوندەۋ جۇرگىزىلىپ, 2021 جىلى شاتىر جابىنى جوندەلدى. تۇرعىن ۇيلەردە ناسوستار اۋىستىرىلىپ, جىلۋ الماستىرعىش جۋىلدى. اۋماقتى كوگالداندىرۋ ماقساتىندا وزىمىزگە قاراستى ۇيلەردىڭ ماڭىنا 35 شىرشا, 10 قايىڭ, 15 قارا اعاش وتىرعىزىلدى. جىل سايىن 400-گە جۋىق ءتۇپ گۇل ەگەمىز. اۋدان اكىمدىگىنىڭ كومەگىمەن بالالار الاڭى اباتتاندىرىپ, اسفالت توسەلدى. جالپى, بىزدە تۋىنداعان كۇردەلى ماسەلە جوقتىڭ قاسى. بۇل, ارينە, جۇمىستى دۇرىس ۇيلەستىرۋدىڭ ناتيجەسى بولسا كەرەك.
قازاقستان پرەزيدەنتى «ادىلەتتى قازاقستان» مەن «ادال ازامات» سياقتى ۇعىمداردىڭ قوعامىمىزدا باسىمدىق تانىتۋى ءتيىس ەكەنىن اتاي كەلىپ, ءارتۇرلى دەڭگەيدەگى باسشى مامانداردىڭ جەكە جاۋاپكەرشىلىكتەرىن ارتتىرۋدى تاپسىرعان بولاتىن. بۇل رەتتە مەملەكەت باسىشىسىنىڭ پىكىرىن تولىقتاي قۇپتايمىن. پرەزيدەنتتىڭ ەڭ تومەنگى جالاقى دەڭگەيىن 60 مىڭ تەڭگەدەن 70 مىڭ تەڭگەگە دەيىن كوتەرۋ تۋرالى شەشىم قابىلداعانى جانە وسى شەشىم 1,8 ميلليون ازاماتتىڭ تابىسىنا تىكەلەي اسەر ەتەتىنى قۋانتادى.
ءار وتباسى ءۇشىن بالا كۇتىمىندەگى دەمالىستىڭ نارەستە ءبىر جارىم جاسقا تولعانعا دەيىن ۇزارتىلۋى دا كوڭىلدەن شىققانى شىندىق. ارينە, كەز كەلگەن اتا-انا ءسابيىنىڭ جانىندا كوبىرەك بولۋى كەرەك. سونداي-اق ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارۋدى ۇسىنۋى دا بارشا قازاقستاندىقتار ءۇشىن جاعىمدى جاڭالىق بولدى. قارجى ءار بالا 18 جاسقا تولعانعا دەيىن اۋدارىلىپ تۇرادى, ونى مەرزىمىنەن بۇرىن ەسەپشوتتان شىعارىپ الۋعا بولمايدى. جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالاتىن بولادى. بۇل قاراجات وسكەلەڭ ۇرپاقتىڭ ۇلكەن ومىرگە قادام باسۋىنا مۇمكىندىك بەرەدى. وسىنشاما يگىلىكتىڭ ءبارى ەلىمىزدىڭ ازاماتتارى ءۇشىن جاسالىپ جاتقانى كوڭىلىمىزدى كوتەرىپ-اق تاستادى.
ەلدىگىمىزدى قورعاۋدىڭ ەڭ باستى جولى – بەرەكەلى بىرلىك ەكەنىن ەسكەرگەن مەملەكەت باسشىسى حالقىمىز تاتۋلىق پەن تۇراقتىلىققا ەرەكشە ءمان بەرگەنىن, ونى بارىنەن بيىك قويعانىن جانە ءدال وسى كەزدە ءبىر جاعادان باس, ءبىر جەڭنەن قول شىعارا ءبىلۋىمىز كەرەك ەكەنىن باسا ايتتى. بۇل باستامالار ەلىمىزدىڭ بولاشاعىن ايقىندايدى. سوندىقتان, قازىرگى كەزدە ۇلت مۇددەسى ءۇشىن ۇيىسىپ, بىرىگۋگە ءتيىسپىز. ەرتەڭىمىزگە الاڭداعان ەل پرەزيدەنتىنىڭ جاڭا باستامالارىنا قولداۋ ءبىلدىرىپ, جۇكتەگەن مىندەتتەرگە جاۋاپكەرشىلىكپەن قاراپ جانە ونىڭ ورىندالۋىنا بىرلەسە اتسالىسايىق.
تالشىن ۋتەۋوۆا,
«استانا سۋ سەرۆيس» پيك توراعاسى
