تاۋەلسىزدىك ۇرپاقتارىنىڭ اراسىندا ءبىلىم-بىلىگى, تالانت-تالابىمەن تەك جەرلەستەرىن عانا ەمەس, شەتەلدىكتەردى دە تاڭقالدىرىپ, مويىنداتىپ جۇرگەن جاستار كوپ. ولار قوعامنىڭ ءتۇرلى سالاسىندا ۇلكەن جەتىستىكتەرگە جەتىپ, تۋعان ەلىنىڭ داڭقىن شىعارۋدا. سونداي ءبىلىمدى جاستاردىڭ ءبىرى, بولاشاق دارىگەر تەمىرحان باياحمەتوۆ سوڭعى ءۇش جىل قاتارىنان «تمد-نىڭ ۇزدىك ستۋدەنتى» جۇلدەسىنە يە بولدى. ونىڭ عىلىم سالاسىنداعى جەتىستىكتەرى حالىقارالىق دەڭگەيدەگى كونفەرەنتسيالار مەن مەديتسينالىق چەمپيوناتتاردا العان ديپلومدارىنان, ءتيىمدى عىلىمي جوبالارىنان جيناقتالعان.
پاۆلودارلىق تەمىرحان قازىرگى تاڭدا سەمەي مەديتسينا ۋنيۆەرسيتەتىندە 5- كۋرستا وقيدى. بۇگىن 14 قازاندا 22 جاسقا تولعان تەمىرحاننىڭ مەديتسيناعا دەگەن قىزىعۋشىلىعى بالالىق ارمانىمەن ۇشتاسىپ جاتىر. سونىڭ ارقاسىندا ول 2018 جىلى وقۋعا تۇسپەس بۇرىن «كاسىبى بويىنشا ۇزدىك» قالالىق بايقاۋىندا «كىشى مەيىرگەر-ماسساجيست» اتالىمى بويىنشا جەڭىمپاز اتاندى. كەلەسى جىلى جوعارى وقۋ ورنىنا «جالپى مەديتسينا» ماماندىعى بويىنشا وقۋعا ءتۇسىپ, ءوزىن ۇنەمى ءبىلىمىن جەتىلدىرۋدەن تانبايتىن, ىزدەنىمپاز شاكىرت رەتىندە عانا كورسەتتى. ۋنيۆەرسيتەت ومىرىندەگى قوعامدىق جۇمىستارعا بەلسەنە ارالاساتىن كەيىپكەرىمىز SCOPH كوميتەتى باسشىلىعىمەن وتكەن «ءومىر سوعىسى» ءىس-شاراسىنا, «رۋحاني جاڭعىرۋ» رەسپۋبليكالىق زياتكەرلىك بايقاۋىنا قاتىسقان. ۇزدىكسىز ۇمتىلىسىنىڭ جانە كاسىبي بىلىكتىلىگىن كەڭەيتۋگە دەگەن تالپىنىسىنىڭ ارقاسىندا 2020 جىلى Johns Hopkins University وقۋ ورنىنىڭ پسيحولوگيا بويىنشا ونلاين-كۋرسىنا قاتىسىپ, «Coursera» حالىقارالىق ءبىلىم پلاتفورماسىنداعى Novosibirsk State University تەكتى باسقارۋ جونىندەگى قىسقا كۋرستى وقىپ ءتامامدادى. وقۋ ورنىنداعى جالپى ءبىلىم بەرۋ ءتارتىبى كافەدراسىنداعى «مەديتسيناداعى ءىت» عىلىم ستۋدەنتتىك ۇيىرمەسىنىڭ مۇشەسى.
