استانا اكىمى ادىلبەك جاقسىبەكوۆ جاڭا مەكتەپتەردىڭ دايىندىعىن تەكسەردى, دەپ حابارلايدى قالا اكىمىنىڭ ءباسپاسوز قىزمەتى. ءبىرىنشى قىركۇيەك كۇنى ەلوردامىزدىڭ ءۇش جاڭا ءبىلىم ورداسى وقۋشىلارعا ەسىگىن اشادى. ولار – ورىنبور كوشەسى بويىنداعى №77 مەكتەپ-گيمنازيا, «كومسومولسكي» تۇرعىن الابىنداعى №79 مەكتەپ-گيمنازيا جانە «باتىعاي» تۇرعىن الابىنداعى دارىندى بالالارعا ارنالعان №81 «Astana English school» گيمنازياسى. ەسىل اۋدانىندا ورنالاسقان بۇل مەكتەپتەردىڭ ارقايسىسى 1200 ورىنعا لايىقتالعان.
كەشە كوشپەلى كەڭەس بارىسىندا قالا باسشىسى جاڭا ءبىلىم بەرۋ مەكەمەلەرىنىڭ ماتەريالدىق-تەحنيكالىق بازاسىمەن جانە ۇستازداردىڭ وقۋ جىلىنا دايىندىق بارىسىمەن تانىسىپ, مەكتەپ كىتاپحاناسىنىڭ وقۋ قۇرالدارىمەن قامتىلۋ جايىن تەكسەردى. قالا اكىمى ەلورداداعى ءبىلىم بەرۋ جۇيەسى باسەكەگە قابىلەتتى بولۋ كەرەكتىگىن, ءار مەكتەپكە زاماناۋي ساندىق ءبىلىم بەرۋ رەسۋرستارىن ەنگىزۋ قاجەتتىگىن اتاپ ءوتتى.
– ۇستازدار ۇنەمى بىلىكتىلىگىن ارتتىرىپ وتىرۋى كەرەك. ءبىلىم بەرۋ سالاسىنىڭ بۇدان بىلايعى ناتيجەلى دامۋى «بەس ينستيتۋتسيالىق رەفورمانى ىسكە اسىرۋ بويىنشا 100 ناقتى قادام» اتتى ۇلت جوسپارىندا كورسەتىلگەن. ءبىزدىڭ باستى ماقساتىمىز – بالانىڭ مەكتەپتە دامۋى ءۇشىن بارلىق مۇمكىندىكتەر جاساۋ, – دەپ اتاپ ءوتتى ءا.جاقسىبەكوۆ.
جاڭا وقۋ جىلىندا ەلوردالىق 17 مىڭ بالا مەكتەپ تابالدىرىعىن اتتايدى. بۇل بىلتىرعى وقۋ جىلىنا قاراعاندا 2 مىڭ وقۋشىعا ارتىق.
سونىمەن قاتار, اكىم استانالىق تسيركتىڭ, «بارىس» سپورت كەشەنىنىڭ, «قازاقستان» سپورت سارايىنىڭ جانە ق.مۇڭايتپاسوۆ اتىنداعى الاڭنىڭ جاعدايىن تەكسەرىپ, اتالعان نىسان جەتەكشىلەرىنە سپورتشىلاردىڭ كاسىبي دايىندىعىن جانە قالا تۇرعىندارى مەن قوناقتارىنىڭ دەمالىسىن وتكىزۋگە ساپالى قىزمەت كورسەتۋدى تاپسىردى.