عىلىمعا اۋەستىگىن پاندەميا باستالعان جىلى 2-كۋرستا وقىپ جۇرگەندە ۋنيۆەرسيتەتتە وتكەن «ستۋدەنت جانە عىلىم. قوعامدىق دەنساۋلىق ساقتاۋ, الەۋمەتتىك-گۋمانيتارلىق عىلىم جانە تسيفرلىق مەديتسينا» اتتى جىل سايىنعى كونفەرەنتسيادا تانىتىپ, «مەديتسينا نىساندارىنىڭ كومپيۋتەرلىك 3-D-ۆيزۋاليزاتسياسى» تاقىرىبىندا جاساعان بايانداماسى ءۇشىن ءبىرىنشى ورىن الدى. 2021 جىلى حالىقارالىق «ستۋدەنتتىك عىلىم جانە دەنساۋلىق» عىلىمي-تاجىريبەلىك كونفەرەنتسياسىنا قاتىسىپ, ءىى دارەجەلى ديپلومعا يە بولدى. سول جىلى حالىقارالىق ستۋدەنتتىك عىلىمي قوعام جۇمىستارى شەڭبەرىندە «Medical Soft Skills» IV بۇكىلرەسەيلىك چەمپيوناتىنا قاتىسىپ, 3-ورىن الادى. عىلىم كۇنىنە ارنالعان №64 عىلىمي-تاجىريبەلىك كونفەرەنتسيادا «Excel ۆيزۋاليزاتسياسى كومەگىمەن اۋرۋ تاريحى كورسەتكىشتەرىن تالداۋ» تاقىرىبىندا بايانداما جاساعانى ءۇشىن ءىىى دارەجەلى ديپلوممەن ماراپاتتالدى. 2022 جىلى ەكاتەرينبۋرگتەگى ورال مەملەكەتتىك مەديتسينالىق ۋنيۆەرسيتەتى بازاسىندا وتكەن «زاماناۋي مەديتسينا عىلىمى مەن دەنساۋلىق ساقتاۋ سالاسىنىڭ وزەكتى ماسەلەلەرى» كونفەرەنتسياسىنا قاتىسىپ, ءى دارەجەلى ديپلوم يەسى اتانادى. بىلتىر سونداي-اق «ادام جانە ءدارى-قازاقستان» XV حالىقارالىق كونگرەسىنەن دە قالمادى. وتكەن جىلداعى ۇلكەن جەتىستىگى – پاۆلودار وبلىستىق «تاۋەلسىزدىك ۇرپاقتارى» جۇلدەسىنىڭ «ءبىلىم جانە عىلىم» اتالىمى بويىنشا لاۋرەاتى اتانۋى.
– بۇل جۇلدەنى جۇرەكتىڭ 3D مودەلى جوباسىن جاساعانىم ءۇشىن الدىم. جۇرەكتىڭ 3DMAX ۇلگىسىن شەتەلدە وتكەن كونفەرەنتسيادا تانىستىردىم. بولاشاقتا كارديوحيرۋرگ بولامىن دەپ, ءۇشىنشى كۋرستا وسى باعىتتى تاڭدادىم. بىلىكتى مەديتسينا مامانىنا اينالا وتىرىپ, تۋعان ەلىمنىڭ مەديتسيناسىن دامىتۋعا, حالىقتىڭ دەنساۋلىعىن جاقسارتۋعا ءوز ۇلەسىمدى قوسقىم كەلەدى, – دەيدى تەمىرحان.
بيىل كوكتەمدە №65 «عىلىم جانە دەنساۋلىق» عىلىمي-تاجىريبەلىك كونفەرەنتسياسىندا 2-ورىن جۇلدەسىن يەلەنگەن ول مامىر ايىندا وزبەكستاننىڭ بۇحارا مەديتسينا ۋنيۆەرسيتەتى وتكىزگەن حالىقارالىق كونفەرەنتسيادا 1-ورىن الادى. ستۋدەنتتەر الماسۋ باعدارلاماسى بويىنشا بيىل اقپان-ماۋسىم ايلارىندا رەسەيدەگى ريازانوۆ مەملەكەتتىك ۋنيۆەرسيتەتىندە وقۋدان وتەدى.
عىلىم مەن بىلىمنەن بولەك بالا كەزدەن ونەرگە, سپورتقا, تاريحقا دا جاقىن بولعان تەمىرحان مەكتەپتە گەوگرافيا, تاريح جانە ادەبيەتتەن قالالىق, وبلىستىق جانە رەسپۋبليكالىق وليمپيادالاردا جۇلدەلى ورىنداردى العان. 10 جاسىنان باستاپ سامبو مەن قازاق كۇرەسىنەن ۇيىرمەگە قاتىسىپ, تۋرنيرلەردەن جۇلدەلى ورالىپتى. جان-جاقتى جىگىت سپيدكۋبينگپەن دە اينالىسادى, ولەڭ شىعاراتىن دا ونەرى بار. ونىڭ تابىس قورجىنىندا رەسپۋبليكالىق «ونەگە» بايقاۋىنىڭ «مانەرلەپ وقۋ» اتالىمىنان العان ءى دارەجەلى ديپلوم جاتىر. وسىنداي جان-جاقتىلىعى جانە ەڭ باستىسى عىلىمداعى ىزدەنىستەرى مەن جەتىستىكتەرى ءۇشىن ءبىلىمدى جاس 2021, 2022 جانە 2023 جىلدارى ءۇش جىل قاتارىنان «تمد ۇزدىك ستۋدەنتى» حالىقارالىق بايقاۋىنىڭ جۇلدەسىن الىپ, قازاق جاستارىنىڭ قارىمدى قابىلەتىن الەمگە پاش ەتىپ كەلەدى.
